﻿Zenɛze.
20.
Aɓalaame zeɠeni niima yooi zu, é li ga lɛkpɛmaʋɛ nu yeezazu ʋelei, é zeini Kadɛseni zɔɠɔzuʋɛ ta Suul, é lago zeini Geelaal. 
Aɓalaame a la ɠɛna ɓɔɛa, é lo anzai Sala ʋa, é ɠɛni ɠɛɛzu ma: «Toɠa ga bàazeelai.» Geelaal masagi Aɓimeelɛke Sala zeɠeni. 
Naazu, GALA ge ɠulani kɛlɛma segi zu Aɓimeelɛke ʋɛ kpidii, é ɠɛ ma: «Wɛlɛ, ɗa ʋaazu zaazu, tɔɔzei anzanui naa ná-faa zu, nii è seɠeai, mazɔlɔɔ zini ka bɛ.» 
Aɓimeelɛke la ɠɛni dɛ daani ʋolu, é gooɠaaʋoteni, é ɠɛ: «Màliɠii, ɗa sɔbalala nuiti paa ɓaa? 
Sinigi ɓɔɠɔi lɛi kɛai mà: ‹Bàazeelai ʋe?› Ta anzanui ɓɔɠɔi ɓalaa bogɛ ga: ‹Dìɛi ʋe?› Gè kɛɛʋɛ kisiɛ ʋagɔi zu, ta sɔbalalai zu.» 
GALA ge ɠɛni ma segi zu: «Gè kwɛɛ gè ɠɛ è kɛɛʋɛ zii ʋagɔlai zu, naa ɠa é kɛa gè pele ɓesagai è luɠɔ ga è mina koto ɠɛ dàalɔɠɔma. Naa ɠa é ba, gè la vaani bu ga è ʋa da ʋolu. 
Niizu zunui nii anzai ve zea, mazɔlɔɔ toɠa ga GALA goo wo nui. Toɠa maanɛɛnɛi wo è ʋɛ, ɗa yɛ vulua. Kɛlɛ ni è la teʋeni pɔ, suɠwɛɛ ga ɗa za, ɗa-o, ɗa-nuɓusɛiti-yo.» 
Aɓimeelɛke wuzeɠeni sobuzobui, é ná-botiɠɛ nu wolaiti toli, é naama vaiti pɛ bo ti ma, ti wola luani. 
Aɓimeelɛke Aɓalaame ɓalaa tolini, é ɠɛ ma: «Lee ɠa è kɛai ga giye? Kotoi ɓɛgele ɠa gè kɛai è laalɔɠɔma, nà-o, nà-masadai-o, è gi lɔai kotoi nii zu? È ziɛ ʋelei é lo nɔ̀un ba, nu maa la nɛɛni ga é ʋa naa ɠɛ.» 
Aɓimeelɛke ɠɛni Aɓalaame ma: «Leeni ɠa é ɠɛa è ɠisu, è niima vai ɠɛai?» 
Aɓalaame gooɠaaʋoteni, é ɠɛ ma: «Gè ɠɛni ɠisiɛzu, gè ɗa ɠɛ ɓɔɠɔ ma, zeɠema nɔpɛ ge la ba, ta ʋaazu pàazu ànzai vai zu, tɔɔzei GALA gaazuluaba ɠila kpalaa ge la niima yooi zu. 
Gaama ʋe, toɠa ga bàazeelai, é ga kɛ̀ɛ ná-doun anzanui, kɛlɛ dèe ná-doun anzanu laade. Toɠa ga ànzai. 
Siɛgi zu GALA ge kɛ̀ɛni la ga teʋeteʋe nu, gè ɠula kɛ̀ɛ ná-pɛlɛyeɠei wu, gè ɠɛni Sala ma: ‹Ʋɛ nɔpɛ de liizu ná, kɛni è ɗa màalobo, è ɗa ɠɛ ti ma: Dìɛi ʋe.› » 
Aɓimeelɛke toganii tanigaa zoni baalagiti saama, ta boliiti, ta nikɛiti, é ti ve Aɓalaame ya, é pɛɛ botiɠɛ zunuiti ba, ta botiɠɛ anzanuiti. É anzai Sala ɓalaa teʋeni pɔ. 
É ɠɛni ma: «Nà-zooi laalaogɛ è luɠɔ, zei ʋɛ nɔpɛ ná nɛɛzu è ʋɛ.» 
É ɠɛni Sala ma: «Gè wali ɠaei waagila (1 000) fea è-liɛ ya, é ɠɛ ga poogi ga è la ga sɔba nu niima vaiti su, è-maaɠoolii zu nuiti gaazu.» 
Aɓalaame GALA falini. GALA ge Aɓimeelɛke ɠɛdɛni, ta anzai, ta ná-botiɠɛ anzanuiti, ti zooni ti ɗa dointi sɔlɔɔ ʋolu. 
Mazɔlɔɔ Ɠɔoɠɔ GALAGI Aɓimeelɛke ná-pɛlɛyeɠei wu anzanuiti pɛ kɛɛni ga doun zɔlɔɔtala nuiti, Aɓalaame anzai Sala ná-faa zu. 
