﻿Zenɛze.
42.
Zakɔɓe kaai ma ga moloi ɠa Ezipete yooi zu, é ɠɛni ná-doun zunuiti ma: «Lee vaa zu wo wɛlɛzu ɓɔɠɔ ʋa wo ɠilagilagi? 
Gè mɛnigɛ ga moloi ɠa Ezipete yooi zu. À yei, wo ta ɠeya ná ade ʋɛ, nii a kɛ ade yɛ vulua, ade mina za.» 
Zozɛfe kɛɛɠɛloun puugɔiti ti yeini Ezipete yooi zu molo ɠeyazuʋɛ. 
Zakɔɓe la ɠɛni Zozɛfe deɠei Ɓɛnzamɛn ʋilɛni ti ʋolu, é ɠɛni luazu ga faa ɲɔu mina ɠɛ la. 
Izelayɛle ná-doun zunuiti ti ɠɛni zɔiti saama, niiti ti yeini molo ɠeyazuʋɛ, mazɔlɔɔ pului ɓɔini Kanaan yooi zu. 
Zozɛfe ɠa é ɠɛni devei wosu zooi zu ná kpein. Tɔ ɠa é ɠɛni moloi ʋɔdizu nuɓusɛi kpein ma. Zozɛfe kɛɛɠɛleaiti ti ʋaani, ti nɔkɔ bu, ti unpilɛ zooi ma. 
Zozɛfe kɛɛɠɛleaiti kaani. É ti ɠwɛɛni, kɛlɛ é ɓɔɠɔ ɠɛɛni, eɠɛ é la ti ɠwɛɛ. É la ɠɛni ɓɔɛni ti ʋɔ fɔɔn, é ɠɛni ti ma: «Mini ɠa wo zeɠeai ná?» Ti gooɠaaʋoteni, ti ɠɛ ma: «Gá zeɠezu Kanaan yooi zu, gi ʋaaʋɛ daamiani geyazu.» 
Zozɛfe kɛɛɠɛleaiti kwɛɛni, kɛlɛ tiya mu ti la ɠɛni tɔun kwɛɛni. 
Zozɛfe ɠigi looni segiti su, é boni, é ʋilɛ ti ʋa. É ɠɛni ti ma: «Wa ga nɛnɛgiti! Wo ʋaaʋɛ ga wo zooi ná-zobotalazuʋɛti sumɔ.» 
Ti gooɠaaʋoteni, ti ɠɛ ma: «Ɓa-o, màliɠii, gɛi gi ga ɗa-wotiɠɛ nuiti, gi ʋaaʋɛ nɔ ga gi molo ɠeya. 
Gi kpein gá nɔ ga zunu ɠila kpegi ná-doun zunuiti, gá ga sɔɓelama nuiti, ɗa-wotiɠɛ nuiti gi la ga nɛnɛgaa nɔ.» 
É ɠɛni ti ma: «Kpele-o, wo ʋaaʋɛ zooi ná-zobotalazuʋɛti sumɔsu nɔ.» 
Ti gooɠaaʋoteni, ti ɠɛ ma: «Ɗa-wotiɠɛ nuiti gá ga kɛɛɠɛloun puugɔ maazu felegɔ (12), zunu ɠila kpegi ná-doun zunuiti Kanaan yooi zu. Loungo gelei, naa yɛgɛ gi-ɠɛɛ ʋɔ bɛ za, gila ge ɠɛni ná, naa la mɔ vulua.» 
Zozɛfe ɠɛni ti ma: «Naa mu ka gè bosu wo ma, gè ɠɛ, wa ga nɛnɛgiti. 
Wɛlɛ, ʋelegi gè ʋaazu wo ʋoluɠulazu la. Nà ɠonazu Falaɠɔn ma, nii é vulua, wo la ɠulazuʋɛ ɲɛgɛlɛin, ni wo-leɠei la ʋaani ʋɛ. 
Wo zaama, à gila teʋe, é li, é ʋa ga wo-leɠei. Wa ma, wo yɛ kasoi ɠa eyɛsu wo ɓɔɛ wooiti poluɠula, nà kwɛɛ ni gaamai ɠa wo bosu. Ni naa laade, gè ɠonaa Falaɠɔn ma, nii é vulua, wa ga nɛnɛgiti.» 
É ti kpein dɔɔni ʋɔɔma kasoi ɠa folo saʋagɔ laawu. 
Foloi zaʋasiɛi ma, Zozɛfe ɠɛni ti ma: «Nɔ̀un nà luazu GALA ba. Nii gè bosu wo ma, à naa ɠɛ, wa zɛnvui wo. 
Ni wa ga sɔɓelama nuiti, wo-ɠɛɛloin ta yɛ kasoi ɠa, ʋɛ wo ná, wɔun, wo li ga moloi, wo wa-ʋɛlɛyeɠeiti kɔnɔkula la, 
naa ʋolu wo ʋa pɔ̀ ga wo-leɠei, naa ɠa a kɛ wa-ɓɔɛiti poluɠula, wo mina za.» Ti yeezeini naa wu, ti naa ɠɛ. 
