﻿Gaalu Sɛʋɛi.
34.
Ɠɔoɠɔ GALAGI ɓɔɛni Moize ʋɔ, é ɠɛ ma: 
«Devei nii ve Izelayɛle nuiti zea, è ɠɛ ti ma: Siɛgi zu wo ʋaazu lɛɛzu la Kanaan yooi zu, wɛlɛ zooi ʋa, nii é ʋaazu veezu wo ya ga wɔnɔ, Kanaan yooi, é ʋɛɛ ná-kwɛpelegiti ba. 
Lɛkpɛmaʋɛ nu yeezazuʋɛ, wa-you ɠwɛgi lɔɔ ɠa zei Sin teʋebai zu, é lɛ ga Edɔme yooi zakpai. Folo ɠulazu ʋelei, wo-ɠwɛgi sogai lɛkpɛmaʋɛ nu yeezazuʋɛ, naa ɠa liizu, é lo Kpoloɗɛ Wanai ʋa, 
wo-ɠwɛgi zu ɠa ɓilisu gize yɔɠɔzuʋɛ Akelaɓime, lɛkpɛmaʋɛ nu yeezazuʋɛ, é leʋe ga Sin ʋele, é zeeli Kadɛse-Ɓaalenea, lɛkpɛmaʋɛ nu yeezazuʋɛ. É li ga Ɠasaal-Adaal ʋele, é leʋe ga Asemon ʋele, 
é zo Asemon, é lati, é li, é zeeli Ezipete ɠɔtuɗɛi ma, é ʋilɛ Kpoloɗɛ Wolai ʋa. 
«Wa-ɠwɛpelemaʋɛ é folo liizu ʋelei, naa ɠa ɠɛ ga Kpoloɗɛ Wolai. 
«Wɛlɛ nii é ɠɛɛzu ga wa-ɠwɛpelemaʋɛ lɛkpɛmaʋɛ nu ɠɔʋɛzuʋɛ, é zo Kpoloɗɛ Wolai ma, wa kwɛgi la, eyɛsu é zeeli Ɠɔɔl gizei ma. 
Wa ɠwɛgi la, é zo Ɠɔɔl gizei ma, é li Leɓo-Ɠamate, é ʋilɛ Sedade ʋa, 
é zo miná, é li ga Zifelon ʋele, é li, é ʋilɛ Ɠasaal-Enan ʋa. Lɛkpɛmaʋɛ nu ɠɔʋɛzu ʋele ɠwɛpelegi ɠana. 
«Wa ɠwɛpelemaʋɛ leʋe ba folo ɠulazu ʋelei, é zo Ɠasaal-Enan, é li Sefame ʋele, 
é zo miná, é yei Liɓela, Ayɛn folo ɠulazu ʋelei, kwɛpelemaʋɛ ɠa yeizu, é ʋilɛ Kineelɛte ɓoloɗɛi ʋa, folo ɠulazu ʋelei, 
é yei mɔnɔ ga ziɛ wolai Zuludɛn, é ʋilɛ Kpoloɗɛ Wanai ʋa. Wa-yooi ɠwɛgiti kana.» 
Moize Izelayɛle nuiti kalani ga niima vaiti, é ɠɛ ti ma: «Zooi ɠana nii wo ʋaazu gaaɠwɛɛzu ga kpakutoomai, Ɠɔoɠɔ GALAGI devea ga é ve boloda taaʋuugɔi ta ma lukpɛgi ya. 
Mazɔlɔɔ Luɓɛn nuiti ta-wolodamaiti, eɠɛʋelei ta-ʋɛlɛyeɠeiti ti la, ti ta-yooiti seɠea, ta Gade nuiti ta-wolodamaiti ɓalaa, eɠɛʋelei ta-ʋɛlɛyeɠeiti ti la, Manasee ná-bolodai ɠilazuʋɛ ɓalaagi ná-zooi zeɠea. 
Boloda felegɔi naati ta boloda lukpɛgi, ti tɔnɔi zeɠea Zuludɛn ʋolu ʋelei, Zeeliko letemaʋɛ, folo ɠulazu ʋelei.» 
Ɠɔoɠɔ GALAGI ɓɔɛni Moize ʋɔ, é ɠɛ ma: 
«Wɛlɛ zunuiti daaseigiti ba, ti ʋaazu zooi ɠaaɠwɛɛzu wo yɔɠɔzu: zalaɠa ɠula nui Eleazaal, ta Nun ná-doun zunui é ga Zozuwe. 
Wa bolodama ɠundiɠii ɠilagilagi zeɠe ga ti zooi ɠaaɠwɛ. 
Naama zunuiti daaseigiti ta ga: Zuda ná-bolodai zu, Yefunee ná-doun zunui Kalɛɓe, 
Simiyɔn nɔnɔi, Amiyude ná-doun zunui Samiyɛle, 
Ɓɛnzamɛn nɔnɔi, Kiselon ná-doun zunui Elidade, 
Dan nɔnɔi, Yɔgeli ná-doun zunui Ɓuki é ga kundiɠii, 
Zozɛfe mavofodaiti su, Manasee nɔnɔi, kundiɠii Ɠaniyɛle, Efɔde ná-doun zunui, 
Efelayime nɔnɔi, kundiɠii Kemuwɛle, Sifetan ná-doun zunui, 
Zaɓulɔn nɔnɔi, kundiɠii Elisafan, Paalenake ná-doun zunui, 
Isakaal nɔnɔi, kundiɠii Paletiyɛle, Azan ná-doun zunui, 
Asɛɛl nɔnɔi, kundiɠii Ayiyude, Selɔmi ná-doun zunui, 
Nɛfetali nɔnɔi, kundiɠii Pedaɠɛle, Amiyude ná-doun zunui.» 
Naati ka Ɠɔoɠɔ GALAGI devei veeni ti ya, ga ti Kanaan yooi ɠaaɠwɛ Izelayɛle nuiti zɔɠɔzu. 
