﻿Ɛgezɔde.
15.
Názuʋɛ, Moize ta Izelayɛle nuiti ti niima wuyei looni Ɠɔoɠɔ GALAGI ʋɛ, ti ɠɛ ma: «Nà guyei loozu Ɠɔoɠɔ GALAGI ʋɛ, mazɔlɔɔ é ná-fɔnifaamai ɠulaʋɛ kɛlɛma, é sooi ta kpizɛ nui ʋiliga kpoloɗɛi wu. 
Ɠɔoɠɔ GALAGI ɠa ga sùvikɛi ta nà-maamusɛ wuyeiti ma ungi, toɠa é ga nà-kizogi. Toɠa ga nà-GALAGI, nà bɔɔlɔ. Toɠa ga kɛ̀ɛ ná-GALAGI, nà maamusɛzu. 
Ɠɔoɠɔ GALAGI ɠa ga kɔɔɠuluɓai. Daaseigi ɠa ga Ɠɔoɠɔ GALAGI. 
É Falaɠɔn ná-wotoloiti ta ná-kɔɔɓɔgi ʋiliga kpoloɗɛi wu, ná-kɔɔɠuluɓa ɠɛzɛiti maaɓɔɔlega Seeli Kpoloɗɛi wu. 
Ziɛ lakpatakpagiti ti ti maaɓɔɔleni, ti yeini ziɛi ɓomaʋɛti eɠɛ kɔtui. 
Ee, Ɠɔoɠɔ GALAGI, è-yeezai maayikiʋɛ ga suvikɛi. Ee, Ɠɔoɠɔ GALAGI, è-yeezai ɠa é è zili nui ɠaayɔni. 
Ee, è ɠaazu unfegi wɔɔlɔʋɛ! Ɗa naati tokasu, niiti ti wuzeɠezu è laalɔɠɔma, ɗa yeeɓesu ɗa-yiiɠaawana wolai ʋa, é ti ɠala eɠɛ kpakui. 
Ziɛi ma ziɠigiti ti loni ga è-zokpa zu viilɛiti maaʋele. Ziɛi ɠaalɛɛni ba eɠɛ siɠigi, paliiti ti ɓaani kpe kpoloɗɛi zaamaʋɛ. 
Sili nui ɠɛni ɠɛɛzu ma: ‹Nà ʋilɛ ti ʋolu, gè ti zo. Nà ta-naavoloi ɠaaɠwɛ, gè ta mi. Nà boɠa zɔkpɔi mɛɛn, gè yeei ʋɛɛ ti ma.› 
È laavuuvuuni, kpoloɗɛi ti maaɓɔɔleni. Ti ɠɛni loozu eɠɛ kena kpui ziɛi wu, ti wola yeeɠaaɓaai. 
Ee, Ɠɔoɠɔ GALAGI, ɓɛ ɠa é ga è ɠɛʋele galagiti saama? Ɓɛ ɠa é ga è ɠɛʋele, maayikiai ɲadedai zu, ɠaazu unfegi bɛ, maamusɛi zoloogai ma, é laavɔɔ vaiti kɛɛzu? 
È yeezai maaleni nɔ, zooi gi ɓɛɛ nuiti kpɔle. 
Nuɓusɛiti é ti unmɔɔni, è loni naati tuɠɔ ga ɗa-wooɠɛɠiladai, ɗa losu ti luɠɔ ga è-zuvikɛi, è li ga tiye è-zeizu ɲadegai. 
Nuɓusɛiti ti mɛnini, ti zuɓali, dualuagi Filiseti nuiti soga. 
Edɔme ɠundiɠiiti sasu ɠa ɓalizu, sasuɓalii Moaɓe ɠɔɔɠuluɓaiti soni, Kanaan zei wo nuiti dɔtɔzuleʋea. 
