༄༅། །ལུང་སྟོན་པ་ཡེ་རེམ་ཡཱའི་མདོ།.
1.
འདི་དག་ནི་པེན་ཡཱ་མེན་ཡུལ་གྱི་ཨ་ན་ཐོད་གྲོང་ཁྱེར་གྱི་མཆོད་དཔོན་ཏེ། ཧིལ་གི་ཡཱའི་བུ་ཡེ་རེམ་ཡཱའི་གསུང་ཡིན་ནོ། ། 
ཡ་ཧུ་དཱའི་རྒྱལ་པོ་ཨ་མོན་གྱི་བུ་ཡོ་ཤི་ཡཱས་རྒྱལ་སྲིད་སྐྱོང་བའི་ལོ་བཅུ་གསུམ་པར། དཀོན་མཆོག་ཡ་ཝཱེའི་བཀའ་ནི་ཡེ་རེམ་ཡཱ་ལ་བྱུང་བ་སྟེ། 
ཡ་ཧུ་དཱའི་རྒྱལ་པོ་ཡོ་ཤི་ཡཱའི་བུ་ཡེ་ཧོ་ཡཱ་ཀིམ་གྱིས་རྒྱལ་སྲིད་བསྐྱངས་པ་ནས། ཡ་ཧུ་དཱའི་རྒྱལ་པོ་ཡོ་ཤི་ཡཱའི་བུ་ཚིད་ཀི་ཡཱ་ཡིས་རྒྱལ་སྲིད་སྐྱོང་བའི་དུས་མཇུག་སྟེ། ལོ་བཅུ་གཅིག་པའི་ཟླ་ལྔ་པའི་ནང་ཡེ་རུ་སཱ་ལེམ་གྱི་མི་རྣམས་བཙན་བཟུང་བྱས་པའི་སྐབས་སུ། དཀོན་མཆོག་ཡ་ཝཱེའི་བཀའ་ནི་རྒྱུན་དུ་ཡེ་རེམ་ཡཱ་ལ་བྱུང་ངོ་། ། 
ཡེ་རེམ་ཡཱ་ན་རེ། དཀོན་མཆོག་ཡ་ཝཱེའི་བཀའ་ནི་བདག་ལ་བྱུང་བ་འདི་ལྟ་སྟེ། 
བདག་གིས་ཁྱོད་མ་ཡི་མངལ་ནང་མ་བཀོད་སྔོན་དུ་ཁྱོད་རང་ངོ་ཤེས་པ་དང་། ཁྱོད་རང་མ་ཡི་མངལ་ལས་མ་ཐོན་སྔོན་དུ་བདག་གིས་ཁྱོད་དམ་པར་མཛད་ཅིང་། ཁྱོད་རང་མི་རིགས་རྣམས་ཀྱི་ལུང་སྟོན་པར་བསྐོས་པ་ཡིན་ཞེས་གསུངས། 
དེ་ནས་ངས་འདི་ལྟར། ཀྱེ་གཙོ་བོ་ཡ་ཝཱེ་ལགས། གཟིགས་དང་། ང་ནི་ལོ་ན་ཕྲ་བས་གཏམ་ཅི་ལྟར་སྨྲ་བའང་མི་ཤེས་སོ་ཞེས་ཞུས་པ་ན། 
དཀོན་མཆོག་ཡ་ཝཱེས་ང་ལ་འདི་སྐད་དུ། ཁྱོད་ཀྱིས་ང་རང་ལོ་ན་ཕྲའོ་ཞེས་མ་བཤད་ཅིག ཅི་ལ་ཞེ་ན། བདག་གིས་ཁྱོད་སུ་དང་སུ་ཞིག་གི་གམ་དུ་མངགས་ཀྱང་ཁྱོད་དེར་འགྲོ་དགོས་ལ། བདག་གིས་ཁྱོད་ལ་བཀའ་བབས་ནས་ཅི་སྨྲ་བར་བཅུག་ན་ཁྱོད་ཀྱིས་དེ་བཞིན་སྨྲ་དགོས། 
ཁྱོད་དེ་རྣམས་ལ་མ་འཇིགས་ཤིག ཅི་ལ་ཞེ་ན། བདག་ཁྱོད་དང་མཉམ་དུ་ཡོད་པ་དང་ཁྱོད་སྐྱོབ་པར་འགྱུར་ཞེས་གསུངས་ཏེ། འདི་ནི་དཀོན་མཆོག་ཡ་ཝཱེས་གསུངས་པའོ། ། 
དེ་ནས་དཀོན་མཆོག་ཡ་ཝཱེས་ཕྱག་བརྐྱངས་ནས་ངའི་ཁ་ལ་རེག་སྟེ་ང་ལ་འདི་སྐད་དུ། ལྟོས་ཤིག བདག་གིས་རང་གི་གཏམ་ཁྱོད་ཀྱི་སྨྲ་སྒོར་བཞག་པ་ཡིན། 
དེ་རིང་བདག་གིས་ཁྱོད་ནི་མི་རིགས་དང་རྒྱལ་ཕྲན་ཐམས་ཅད་ཀྱི་མཐོ་སར་འགོད་པ་སྟེ། ཅི་ལ་ཞེ་ན། རྩ་ནས་འབལ་བ་དང་བཤིག་པ། རྩ་མེད་གཏོང་བ། ཕམ་པར་རྒྱག་པ་བཅས་དང་། ཡང་བསྐྱར་འཛུགས་པ་དང་འདེབས་པའི་ཕྱིར་ཡིན་ཞེས་གསུངས། 
