﻿Zozuwe.
20.
Ɠɔoɠɔ GALAGI ɓɔɛni Zozuwe ʋɔ, é ɠɛ ma: 
«Ɓɔɛ Izelayɛle nuiti pɔ, è ɠɛ ti ma: ‹À taaiti kpɛtɛ ɓɔɠɔ ʋɛ ga maaʋela laaiti, nii gè ma vai woni wo ma ga Moize maaʋele. 
Nu ʋaa nui nii a nu ʋaana, é la gaaɠilini ma, é ga teʋezea vaa nɔ, toɠa zoo é ʋela, é li ná. Toɠa ɠɛ ga wo-ʋelazuʋɛ, ɲamai ʋotokula nui ʋa. 
Nu ʋaa nui ɠa ʋela, é li ma laai taɠila su, toɠa lo siɠidaʋɛ, é ná-fai lɛ ga taa ɠundiɠiiti. Naati ta yeezei bu, é yɛ ti ʋɔ bɛ taazuʋɛ, ti ada ve zea, ʋɛ a yɛ ná. 
Ɲamai ʋotokula nui a ʋilɛna polu, ti la nu ʋaa nui vea zea. Mazɔlɔɔ é la gaaɠilini ma, é ʋa seiɲɔɠɔi ʋa, é la ɠɛni ga naa zili nu pɔlɔma zu. 
Toɠa yɛ naama laazuʋɛ, eyɛsu é ɠula kɛlɛma nuɓusɛiti gaazu, ti ná-tukpɔi ɠaaleʋe, ɓaa eyɛsu zalaɠa ɠula ɠundiɠi wolai, nii é botii zu naama yeeɠɛɠalai, naa za. Naama ziɛgi zu ɠa nu ʋaa nui a ɠale ma la ná-pɛlɛi wu, ná-taazuʋɛ, ʋɛ é ʋelani, é zeɠe ná.› » 
Ti yiimazeɠeni ga Keedɛse, taai nii é Galilee, Nɛfetali ɠize yooi zu, ta Sikɛme, nii é Efelayime ɠize yooi zu, ta Kiliyate-Aaleɓa, nii é lolisu ɓalaa ga Ɠeeɓelɔn, é Zuda ɠize yooi zu. 
Zuludɛn ʋoluʋɛ, Zeeliko folo ɠulazu ʋelei, ti yeeloni Ɓeesɛɛl ʋa, é zɛlɛni teʋebai maazu, Luɓɛn yooi zu, ta Lamɔte, nii é Galaade, Gade yooi zu, ta Gɔlan, nii é Ɓasan, Manasee yooi zu. 
Taaiti kana, ti yeeloni ti ʋa, ti ɠɛ ga maaʋela laaiti, Izelayɛle nuiti bɛ, ta seikɔɠɔma nuiti ta ɠɛ ti zaama, nu-o-nu nii a nu ʋaana, é la gaaɠilini ma, naa ɠa zoo é ʋela, é li ná, ɲamai ʋotokula nui la pa, aisa é ʋa ɠula kɛlɛma nuɓusɛiti gaazu, ná-tukpɔi ɠaa ʋa leʋe. 
