﻿Zozuwe.
13.
Zozuwe ʋɔlɔzaɠani niina. Ɠɔoɠɔ GALAGI ɠɛni ma: «Wɛlɛ, è ʋɔlɔzaɠaga, tama zooi wɔɔlɔʋɛ dɛ ná, nii é la dɛ zoni. 
Zooi ʋɛtɛ, zɛgai ná: Filiseti nuiti ta-yooiti kpein, ta Gesuul nuiti ta-yooi kpein. 
É zo Siɠɔɔl ɗɛi ma, é yeizu Ezipete yooi zu ʋele, Ekelɔn kwɛmaʋɛ lɛkpɛmaʋɛ nu ɠɔʋɛzuʋɛ, naama adaʋɛ pɛ ka levezu ga Kanaan nuiti ta-yooi. Miná ɠa Filiseti nuiti ta-masada lɔɔlugɔiti ma laa wolaiti ti ná, Gaza, Asedɔde, Asekalɔn, Gate, ta Ekelɔn, ta Avi nuiti ta-yooi lɛkpɛmaʋɛ nu yeezazuʋɛ. 
Kanaan yooi pɛ ka dɛ ná ɓalaa, maanɛai é zo, é zo Meyala ma, nii é ga Sidɔn nuiti tɔnɔi, eyɛsu é zeeli Afɛke, Amɔɔl nuiti ta-ɠwɛpelemaʋɛ, 
ta Geeɓale nuiti ta-yooi, ta Liɓan kpein, folo ɠulazu ʋelei, é zo Ɓaale-Gade, Ɠɛɛlemɔn gizei ɠɔɠɔaʋɛ, eyɛsu é zeeli Leɓo-Ɠamate, 
nuiti kpein ti zeini gize yooi zu, é zo Liɓan, é zeeli Miselefɔte-Mayime, Sidɔn nuiti kpein. Nà ti ɓɛɛzu Izelayɛle nuiti tuɠɔ. Naa ɠa é ba, naati kpein fe Izelayɛle ya ga kpakutoomai, eɠɛʋelei gè ma levei veeni la, 
zooi tɛi gaaɠwɛɛna, è fe boloda taaʋuugɔiti zea, ta Manasee ná-bolodai ɠilazuʋɛ.» 
Manasee ná-bolodai ɠilazuʋɛ zɔi ta Luɓɛn ná-bolodai, ta Gade nɔnɔi, naati ti ta-yooi zɔlɔɔni. Ɠɔoɠɔ GALA ná-botiɠɛ nui Moize feeni ti ya Zuludɛn folo ɠulazu ʋelei, 
é zo Alɔwɛɛl, ziɛ wolai Aalenɔn laaʋɛ, eyɛsu é zeeli taa wolai ma, é pɛtugi zaamaʋɛ, é ɓɔ gize nɛmɛi kpein ba, é zo Meedeɓa, eyɛsu é zeeli Diɓon, 
ta Amɔɔl nuiti ta-masagi Siɠon, nii é ɠɛni masadai ɠɛɛzu Ɠɛseɓon, naa ná-taa wolaiti kpein, é zeeli Amɔn nuiti ta-ɠwɛpelemaʋɛ. 
É ɓɔ Galaade yooi ɓalaagi ʋa, ta Gesuul nuiti ta-yooi, ta Maakate nuiti, ta Ɠɛɛlemɔn gizei, ta Ɓasan kpein é zeeli Saleka, 
ta Wɔge ná-masadai kpein Ɓasan yooi zu, nii é ɠɛni ga Leefa mavofodai ma ɠaaɓelagi, é masadai ɠɛɛni Asetalɔte ta Edeleyi. Moize zobogi zɔlɔɔni niima masagiti ma, é ti ɓɛ ta-yooi ɠa. 
Kɛlɛ Izelayɛle nuiti ti la ɠɛni Gesuul nuiti ta Maakate nuiti kpɛɛni, naa ɠa é kɛa ti zeini Izelayɛle nuiti saama, zaaɠaza. 
Leevi ná-bolodai ɠila kpe ka é la ɠɛni zou zɔlɔɔni ga nɔnɔ. Kɛlɛ gala zalaɠaiti, ti ga Ɠɔoɠɔ GALAGI Izelayɛle ná-GALAGI nɔnɔi, naa ɠa é ga tɔnɔi, eɠɛʋelei é woni la tɔun ma. 
Moize Luɓɛn ná-bolodai nɔnɔi veeni zea, eɠɛʋelei ta-ʋɛlɛyeɠeiti ti la. 