ཡང་དཀོན་མཆོག་ཡ་ཝཱེའི་བཀའ་ནི་བདག་ལ་བྱུང་བ་འདི་ལྟ་སྟེ། ཡེ་རེམ་ཡཱ་ཁྱོད་ཀྱིས་ཅི་ཞིག་མཐོང་ངམ་ཞེས་གསུངས་པར། ངས་འདི་ལྟར། ངས་སྟར་སྡོང་གི་ཡལ་ག་ཞིག་མཐོང་བྱུང་ཞེས་ཞུས་པ་ལ། 
དཀོན་མཆོག་ཡ་ཝཱེས་ང་ལ་འདི་སྐད་དུ། ཁྱོད་ཀྱིས་མཐོང་པ་ལེགས་ཏེ། བདག་གིས་རང་གི་གཏམ་གཟབ་གཟབ་ངང་བསྲུངས་ནས་དེ་འགྲུབ་པར་བྱེད་ངེས་ཡིན་ཞེས་གསུངས། 
ཡང་དཀོན་མཆོག་ཡ་ཝཱེའི་བཀའ་ཐེངས་གཉིས་པ་བདག་ལ་བྱུང་བ་འདི་ལྟ་སྟེ། ཡེ་རེམ་ཡཱ་ཁྱོད་ཀྱིས་ཅི་ཞིག་མཐོང་ངམ་ཞེས་གསུངས་པར། ངས་བྱང་ནས་ལྷོ་རུ་བསེགས་པའི་སྣོད་ལས་ཆུ་ཁོལ་བ་མཐོང་བྱུང་ཞེས་ཞུས་པ་ལ། 
དཀོན་མཆོག་ཡ་ཝཱེས་ང་ལ་འདི་སྐད་དུ། བྱང་ཕྱོགས་ནས་ཆག་སྒོ་འབྱུང་ཞིང་ཡུལ་འདིའི་མི་ཐམས་ཅད་ཀྱི་སྟེང་ལ་འབབ་པར་འགྱུར། 
ལྟོས་ཤིག བདག་གིས་བྱང་ཕྱོགས་རྒྱལ་ཕྲན་རྣམས་ཀྱི་མི་ཐམས་ཅད་བསྡུ་བར་བྱེད་ཅིང་། དེ་རྣམས་འོངས་ནས་རེ་རེས་ཡེ་རུ་སཱ་ལེམ་གྱི་མཁར་སྒོ་རུ་རང་རང་གི་བཞུགས་ཁྲི་འགོད་པ་དང་། ཉེ་འཁོར་གྱི་མཁར་རྣམས་ལ་རྒོལ་ཞིང་། ཡང་ཡ་ཧུ་དཱའི་གྲོང་ཁྱེར་ཐམས་ཅད་ལ་རྒོལ་བར་འགྱུར་ཞེས་གསུངས་ཏེ། འདི་ནི་དཀོན་མཆོག་ཡ་ཝཱེས་གསུངས་པའོ། ། 
མི་འདི་རྣམས་ཀྱིས་བདག་དོར་ནས་ལྷ་གཞན་རྣམས་ལ་སྤོས་བདུགས་ཏེ། རང་གི་ལག་པས་བཟོས་པ་ལ་ཕྱག་བཙལ་ཏོ། །བདག་གིས་སྤྱོད་ངན་འདི་ཐམས་ཅད་ཀྱི་ཕྱིར་དུ་དེ་རྣམས་ལ་ངའི་ཉེས་ཆད་བསྒྲག་པར་འགྱུར་རོ། ། 
དེ་བས། ཁྱོད་རྣམས་ཀྱིས་སྐ་རགས་ཆོངས་ལ་ཡར་ལོངས་དང་། བདག་གིས་ཁྱོད་ལ་བསྒོས་པའི་བཀའ་ཐམས་ཅད་དེ་དག་ལ་ཤོད་ཅིག བདག་གིས་ཁྱོད་ནི་དེ་དག་གི་མདུན་དུ་འཇིགས་པར་མི་བྱ་བའི་ཆེད་དུ། དེ་རྣམས་ཀྱི་དབང་གིས་ཁྱོད་མ་འཇིགས་ཤིག 
ལྟོས་དང་། བདག་གིས་དེ་རིང་ཁྱོད་ནི་མཁར་བརྟན་པོ་དང་ལྕགས་ཀྱི་ཀ་བ། ལི་ཡི་གྱང་བཅས་སུ་བྱས་ནས་ས་གཞི་ཡོངས་ཏེ་ཡ་ཧུ་དཱའི་རྒྱལ་པོ་དང་འགོ་དཔོན། མཆོད་དཔོན། ཡུལ་འདིའི་མི་ཐམས་ཅད་བཅས་ལ་འགོག་རྒོལ་བྱེད་དུ་འཇུག་གོ ། 
དེ་དག་གིས་ཁྱོད་ལ་རྒོལ་ན་ཡང་ཁྱོད་ལས་རྒྱལ་མི་ཐུབ། ཅི་ལ་ཞེ་ན། བདག་ཁྱོད་དང་མཉམ་དུ་ཡོད་པ་དང་ཁྱོད་སྐྱོབ་པར་འགྱུར་ཞེས་གསུངས་ཏེ། འདི་ནི་དཀོན་མཆོག་ཡ་ཝཱེས་གསུངས་པའོ། །