﻿Ɛgezɔde.
14.
Ɠɔoɠɔ GALAGI ɓɔɛni Moize ʋɔ, é ɠɛ ma: 
«Ɓɔɛ Izelayɛle nuiti pɔ ga ti ɠale ma, ti ʋu Pi-Ɠaɠilɔte ɠakalaʋɛ, Migedɔle ta kpoloɗɛi ti yɔɠɔzuʋɛ, Ɓaale-Sefon letemaʋɛ. Naama adaʋɛ letemaʋɛ ɠa wa ʋu ná, kpoloɗɛi ɠobaʋɛ. 
Falaɠɔn ɠa ʋaazu ɠɛɛzu ma: ‹Izelayɛle nuiti ti loa ya zooi zu, teʋebai ti maaɓɔɔlega.› 
Nà Falaɠɔn ɠigi ɓaazu, toɠa ʋaazu ʋilɛsu ti ʋolu, kɛlɛ nà ʋaazu lɛbiyai zɔlɔɔsu ga Falaɠɔn ta ná-kɔɔʋɛbɛi maaʋele. Ezipete nuiti ta kwɛɛ ga nà ga Ɠɔoɠɔ GALAGI.» Izelayɛle nuiti ti kɛɛni ɠana nɔ. 
É woni Ezipete masagi ma ga Izelayɛle nuɓusɛiti ti ʋela. Názu ɠa Falaɠɔn ná-kisiɛi ta ná-botiɠɛ nuiti ta-ɠisiɛi latini la, é lo nuɓusɛiti ta-vai ʋa. Ti ɠɛni ma: «Leeni ɠa ade kɛai, ga de ɓe fai Izelayɛle nuɓusɛiti ba, ti li, da-wotiiti ti la mɔ ɠɛa?» 
Falaɠɔn ná-wotoloi ɠɛʋele ɓɛtɛni, é ná-kɔɔʋɛbɛi ʋilɛ ʋolu. 
É wotolo ɓiin gola undɔzita (600) zeɠeni ta Ezipete wotoloiti kpein, kɔɔɠɔ nuiti ti ɠɛni ti zu ga nu zaʋasaʋagi. 
Ɠɔoɠɔ GALAGI Ezipete masagi Falaɠɔn ɠigi ɓaani, Falaɠɔn ʋilɛ Izelayɛle nuiti polu. Izelayɛle nuiti ti ɠulani ga zɛbɛi. 
Ezipete nuiti ti ʋilɛni ti ʋolu, sooiti kpein, ta Falaɠɔn ná-wotoloiti, ta ná-soo ɓizɛ zalaʋusuiti, ta ná-kɔɔɓɔgi, ti zeelini ti ma, názu ti ʋuuni kpoloɗɛi ɠobaʋɛ, Pi-Ɠaɠilɔte ʋele, Ɓaale-Sefon letemaʋɛ. 
Falaɠɔn ɠɛni maaɓuɠazu ti ʋa. Izelayɛle nuiti ti ɠaazuwuzeɠeni, wɛlɛ Ezipete nuiti ba, ti ʋaazu ti ʋolu ʋelei. Izelayɛle nuiti ti wola luani, ti kpeei looni, ti wooɠula Ɠɔoɠɔ GALAGI ma. 
Ti ɠɛni Moize ma: «Kabayeɠea ti la Ezipete yooi zu ɓaa, è ʋaazu ga giye ga gi za teʋebai zu? Lee ɠa è kɛai ga giye, è ɠulazu ga giye Ezipete yooi ʋa? 
Naa laade gi ɓena bo è ma Ezipete yooi zu ɓaa ga: ‹Gi yɛ ná, gi botii ɠɛ Ezipete nuiti bɛ?› Mazɔlɔɔ fizɔgɛ gi ma ga gi botii ɠɛ Ezipete nuiti bɛ, é leʋe gi zaa vai ʋa teʋebai zu.» 
Moize nuɓusɛiti gooɠaaʋoteni, é ɠɛ ti ma: «À mina lua. À yɛ zeini ʋɛ, wo wɛlɛ, ʋelei Ɠɔoɠɔ GALAGI ʋaazu wo ɠizosu la za. Mazɔlɔɔ Ezipete nuiti wo ti ɠaazu za, wo la mɔ ti ɠaa eyɛsu pɛ. 
Ɠɔoɠɔ GALAGI ɠa kɔɔi ɠɔ wo ʋɛ. Wɔun, à ná lɛi tɔɔn.» 
Ɠɔoɠɔ GALAGI ɠɛni Moize ma: «Lee vaa zu è wooɠulazu mà ga kpeei? Ɓɔɛ Izelayɛle nuiti pɔ, ga ti ɗa nɔ li. 
Ɗɔun, ɗa-lukpɔi wuzeɠe, yeemaale kpoloɗɛi ma, è bali su. Izelayɛle nuiti ta lɔɔzu kpoloɗɛi zaamaʋɛ ga ɠɔɠɔa vɔɔi. 
