༄༅། །པེ་ཏྲོའི་འཕྲིན་ཡིག་གཉིས་པ།.
1.
དེ་ཡང་སི་མོན་པེ་ཏྲོ་ང་རང་ནི་ཡེ་ཤུ་མཱ་ཤི་ཀའི་ཞབས་ཕྱི་པ་དང་སྐུ་ཚབ་པ་ཞིག་ཡིན༌ལ། འཕྲིན་ཡིག་འདི་ནི་བདག་ཅག་གི་དཀོན་མཆོག་དང་སྐྱབས་མགོན་ཡིན་པའི་ཡེ་ཤུ་མཱ་ཤི་ཀའི་དྲང་བདེན་ལ་བརྟེན་ནས། ངེད་ཅག་དང་ལྷན་ཅིག་དད་པ་རིན་ཐང་ཅན་འདྲ་མཚུངས་ཐོབ་པ་རྣམས་ལ་སྤྲིངས་པ་སྟེ། 
ཁྱོད་ཅག་གིས་དཀོན་མཆོག་དང་བདག་ཅག་གི་གཙོ་བོ་ཡེ་ཤུ་ངོ་ཤེས་པ་བརྒྱུད་ནས། ཁྱོད་རྣམས་ལ་ཐུགས་རྗེ་དང་ཞི་བདེ་མང་དུ་འཐོབ་པར༌སྨོན། 
དེ་ཡང་དཀོན་མཆོག་གི་ནུས་མཐུ་ཡིས་བདག་ཅག་ལ་ཚེ་སྲོག་དང་དད་གུས་སྐོར་གྱི་དོན་ཐམས་ཅད་གནང་ཟིན་ནོ།། དེ་ནི་བདག་ཅག་གིས་ཁོང་ཉིད་ངོ་ཤེས་པའི་རྐྱེན་གྱིས་ཡིན་ལ། ཁོང་ནི་རང་ཉིད་ཀྱི་གཟི་བརྗིད་དང་ཕུལ་བྱུང་ལ་བརྟེན་ནས་བདག་ཅག་ལ་ཞལ་འབོད་གནང་མཁན་ཡིན། 
དོན་དེ་བརྒྱུད་ནས་ཁོང་གིས་རིན་ཐང་ལྡན་ཞིང་ཤིན་ཏུ་ཆེ་བའི་ཞལ་བཞེས་རྣམས་བདག་ཅག་ལ་གནང་ཞིང་། དེ་ནི་བདག་ཅག་འཇིག་རྟེན་གྱི་འདོད་ཆགས་ནས་བྱུང་བའི་ངན་རུལ་ལས་ཐར་ཏེ་དཀོན་མཆོག་གི་རང་བཞིན་དང་ལྡན་པར་འགྱུར་བའི་ཕྱིར་རོ།། 
རྒྱུ་མཚན་འདིའི་དབང༌གིས། ཁྱོད་རྣམས་ཀྱིས་ལྷག་ཏུ་བརྩོན་པ་བྱེད་དགོས༌ཏེ། དད་སེམས་ལྡན་པའི་ཁར་ད་དུང་སྤྱོད་བཟང་ཡོད་དགོས༌ལ། སྤྱོད་བཟང་ལྡན་པའི་ཁར་ད་དུང་ཤེས་ཡོན་ཡོད༌དགོས། 
ཤེས་ཡོན་ལྡན་པའི་ཁར་ད་དུང་རང་ཚོད་ཟིན་དགོས་ལ། རང་ཚོད་ཟིན་པའི་ཁར་ད་དུང་སྙིང་རུས་ཡོད༌དགོས། སྙིང་རུས་ལྡན་པའི་ཁར་ད་དུང་དད་གུས་ཡོད༌དགོས་ལ། 
