﻿Leevi.
12.
Ɠɔoɠɔ GALAGI ɓɔɛni Moize ʋɔ, é ɠɛ ma: 
«Ɓɔɛ Izelayɛle nuiti pɔ, è ɠɛ ti ma: Siɛgi zu anzanui a kogi zeɠena la, é doun zunu zɔlɔɔ, toɠa ɠɔzɔ folo lɔfela laawu. Toɠa ɠɔzɔ eɠɛ ná-alu kaa ziɛgi ma yeeɠɛɠalai. 
Foloi lɔsaʋasiɛi ma, doungoi ɠa lati pɛlɛʋolu. 
Toɠa yɛ dɛ mɔnɔ ɓɔɠɔ ɲadesu folo ʋuusaʋagɔ maazu saʋagɔ (33) laawu, ná-ɲamai vaa zu, é mina vɔɔɠu ani ɲadega ɠila kpalaa ba, é mina li seizu ɲadegai, eyɛsu ná-ɲade foloiti daazeeli. 
«Ni a anzanu loun zɔlɔɔna, kɔzɔai ɠa yɛ de dɔɔɠɔ felegɔ laawu, eɠɛ ná-alu kaa ziɛgi ma yeeɠɛɠalai. Toɠa yɛ ɓɔɠɔ ɲadesu folo ʋuulɔzita maazu lɔzita (66) laawu. 
«Siɛgi zu ná-ɲade foloiti daazeelizu la, zunu loin ná-faa zu, ɓaa anzanu loin ná-faa zu, toɠa ʋa ga kona gila baala ziʋoi zalaɠa ɠula nui ʋɔ, GALA daaɠomi seɠe ʋɛlɛi laaʋɛ, ga é kɛ ga gala zalaɠai, ta poopo kpokpa gila, ɓaa kpumago ɠila, é kɛ ga koto gba zalaɠai. 
Zalaɠa ɠula nui ɠa ti ɠula Ɠɔoɠɔ GALAGI ɠaazu, é koto gba vai ɠɛ bɛ. Toɠa ɲade naama ɲama ɠula ba vai ma kɛai la. Tɔgi ɠana anzanui ná-faa zu, nii é zunu loin zɔlɔɔsu, ɓaa anzanu loin. 
Ni ani la nu ya, a baala ziʋoi zɔlɔɔ da, toɠa kpumago felegɔ zeɠe, ɓaa poopo kpokpa felegɔ, gilagi ɠa ɠɛ ga gala zalaɠai, zɔi ɠɛ ga koto gba zalaɠai. Zalaɠa ɠula nui ɠa koto gba vai ɠɛ bɛ, toɠa ɲade.» 