Zooi ti sɔlɔɔni, é zoni Alɔwɛɛl, ziɛ wolai Aalenɔn laaʋɛ, ta taa wolai é pɛtugi zaamaʋɛ, gize nɛmɛi kpein ma Meedeɓa ɠobaʋɛ, 
é li Ɠɛseɓon, ta ma laa wolai kpein ti gize nɛmɛi ma: Diɓon, Ɓamɔte-Ɓaale, Ɓɛte-Ɓaale-Meyon, 
Yaasa, Kedeemɔte, Meefaate, 
Kiliyatayime, Siɓema, Seelɛte-Ɠasaɠaal pɛtugi ma ɠizei ma, 
Ɓɛte-Peyɔɔl, Pizega ɠizei ɠɔɠɔaʋɛ, ta Ɓɛte-Ɠayesimɔte. 
Gize nɛmɛi maaʋɛ laa wolai naati kpein poluma, ti Amɔɔl nuiti ta masagi Siɠon ná-masadai ma yooi kpein sɔlɔɔni, nii é ɠɛni masadai ɠɛɛzu Ɠɛseɓon. Moize zobogi zɔlɔɔni Siɠon ma, ta Madiyan ɠundiɠiiti, ti ɠoloni Siɠon ʋɛ, ti zeini zooi zu: Evi, Leekɛme, Suul, Ɠuul, ta Leeɓa. 
Ungaiziɛ nui Ɓalaame, Ɓeyɔɔl ná-doun zunui ɠɛni naati saama, niiti Izelayɛle nuiti ti ti ʋaani ga boɠa zɔkpɔi. 
Luɓɛn mavofodaiti ta-ɠwɛpelemaʋɛ ɠɛni ga Zuludɛn, ta ziɛlaʋɛ. Luɓɛn mavofodaiti ta-wolodai nɔnɔi ɠana, eɠɛʋelei ta-ʋɛlɛyeɠeiti ti la, taa wolaiti ta ma laa goiti. 
Moize Gade ná-bolodai nɔnɔi veeni zea, eɠɛʋelei ta-ʋɛlɛyeɠeiti ti la. 
Nii ti sɔlɔɔni ga zooi ná ɠɛni ga: Yazɛɛl, ta Galaade laa wolaiti kpein, ta Amɔn nuiti ta-yooi ɠilazuʋɛ, é zeeli Alɔwɛɛl, Laɓa letemaʋɛ, 
é zo Ɠɛseɓon, é zeeli Lamate-Misepee, ta Ɓetɔnime, é zo Maɠanayime, é zeeli Deɓiil ɠwɛpelemaʋɛ, 
ta nɛmɛi zu, Ɓɛte-Ɠalame, Ɓɛte-Nimela, Sukɔte, ta Safon, Ɠɛseɓon masagi Siɠon ná-masadai ma yooi mɔtai. Naama yooi kpein é ɠɛni ziɛ wolai Zuludɛn ʋoluʋɛ. Zuludɛn ɠɛni zou ɠwɛpelemaʋɛ, nii é folo liizu ʋelei, eyɛsu é zeeli ziɛ wolai Zeeneezalɛte ɠaaɓelazuʋɛ, lɛkpɛmaʋɛ nu ɠɔʋɛzuʋɛ. 
Gade mavofodaiti ta-wolodai nɔnɔi ɠana, eɠɛʋelei ta-ʋɛlɛyeɠeiti ti la, taa wolaiti ta ma laa goiti. 
Naa ʋoluma, Moize Manasee ná-bolodai ɠilazuʋɛ nɔnɔi veeni zea, gaaɠwɛ ti ʋa, ʋelei ta-ʋɛlɛyeɠeiti ti la. 
Zooi ti sɔlɔɔni, naa ɠɛni ga Ɓasan, é zo Maɠanayime, Ɓasan masagi Wɔge ná-masadai ma yooi kpein, ta Yayiil ná-taa go ʋuulɔzita (60), ti kpein ti ʋuuni ma yooi zu. 
Naa ʋoluma, ti Galaade yooi ɠilazuʋɛ zɔlɔɔni, ta Asetalɔte ta Edeleyi, Ɓasan masagi Wɔge ná-masadai ma laa wolaiti. Ti ti pɛ ɠaaɠwɛ Makiil mavofodaiti ba, Manasee ná-doun zunui, ʋelei ta-ʋɛlɛyeɠeiti ti la. 
Zooi ɠana, nii Moize feeni Moaɓe yooi ma nɛmɛiti su, Zuludɛn ʋolu ʋelei, Zeeliko letemaʋɛ, folo ɠulazu ʋelei. 
Moize la ɠɛni zou veeni Leevi mavofodaiti zea. Ɠɔoɠɔ GALAGI, Izelayɛle ná-GALAGI ɠa é ga tɔnɔi, eɠɛʋelei é boni la ti ma. 
