﻿ROMANS.
10.
Tíˀûuwin páaḏéˀin, pín taˀge hayḏi Yôesi Táḏá dódaˀmáa naví tꞌowa in Israel-ˀin dimuuˀin ovâyˀaywoeníḏí. 
Taˀgendi wâytu̖máa, indá hânho didaˀ Yôesi óehíhchanmä̂äníˀin, hewänbo piháa dívísóˀḏínde dívíˀa̖míḏí. 
Ho wíḏínhanginnáhpí háa Yôesi iˀoˀin heḏânho iḏi tꞌowa ovâycha̖a̖máˀve-íḏí tꞌaywó̖ˀdi wíḏâymáapí waagi, heḏiho indá dâytu̖wä̖máa háḏíḏí ha̖ˀmin wíˀbo dívípipáa-íḏí, heḏiho háa Yôesiḏi kin ovâyˀa̖míˀin wíḏâyhóndepí. 
Nääho tꞌä̖hkí in toˀwên Christ-víˀpiyeˀ dívíwhä̖yundeˀindá wíyá ho wíḏíntáypí dívísóˀḏêe-íḏí i tsontu̖u̖ dâyˀaˀginnamíḏí heḏânho dipúwíḏí in toˀwên Yôesi Táḏáḏí ovâycha̖a̖máaˀin tꞌaywó̖ˀdi wíḏâymáapí waagi. 
In tꞌowa dívísóˀḏíndeˀin Yôesiví tsontu̖u̖ dâyˀaˀginnamíḏí heḏânho Yôesiḏi ovâycha̖a̖máˀve-íḏí tꞌaywó̖ˀdi wíḏâymáapí waagi, inbí̖ˀgeḏi Moses kinnân ita̖ˀnan: Wí toˀwí tꞌä̖hkí Yôesiví tsontu̖u̖ iˀaˀgindoˀi-á wówátsi imáˀve-í. 
Hewänbo kinnân nata̖ˀmuu in toˀwênbí̖ˀgeḏi inbí whä̖yu̖ dínmuuḏi Yôesiḏi ovâycha̖a̖ˀin tꞌaywó̖ˀdi wíḏâymáapí waagi: Wíˀítú̖nípí, “Toˀwí ûnkhâyˀä̖ˀ makówápiyeˀ napée-íˀin.” (Nä́ˀindá natu̖ˀdaˀ, Christ óedaaˀa̖míḏí makówáḏí nawha̖veˀä̖́ä̖-íḏí.) Heḏá wáˀ nata̖ˀmuu: 
Wíˀítú̖nípí, “Toˀwí ûnkhâyˀä̖ˀ in chuˀin dikwꞌó̖ˀ diwepiyeˀ nawhá̖níˀin.” (Nä́ˀindá natu̖ˀdaˀ, in chuwaˀinbíˀweḏi Christ óetegé-íḏí óewówápaa-íḏí.) 
Hewänbo kinnân nata̖ˀmuu: Yôesiví tu̖u̖-á undáḏího nayiˀ, unbí sóeḏí ítú̖ní heḏi unbí píˀnä́ khóˀyé-á bînmáa. Heḏi nä́ˀi tu̖u̖ whä̖yu̖ i̖ˀgeḏi namuuˀi-á tꞌowa âytꞌôeˀoˀ. 
Heḏânkun tꞌowaví páaḏépiyeˀ ítú̖ḏí Jesus-á i shánkí natsonyiˀi namuuˀin, heḏá Yôesi Táḏáḏí wíyá óewáywówápaaˀindá unbí píˀnä́ khóˀyé-á úvíwhä̖yundeḏi, wovâyˀaywoení, 
gá naˀinbí píˀnä́ khóˀyé Jesus-víˀpiyeˀ ívíwhä̖yundeḏá Yôesi Táḏáḏí dícha̖a̖máa tꞌaywó̖ˀdi wíˀâymáapí waagi, heḏi ivíˀpiyeˀ ívíwhä̖yundeˀin gitú̖ḏá, dînˀaywoení. 
Yôesiví ta̖ˀnin diwá ûntû̖ˀ, In toˀwên ivíˀpiyeˀ dívíwhä̖yundeˀindá háˀto dichanpúwí híwó̖ˀpîˀpiyeˀ dívíwhä̖yundeˀin. 