Nɔ̀un nà, nà ʋaazu Ezipete nuiti kigi ɓaazu, ga ti ʋilɛ ti ʋolu. Nà ʋaazu lɛbiyai zɔlɔɔsu Falaɠɔn ta ná-kɔɔɓɔgi ná-faa zu, ta ná-wotoloiti, ta ná-soo ɓizɛ zalaʋusuiti. 
Ezipete nuiti ta kwɛɛ ga nà ga Ɠɔoɠɔ GALAGI, siɛgi zu Falaɠɔn ta ná-wotoloiti ta ná-soo ɓizɛ zalaʋusuiti, ta nà-lɛbiyai ɠulana la kɛlɛma.» 
GALA ná-geezuɠeelai nii é ɠɛni liizu Izelayɛle ʋɛbɛi luɠɔ, naa leʋeni ga ti ʋolu ʋelei. Tonaɓiingi zeɠeni ɓalaa ti ɠakala ʋelei, é li, é lo ti ʋolu ʋelei. 
É loni Ezipete nuiti ta-ʋɛbɛi ta Izelayɛle nuiti ta-ʋɛbɛi ti zɔɠɔzuʋɛ. Tonaɓiingi ɠɛni ga kpidi ɓɔii gilazu ʋelei ʋɛ, ta é ɗa wozaɠala kpidii zu zɔɔla ʋelei ʋɛ. Ti la ɠɛni maaɓuɠani ɓɔɠɔ ʋa ɲɛgɛlɛin kpidii. 
Názu ɠa Moize yeemaaleni la kpoloɗɛi ma, Ɠɔoɠɔ GALAGI kpoloɗɛi ɠaaɠaleni ma kpidii ɲɛgɛlɛin ga folo ɠulazu ʋele viilɛi, nii gola yeeɠaaɓaai. É kpoloɗɛi vɔɔni, ziɛi ʋali su. 
Izelayɛle nuiti ti lɔɔni kpoloɗɛi zaamaʋɛ ga ti-ɠɔɠɔa vɔai. Ziɛi ɠaalɛɛni ba, é ɠɛ ga siɠigi ti-yeezazuʋɛ ta ti-ɠɔʋɛzuʋɛ. 
Ezipete nuiti ti ʋilɛni ti ʋolu kpoloɗɛi zaamaʋɛ ga Falaɠɔn ná-sooiti kpein, ta ná-wotoloiti, naa ʋɛɛ ná-soo ɓizɛ zalaʋusuiti ba. 
Ma ɠeelaalaosuʋɛ sobui, Ɠɔoɠɔ GALAGI yɛni abuzogi ta tonaɓiingi letemaʋɛ, é wɛlɛni Ezipete nuiti ma ɓulugi ʋa, é Ezipete nu ɓulugiti kɛ wuulee. 
É ta-wotoloiti kɔɠɔiti kulani ba, ti ziɛ vai ɓaa. Ezipete nuiti ti ɠɛni ma naazu: «Ade ʋela Izelayɛle nuiti ba, mazɔlɔɔ Ɠɔoɠɔ GALAGI ɠa kɔɔi ɠɔɔzu ti ʋɛ de laalɔɠɔma.» 
Ɠɔoɠɔ GALAGI ɠɛni Moize ma: «Yeei maale kpoloɗɛi ma, ziɛi ɠa ɠaaɠalesu ma Ezipete nuiti ma, ta ta-wotoloiti, ta ta-zoo ɓizɛ nuiti.» 
Moize yeemaaleni kpoloɗɛi ma. Sobui zeelizuʋɛ, kpoloɗɛi ʋaani daazuʋɛ ʋolu. Ezipete nuiti ti ɓizɛni maaɓuɠazuʋɛ ti ʋa, kɛlɛ Ɠɔoɠɔ GALAGI Ezipete nuiti tooni kpoloɗɛi zaamaʋɛ. 
Ziɛi ɠaaɠaleni ma, é wotoloiti maaɓɔɔle, ta soo ɓizɛ zalaʋusuiti, ta Falaɠɔn ná-kɔɔɓɔgi kpein. Niiti ti lɔɔni kpoloɗɛi zaamaʋɛ Izelayɛle nuiti polu ʋelei, gila kpalaa ge la ɠɛni ɠulani. 
Kɛlɛ Izelayɛle nuiti ti ziɛni ga ɠɔɠɔa vɔɔiti kpoloɗɛi zaamaʋɛ. Ziɛi ɠaalɛɛni ba eɠɛ siɠigi, ti-yeezazuʋɛ ta ti-ɠɔʋɛzuʋɛ. 
Naama voloi Ɠɔoɠɔ GALAGI Izelayɛle ɠizoni, é kula Ezipete nuiti zea. Izelayɛle Ezipete nuiti ma ʋoomaiti kaani laani kpoloɗɛi laaʋɛ. 
Izelayɛle Ɠɔoɠɔ GALAGI ná-zeeɠaaɓaai ɠaani, é kɛɛni Ezipete nuiti daalɔɠɔma. Nuɓusɛiti ti luani Ɠɔoɠɔ GALAGI ʋa. Ti ɠidaaleʋeni Ɠɔoɠɔ GALAGI ma, ta ná-botiɠɛ nui Moize. 
