﻿Tɔ Sɛʋɛi Velesiɛi.
10.
Naama ziɛgi zu, Ɠɔoɠɔ GALAGI ɠɛni mà: «Kɔtu ɠokolo felegɔ zaɠa ga ma mɔungiti kɛʋele, è lɛ pɔ̀ bɛ, gizei ma, è kesui ɓɛtɛ ɓalaa ga gului. 
Nà wooiti sɛʋɛzu naama ɠɔtu ɠokologiti ma, wooi niiti ti ɠɛni ma mɔungiti ma, niiti è ti wolowoloni, ɗa ti la kesui zu.» 
Gè kesui ɓɛtɛni ga akasia wului, gè kɔtu ɠokolo felegɔi zaɠani, eɠɛʋelei ma mɔungiti ti ɠɛni la, gè lɛɛni gizei ma, kokolo felegɔiti ti zoni zèa. 
Ɠɔoɠɔ GALAGI sɛʋɛi ɠɛɛni kokolo niinɛiti ma ga ma mɔungiti kɛʋelei, tɔ puugɔiti é ti veeni wo ya gizei ma abui zaamaʋɛ, voloi wo ɠaalɛɛni ba la. É feeni zèa. 
Gè ɠaleni ma, gè gizei yei, gè kokologiti daani kesui zu, nii gè kpɛtɛni. Ti yɛgɛ laani su, eɠɛʋelei Ɠɔoɠɔ GALAGI ma levei veeni la zèa. 
(Izelayɛle nuiti ti zeɠeni Ɓeelɔte-Ɓenee-Yaakan, ti li Mɔseela. Miná ɠa Aalɔn zaani ná, ti maaɠulu. Ná-doun zunui Eleazaal zeini potogi zu ga zalaɠa ɠula ɠundiɠi wolai. 
Ti zeɠeni miná, ti li Gudegɔda, ti zeɠe miná, ti li Yɔteɓata, zooi ʋɛ ziɛi wola mɔinɗai ná. 
Naama ziɛgi zu ɠa Ɠɔoɠɔ GALAGI yiimazeɠeni la ga Leevi ná-bolodai, ga ti ɗa Ɠɔoɠɔ GALAGI ná-minazeɠe kesui zeɠe, ti lo kakala, nii a kɛ ti ná-botii ɠɛ, ti tuya loo nuɓusɛiti bɛ daaseigi zu, naa ɠa ti kɛɛzu zaaɠaza. 
Naa ɠa é ba, Leevi nuiti ti la tɔnɔ zɔlɔɔni la zooi zu ti-ɠɛɛleaiti saama: Ɠɔoɠɔ GALAGI ɠa é ga tɔnɔi, eɠɛʋelei Ɠɔoɠɔ GALAGI wa-ƓALAGI boni la ti ma.) 
Gè yɛni gizei ma, eɠɛʋelei é ɠɛɛni la ma mɔungi, folo ʋuunaanigɔ (40) ta kpidi ʋuunaanigɔ (40). Ɠɔoɠɔ GALAGI gòoɠaaʋoteni mɔnɔ niizu, é zeɠe wo undaaʋili fai ʋolu. 
É ɠɛni mà: «Wuzeɠe, li, è lo niima nuɓusɛiti tuɠɔ. Ti li zooi naa zu, ti seɠe ga tɔnɔ, nii gè ɠonani ti-mɛmɛwolani bɛ ga nà fe ti ya.» 
Niizu Izelayɛle nuɓusɛiti, leeni ɠa Ɠɔoɠɔ GALAGI wa-ƓALAGI pɔ ga wo kɛ bɛ? Toɠa nɔ ga wo lua ba, wo ziɛ ga ná-peleiti kpein, wo nɛɛ ʋɛ, wo dɛbi ga wo-yii pɛ, ta wo-yɛnvui pɛ, 
wo Ɠɔoɠɔ GALAGI ná-deveiti so, ta ná-tɔgiti, gè ti veezu wo ya za, naa ɠa a kɛ wo undaanɛ. 
Wɛlɛ, geeɠɔlɔ sɛbɛlɛ golai maaɠoozaai, naa ɠa ga Ɠɔoɠɔ GALAGI wa-ƓALAGI nɔnɔ, naa ʋɛɛ zooi ta gaa aniiti kpein ba. 
Anɛɛ naa ʋe, wo-mɛmɛwolani nɔ ɠa Ɠɔoɠɔ GALAGI ɠilini ti ʋa, wo ti nɛɛ ʋɛ, ti ʋoluma, wa ʋe wo ga ti-mavofodaiti, wa ɠa é yiimazeɠea ga woye ziiti saama, eɠɛʋelei wo kaazu la za. 
À valibo mu wo-yiimaʋɛ, wo mina ɠɔgi ɓaa ga Ɠɔoɠɔ GALAGI laalɔɠɔma. 
Mazɔlɔɔ Ɠɔoɠɔ GALAGI wa-ƓALAGI ɠa é ga GALAGI nii é galagiti unga, maliɠiiti ti-Maliɠii, GALAGI nii bɔɔlɔai, zeeɠaaɓaai, maayiki, é la zeelɔzɔɠɔzu ɠɛɛzu, é la lobɛani zoga, 
é telebodai ɠɛɛzu podoin ʋɛ, ta poanzai, seikɔɠɔma nui nɛai bɛ, é kɔnɔgi ta seɠei veezu zea. 
À seikɔɠɔma nui nɛɛ ʋɛ, mazɔlɔɔ wo ɠɛni ga seikɔɠɔma nuiti Ezipete yooi zu. 
À lua Ɠɔoɠɔ GALAGI wa-ƓALAGI ʋa, wo ɗa dɛbi, wo ɠili tɔ ɠila kpe nɔ ʋa, wa ɠɛna ɠonaa, wo ɠona daaseigi zu. 
Tɔ ɠa é ga wa-maamusɛi ma ungi, toɠa ga wa-ƓALAGI, toɠa é kɛɛwoti wolaiti kɛa wo ʋɛ, ti maayikiai, wo-ɠaazuʋɛ ti ɠa. 
Wo-mɛmɛwolani ti yeini Ezipete yooi zu, ti liegi ɠɛni ga nu ʋuulɔfela (70), niizu Ɠɔoɠɔ GALAGI wa-ƓALAGI wo ɠɛa ga maamɔin nu, eɠɛʋelei geeɠɔlɔgi ɠaaʋɛ zomideɠaiti ti la. 