Tꞌä̖hkí tꞌowagîˀ handa̖ˀ napoˀ, in Huḏíyogíˀindá, in Huḏíyo dimuupíˀingíˀindá wáˀ, gá tꞌä̖hkí tꞌowagîˀ wîˀḏa̖ˀ wí shánkí natsonyiˀi naˀä́ndân, heḏi iḏá báyékí híwó̖ˀdi ovâymäˀ in toˀwên ivíˀpiyeˀ dívíyûusuˀannin ovâykhä̖ge̖ˀnamíḏí. 
Yôesiví ta̖ˀnin diwá ûntû̖ˀ waagi: Toˀwên i shánkí natsonyiˀivíˀpiyeˀ dívíyûusuˀandi diˀaywondaˀpóeḏí iḏá ovâyˀaywoení-ákun. 
Hewänbo háḏíḏan ivíˀpiyeˀ kin dívíyûusuˀa̖mí ivíˀpiyeˀ wíḏívíwhä̖yundepíḏí, heḏá háḏíḏan dívíwhä̖yú̖-í iví̖ˀgeḏi wíḏínhanginnáhpíḏí, heḏá háḏíḏan dínhanginpúwí toˀwíḏí iví tu̖u̖ wíˀovâytꞌôeˀanpíḏí, 
heḏá háḏíḏan wí toˀwíḏí ovâytꞌôeˀa̖mí Yôesiḏi wíˀóesanpíḏí? Kinnân Yôesiví ta̖ˀnin diwe nata̖ˀmuu: In toˀwên wí híwó̖ˀdi tu̖u̖ dâymáyä̖ˀinbí a̖htaa-á saˀwó̖ˀ dínkeetꞌóe. 
Hewänbo Isaiah natú̖ waagibá, tꞌä̖hkí in Huḏíyo Yôesiví híwó̖ˀdi tu̖u̖ wíḏâyséegíˀanpí. Kinnân ita̖ˀnan: Naˀinbí Sedó Yôesi, wên hä̖́yú̖hayḏiḏa̖ˀ tꞌowa i hä̖ä̖wí navíˀweḏi ditꞌoeˀiˀ dívíwhä̖yu̖. 
Heḏânkun Yôesivíˀpiyeˀ ívíwhä̖yú̖-íḏí, gíntáy iví tu̖u̖ gitꞌóe-íḏí, heḏá nä́ˀi tu̖u̖-á gitꞌoˀ wí toˀwíḏí Christ-ví̖ˀgeḏi dítꞌôeˀoḏi. 
Héyâa in Israel-ˀin, ti Yôesiví tu̖u̖ wíḏitꞌoepíˀan? Ditꞌoe-ákun, Yôesiví ta̖ˀnin diwe ûntû̖ˀ waa: Yôesiví tu̖u̖-á nä́ä oepáa kꞌayḏi tꞌä̖hkí ûntu̖u̖mää, heḏiho tꞌowa tꞌä̖hkí wáyyé tꞌä̖hkí dikwꞌó̖ˀnin nä́ˀi tu̖u̖ dínpówá. 
Heḏânkun in Israel-ˀin dínhanginnândákun háa Yôesi ikhâymáaˀin. Kin Moses páaḏé ita̖ˀnan háa Yôesiḏi ovâytu̖ˀan waa: Wây-á piˀwên tꞌowa dimuuˀin naaḏi dovâyˀaywondibo wâythúukannamí, Háa hä̖ˀin tꞌowa hangintan dâymáapíˀingîˀ dovâykhâymáaˀin namuuḏi wâytꞌeˀyaˀnamí. 
Heḏá Isaiah-á shánkí kayˀindá ihíˀmáaḏí nä́ˀi Yôesiví híˀ ûntú̖: In toˀwên naa wíḏítu̖wä̖máapíˀindi naa díshaa. Inbíˀpiyeˀ dáykeeyan, naví̖ˀgeḏi ditsikayipí wänboˀ. 
Hewänbo in Israel tꞌowaví̖ˀgeḏi Yôesi kinnân ihíˀmáa: Hä̖̂ä̖ḏi wänbo tꞌä̖hkí okhóewaaˀä́n nä́ˀin tꞌowa dovâyséegíˀa̖míḏí, tobá wíḏíˀaˀginmáapí wänboˀ heḏá naví tu̖u̖ dînyoegiˀo wänbo-á. 
