﻿Zenɛze.
39.
Ti yeini ga Zozɛfe Ezipete yooi zu. Ezipete nui Pɔtifaal, masagi Falaɠɔn makɛ nuiti ta-ɠundiɠii, naa ɠa é Zozɛfe ɠeyani Isemayɛle nuiti ma. 
Ɠɔoɠɔ GALAGI ɠɛni Zozɛfe ʋa, naa maaʋele ma, é ɠɛni undaanɛɛi zɔlɔɔsu naa kpein su, nii é ɓena kɛ. É ɠɛni maliɠii Ezipete nui ná-pɛlɛi wu. 
Naa pɛtɛni ga Ɠɔoɠɔ GALAGI ɠa tɔun ba, nii nɔpɛgi é ɠɛni kɛɛzu, Ɠɔoɠɔ GALAGI ɠɛni naa ɓɛtɛzu zeema. 
Zozɛfe zaalai zɔlɔɔni maliɠii ɠaazu, é dɔɔni ná-botii zu, é sei ná-pɛlɛi unda. Nii kpein é ɠɛni zea, é naati kalivaani ma. 
É zo naama voloi ma, Pɔtifaal seiɗai ma ná-pɛlɛi unda, ta nii kpein é ɠɛni zea, Ɠɔoɠɔ GALAGI tuya looni Ezipete nui Pɔtifaal ná-pɛlɛi ʋɛ, Zozɛfe maaʋele ma. Ɠɔoɠɔ GALAGI ná-tuyai ɠɛni zeaɠɔligiti kpein ba, é ɠɛni ga pɛlɛi wu, ɓaa kpalagaʋɛti. 
Niiti kpein ti ɠɛni ga zeaɠɔli, é ti yɛni Zozɛfe yeezu, é la mɔ ɠɛni faa ɠili kɛɛzu, kɛni é ná-daamianigi zeɠe nɔ. Zozɛfe ɠɛni ga zaalamai gola ʋagai. 
Naama vaiti pɛɛ poluma, Zozɛfe maliɠii anzai ɠaazuɠulani ba, é ɠɛ ma: «Laa ga ze.» 
É ɠɛlɛni, é ɠɛ maliɠii anzai ma: «Pɛlɛi wu vai leʋe ga kɔɠɔ felegɔ, màliɠii la faa nɔpɛ kwɛɛ ta zu, é ti pɛ zɛgɛ zèe zu. 
É la wɔɔlɔni nɔ̀un ba niima ʋɛlɛi wu, é la tɔ seini faa nɔpɛ ma, kɛni ɗa nɔ, tɔɔzei ɗa ga anzai. Nà naama vaa ɲɔu wolai ɠɛɛzu ɠale, gè koto zeɠe GALA daalɔɠɔma?» 
Folo-o-folo é ɠɛni ɓɔizu Zozɛfe la, é ɗa faa ɠilagi nɔ wo ma, kɛlɛ naa la ɠɛni woilosu ta ma, é ɠɛlɛni ná-dakoba vai ʋa, ga a ʋa ʋilɛ polu. 
Foloi ta, Zozɛfe ʋaani, é lɛ pɛlɛi wu, ga é ná-botii ɠɛ. Nu nɔpɛ ge la ɠɛni ná, pɛlɛi wu nuiti su. 
É soni ná-seɠei ʋa, é ɠɛ ma: «Laa ga ze!» Zozɛfe ná-seɠei yɛni zea, é ʋela, é ɠula etea ʋelei. 
Siɛgi zu é kaani la ga naa ná-seɠei yɛga zea, é ʋela, é li ga etea ʋelei, 
é ná-pɛlɛ wu nuiti tolini, é ɠɛ ti ma: «Sìnigi ʋaa ga Eɓulu nui ade ʋɔ, é ɗa ɓaaɠula ade ma. Paaʋɛ pɔ̀, é ɠɛ é la ga ze, kɛni kpàingai. 
Siɛgi zu é kaai la ga gè wooɠula ga kpeei, é ná-seɠei yɛgɛ ʋuuni kòbaʋɛ, é ʋela, é li ga etea ʋelei.» 
É Zozɛfe ná-seɠei yɛni ɠobaʋɛ, eyɛsu sinigi ʋaa pɛlɛi wu. 
É faa ɠilagi nɔ woni ma, é ɠɛ ma: «Eɓulu nui é ga duɔi, nii è ʋaai la ade ʋɔ, paaʋɛ pɔ̀ ga é ɓaaɠula mà. 
Kɛlɛ tɛi gè wooɠulaai ga kpeei, é ná-seɠei yɛgɛ kòbaʋɛ, é ʋela, é li ga etea ʋelei.» 
Kpegai ma ga anzai ɓɔɛ wooiti mɛni, é ɗa ɠɛ ma: «Wɛlɛna, naa ɠa ɗa-luɔi kɛa,» Zozɛfe maliɠii wola yiiɠaawanani. 
É Zozɛfe zoni, é pili kasoi ɠa, ʋɛ masagi ná-kasoɠa nuiti ti makɛni ná. Miná ɠa Zozɛfe ɠɛni ná kasoi ɠa. 
Ɠɔoɠɔ GALAGI ɠɛni Zozɛfe ʋa, é wooɠɛɠiladai ɠɛ bɛ, nii a kɛ naa zaalai zɔlɔɔ kaso ɠundiɠii ya. 
Kaso ɠundiɠii kasoɠa nui zɔiti kpein kalivaani Zozɛfe ma. Faa nɔpɛ ge la ɠɛni ɠɛɛzu tɔun polu. 
Kaso ɠundiɠii la mɔ ɠɛni wɛlɛzu naama vai tanɔpɛ ma, nii é ɠɛni ɠɛɛzu Zozɛfe yeezu, mazɔlɔɔ Ɠɔoɠɔ GALAGI ɠɛni ba. É vaani bu, naa pɛ suɓɛtɛ, nii é ɠɛni kɛɛzu. 