དད་གུས་ལྡན་པའི་ཁར་ད་དུང་སྤུན་ཟླར་གཅེས་སེམས་ཡོད་དགོས། སྤུན་ཟླར་གཅེས་སེམས་ཡོད་པའི་ཁར་ད་དུང་མི་ཐམས་ཅད་ལ་གཅེས་སེམས་ཡོད་དགོས༌པའོ།། 
གལ་ཏེ། ཁྱོད་ཅག་ལ་དོན་དེ་རྣམས་ལྡན་ཞིང་དེ་དག་འཕེལ་བཞིན་ཡོད་ན། ཁྱོད་རྣམས་ནི་བདག་ཅག་གི་གཙོ་བོ་ཡེ་ཤུ་མཱ་ཤི་ཀ་ངོ་ཤེས་པའི་ཕྱོགས་སུ་ཕན་ཐོགས་མེད་པ་དང་འབྲས་བུ་མི་འབྱུང་བ་མིན་ནོ།། 
གལ་ཏེ། མི་སུ་ཞིག་ལ་དོན་དེ་རྣམས་མི་ལྡན་ན། ཁོ་ནི་ལོང་བ་ཡིན་ལ། ཁོས་མིག་མདུན་ཁོ་ན་ལས་གཞན་ཅི་ཡང་མི་མཐོང༌ཞིང༌། རང་གི་སྔར་བྱས་ཀྱི་སྡིག་པ་རྣམས་དག་ཟིན་པའང་བརྗེད༌པའོ།། 
དེའི་ཕྱིར། སྤུན་ཟླ༌རྣམས། ཁྱོད་ཅག་ལ་ཞལ་འབོད་ཐོབ་པ་དང་ཁྱོད་ཅག་བདམས་པར་གྱུར་པ་དེ་བརྟན་ཅིང་མི་འགྱུར་བའི་ཕྱིར། ཁྱོད་ཅག་གིས་དེ་བས་ཀྱང་བརྩོན་དགོས་སོ།། གལ་ཏེ། ཁྱོད་ཅག་གིས་དོན་དེ་རྣམས་བྱེད་པ་ཡིན་ན་ནམ་ཡང་ས་རུ་འགྱེལ་མི་སྲིད་དོ།། 
དེ་ལྟར་ན། ཁྱོད་རྣམས་བདག་ཅག་གི་གཙོ་བོ་དང་སྐྱབས་མགོན་ཡིན་པའི་ཡེ་ཤུ་མཱ་ཤི་ཀའི་མཐའ་མེད་པའི་རྒྱལ་སྲིད་ནང་དུ་འགྲོ་བར་ཕུན་སུམ་ཚོགས་པའི་བདེ་ལམ་གནང་བར༌འགྱུར་རོ།། 
དེ་བས་ན་ཁྱོད་ཅག་གིས་དོན་འདི་རྣམས་རྟོགས་ཤིང་ཁྱོད་ཅག་ལ་སྔར་ནས་ཡོད་པའི་བདེན་པ་ཉིད་ཀྱི་ཆ་ནས་བརྟན་པོ་ཡིན༌ཡང་། བདག་གིས་རྒྱུན་དུ་དོན་འདི་རྣམས་ཁྱོད་ཅག་ལ་དྲན་སྐུལ་བྱའོ།། 
ངས་རང་ཉིད་ད་དུང་གུར་འདིའི་ནང་དུ་བསྡད་ཡོད་པའི་གོ་སྐབས་དང་བསྟུན་ནས། ཁྱོད་རྣམས་ལ་དྲན་སྐུལ་བརྒྱུད་ནས་སྐུལ་མ་གཏོང་འོས་པར༌སྙམ། 
ཅིའི་ཕྱིར་ཞེ་ན། བདག་ཅག་གི་གཙོ་བོ་ཡེ་ཤུ་མཱ་ཤི་ཀས་བདག་ལ་མཛུབ་སྟོན་གནང་བ་བཞིན། ངས་ཀྱང་རང་ཉིད་གུར་འདི་དང་ཁ་འབྲལ་བའི་དུས་སླེབས་ལ་ཉེ་བ་ཤེས་པའི་ཕྱིར་ཡིན། 