Ti ɠɛni ɠɛɛzu ɓɔɠɔ ma: «Ungo, ade ɠɛɛʋɛ ga sɔba nu de-leɠei letegi, mazɔlɔɔ de ná-ziizoolɛi ɠaani, siɛgi zu é ɠɛni de maanɛɛnɛzu la, de la ɠɛni woiloni ma ɲɛgɛlɛin! Naa ɠa é kɛa niima maanɔɠɔ vai zeelia ade ma la.» 
Luɓɛn kpɔɛi zeɠeni, é ɠɛ ti ma: «Gè la ɠɛni bosu wo ma ɓaa, ga: ‹À mina ɲama ɠula gaazu vaa ɠɛ ga doungoi nii?› Kɛlɛ wo la ɠɛni woiloni gòo ma ɲɛgɛlɛin. Ma ɲamai ɠa niizu maaɠaazaɠa ge wosu de ma.» 
Ti la ɠɛni suɠwɛɛ ga Zozɛfe ɠa gaaɠaazu, mazɔlɔɔ é ɓena daawooleʋe nui ɠɛ ti yɔɠɔzu. 
Zozɛfe maaɠoozani ti ʋa, é li, é lo, é ɗa wɔlɔ. É ʋaani ʋolu, é ɓɔɛ ti ʋɔ, é Simiyɔn ɠulani ti zaama, é gili ti ɠaazu. 
Zozɛfe deveni ga ti ta-ɓɔlɔiti daave ga moloi, ti ɛsɛ ná-walii la ná-ɓɔlɔi zu, ti daamiani fe ti ya, ta mi pelei zu. Naa ɠa ti kɛɛni. 
Ti ta-zoovalegiti kasɔɠilini ga moloi, ti li. 
Ti taɠila ge ná-molo ɓɔlɔi laalaoni ga é daamianigi ve ná-soovalegi ya, ʋɛ ti ɲiini ná, é wɛlɛni, é ná-walii ɠa ná-ɓɔlɔi laaʋɛ. 
É ɠɛni kɛɛɠɛleaiti ma: «Nà-walii ɠaaɠalegɛ ma ʋolu, wɛlɛ lɛɛ ba nà-ɓɔlɔi zu!» Ti ɠoozuʋilini, ti ɗa lua, ti ɗa ɠɛ ɓɔɠɔ ma: «Leeni ɠa GALA ge kɛa ga adeye?» 
Ti zeelini ti-ɠɛɛ Zakɔɓe ʋɔ bɛ, Kanaan yooi zu. Ti naa kpein suɠulani ma, nii é ɠɛni ga tiye. 
Ti ɠɛni ma: «Zunui nii é ga zooi maliɠii, kpɔɛʋɛ gi ʋɔ ga ɲɔuɗa, é gi zogɛ, eɠɛ gá ɠɛ ga nɛnɛgiti. 
Gi ɠɛɛʋɛ ma: ‹Gá ga sɔɓelama nuiti, gi la ga nɛnɛgaa. 
Gá ga kɛɛɠɛloun puugɔ maazu felegɔ (12), gi pɛɛ ga kɛɛɠɛi ma. Gilagi la mɔ ná, doungo gelei ɠa gi-ɠɛɛ ʋɔ bɛ za, Kanaan yooi zu.› 
Zunui naa é ga zooi maliɠii, kɛɛʋɛ gi ma: ‹Pɛtɛ ʋelei nà kwɛɛ da ga wa ga sɔɓelama nuiti. À wo-ɠɛɛloin gila zɛ kòba. À daamianigi zeɠe wa-ʋɛlɛyeɠeiti faa ma. Tɔɔzei pului ɓɔiʋɛ. 
À li, wo ʋa ga wo-leɠei pɔ̀. Nà kwɛɛ ga naa maaʋele ga wo la ga nɛnɛgaa, kɛlɛ wa ga sɔɓelama nuiti. Nà wo-ɠɛɛloin ve wo ya, wa zoo wo ziɛziɛ zooi zu, maaɠili la ɠɛa wo ma.› » 
Siɛgi zu ti ta-ɓɔlɔiti suwoni da, ɛsɛ ná-wali ɓuun ge ɠɛni laani ná-ɓɔlɔi zu. Tiya-o, ti-ɠɛɛ-o, ti wɛlɛni, ti ta-wali ɓuungi ɠa, eyɛsu ti ɗa lua. 
Ti-ɠɛɛ Zakɔɓe ɠɛni ti ma: «Wa bàlasu dòinti ma! Zozɛfe la mɔ ná, Simiyɔn la mɔ ná mɔnɔ, wa ga Ɓɛnzamɛn zeɠe mɔnɔ, wo lii la! Nà nɔ ɠa naa kpein ge yɛsu ga ze.» 
Luɓɛn ɠɛni kɛɛɠɛ ma: «Ɗa dòun zunu felegɔiti paa, ni gè la ɠaleni ma è ʋɔ ga Ɓɛnzamɛn. Kaliva mà, nà ɠale ma la, gè ʋaa la è ʋɔ.» 
Zakɔɓe ɠɛni ma: «Ɓa-o! Wo la lia ʋɔɔma pɛ wa dòun zunui, mazɔlɔɔ diɛ zunui zaa, tɔ ɠila kpe nɔ ɠa é zèa niina. Ni faa ɲɔu a maazɔlɔɔna siɛi zu, wo la ʋaazu bosu, wa nɔ̀undeɠa ɠolegiti zeizu gɔvɛalaazu soolɛi zu.» 