Maalua vai ta dualuagiti ta zeeli ti ma. È-yeelokoi ná-bɔɔlɔi maaʋele ma, ta ɠɛɛzu ga ɓoɓoiti eɠɛ kɔtui, ee, Ɠɔoɠɔ GALAGI, eyɛsu ɗa-nuɓusɛiti ti leʋe, ɗa-nuɓusɛiti è ti ɠeyaai. 
Ɗa liizu ga tiye, è ti zei ɗa-ɠizei ma, ee, Ɠɔoɠɔ GALAGI, adaʋɛ è ná ɓɛtɛa ga è-zeizuʋɛ, ee, Maliɠii, seizu ɲadegai, nii è-yeeiti ti kpɛtɛni. 
Ɠɔoɠɔ GALAGI ɠa masadai ɠɛɛzu eyɛsu ɠɔ.» 
Mazɔlɔɔ Falaɠɔn ná-sooiti, ta ná-wotoloiti ta ná-soo ɓizɛ zalaʋusuiti ti lɔɔni kpoloɗɛi zaamaʋɛ. Ɠɔoɠɔ GALAGI kpoloɗɛi ɠaaɠale ma ti ma, kɛlɛ Izelayɛle nuiti ti ziɛni ga ɠɔɠɔa vɔɔi kpoloɗɛi zaamaʋɛ. 
Miliyame é ga GALA goo wo anzanui, Aalɔn baazeelai, tamadegi zeɠeni. Anzanuiti kpein ti ʋilɛni polu ga tamadegiti, ti ɗa kuai wo. 
Miliyame ɠɛni guyei laazosu, é ɗa ɠɛ ma: «À guyei loo Ɠɔoɠɔ GALAGI ʋɛ, mazɔlɔɔ é ná-bɔɔlɔlai ɠula kɛlɛma, é sooi ta kpizɛ nui ʋiliga kpoloɗɛi wu.» 
Moize liini ga Izelayɛle nuiti, ti zeɠe Seeli Kpoloɗɛi ʋɔ bɛ. Ti Suul teʋebai zu ʋelei zeɠeni, ti ziɛni teʋebai zu ga folo saʋagɔ, ti la ɠɛni ziɛ ɠaani ɲɛgɛlɛin. 
Ti zeelini Mala, kɛlɛ ti la ɠɛni zooni, ti ʋa Mala ɗɛi ta ɓɔle, tɔɔzei é wanani. Naa ɠa é kɛɛni, naama laaseigi ʋɛɛni ba ga Mala (nii poluʋɛ ga «wanaʋɛ»). 
Nuɓusɛiti ti zelii loni Moize ma, ti ɠɛ ma: «Leeni ɠa gá kpɔle?» 
Moize wooɠulani Ɠɔoɠɔ GALAGI ma. Ɠɔoɠɔ GALAGI gului ta lɛɛni la. É ma ɓuɠai ta ʋilini ziɛi wu, ziɛi nɛɛni. Miná ɠa Ɠɔoɠɔ GALAGI tɔgiti ta deveiti feeni ná-nuɓusɛiti zea ná. Miná ɠa é ti ʋoluɠulani ná. 
É ɠɛni ma: «Ni wa woilona gòo ma ga pagɔ, nɛ̀i gè ga Ɠɔoɠɔ GALAGI wa-ƓALAGI, ni wa naa ɠɛɛna, nii sɔlegai gàazu, ni wa woilona nà-deveiti ma, ta ni wa nà-tɔgiti kpein sona, gè la seeɓɛiti taɠila kpalaa pɛa wo ʋa, nii gè pɛɛni Ezipete nuiti ba, mazɔlɔɔ nà ga Ɠɔoɠɔ GALAGI, nii é wo ɠɛdɛsu.» 
Ti zeelini Elime, ʋɛ ziɛun puugɔ maazu felegɔ (12) ɠɛni ná, ta dɔɔ wulu ʋuulɔfela (70). Ti ʋuuni miná ziɛlaʋɛ. 