ང་རང་ཚེ་ལས་འདས་རྗེས། ཁྱོད་ཅག་གིས་རྒྱུན་དུ་དོན་འདི་དག་ལ་དྲན་གསོ་བྱེད་པའི་ཆེད་དུ། བདག་གིས་ད་དུང་བརྩོན་པ་ཆེན་པོ་བྱེད༌པའོ།། 
སྔོན་ཆད་ངེད་ཅག་གིས་བདག་ཅག་གི་གཙོ་བོ་ཡེ་ཤུ་མཱ་ཤི་ཀའི་ནུས་མཐུ་ཆེན་པོ་དང་ཁོང་ཉིད་ཕེབས་པར་འགྱུར་བའི་དོན་རྣམས་ཁྱོད་ཅག་ལ་སྨྲས་པ༌ནི། མཁས་པས་སྒྲིགས་པའི་སྒྲུང་བཞིན་དུ་མ་ཡིན་པར། ངེད་རྣམས་ཀྱིས་ཁོང་གི་གཟི་དཔལ་མིག་གིས་དངོས་སུ་མཐོང་བ་ཡིན། 
ཡབ་དཀོན་མཆོག་ནས་ཁོང་ལ་བཀུར་སྟི་དང་གཟི་བརྗིད་ཐོབ་པའི་དུས་སུ། གཟི་འོད་ཆེན་པོ་དེ་ཉིད་ཀྱིས་ཁོང་ལ་ཇི་སྐད་དུ། འདི་ནི་བདག་གི་གཅེས་པའི་བུ་ཡིན་ཞིང་། ང་རང་ཁོ་ལ་ཤིན་ཏུ་དགའ་ཞེས་གསུངས༌པའི་སྒྲ་གྲགས་ཤིང་། 
ངེད་ཅག་ཁོང་དང་མཉམ་དུ་རི་བོ་དམ་པ་རུ་ཡོད་པའི་དུས༌སུ། ནམ་མཁའི་ཞིང་ཁམས་ནས་སྒྲ་དེ་གྲགས་ཡོང་བ་དངོས་སུ་ཐོས༌སོ།། 
བདག་ཅག་ལ་ལུང་སྟོན་པའི་ལུང་བསྟན་དེ་ལས་ཀྱང་ཁུངས་བཙན་ཡོད༌དེ། སྐྱ་རེངས་ཤར་བ་དང་ཁྱོད་ཅག་གི་སེམས་སུ་ཐོ་རེངས་སྐར་ཆེན་ཤར་བའི་དུས་སུ། མུན་ནག་ནང་དུ་སྒྲོན་མེའི་འོད་ཟེར་འཕྲོ་བ་བཞིན། ཁྱོད་རྣམས་ཀྱིས་ལུང་བསྟན་འདིར་གཟབ་གཟབ་བྱས་ན་ལེགས་སོ།། 
དེ་བས་ཀྱང་ཆེས་གལ་ཆེ་བ་ནི་གསུང་རབ་ཀྱི་ལུང་བསྟན་གང་ཞིག་ཡིན་ཡང་། རང་འདོད་ལྟར་འགྲེལ་བཤད་བྱས་ཆོག་པ་གཅིག་ཀྱང་མེད་པ་ཤེས་པར་གྱིས། 
རྒྱུ་མཚན་ནི་ལུང་བསྟན་གང་ཞིག་ཡིན་ཡང་མིའི་འདོད་བློ་ལྟར་བྱུང་བ་གཏན་ནས་མ་ཡིན་པར། དམ་པའི་ཐུགས་ཉིད་ཀྱིས་མི་ལ་བསྐུལ་ཞིང་དཀོན་མཆོག་ནས་བྱུང་བའི་བཀའ་རྣམས་མི་ཡིས་བརྗོད་པའི་ཕྱིར་རོ།།