﻿1 Samiyɛle.
28.
Naama ziɛgi zu Filiseti nuiti ti ta-ɠɔɔʋɛbɛi ɠaalɛɛni ba, ga ti kɔɔi ʋɛɛ Izelayɛle ʋa. Akise ɠɛni Davide ma: «Kɛni è kwɛɛ ga ɗa-o, ɗa-nuiti-yo, wa ɠɛɛzu gi ʋɔ pelei kɔɔi nii zu.» 
Davide ɠɛni Akise ma: «Naa ʋagɛ, ɗa ʋaazu kaazu, nɛ̀i gè ga ɗa-wotiɠɛ nui, nii gè ʋaazu kɛɛzu.» Akise ɠɛni Davide ma ʋolu: «Gè è zeɠea ga màkɛ nui, eyɛsu ɠɔ.» 
Ná laa yɔɠɔzu, Samiyɛle zaani, Izelayɛle pɛ ge ná-saa wɔlɔi wo, ti maaɠulu ná-taazuʋɛ Lama. Sayile gɔvɛ laawooleʋe nuiti pɛ kulani Izelayɛle yooi ʋa, ta niiti gɔvɛiti ti ʋelela ʋele vaiti bosu ti ma. 
Filiseti nuiti ti ɠaalɛɛni ba, ti ta-ɠɔɔlaɠai ʋu Sunɛme. Sayile Izelayɛle pɛ gaalɛɛni ba, ti ta-ɠɔɔlaɠai ʋu Gileɓoa. 
Sayile Filiseti nuiti ta-ɠɔɔlaɠai ɠaai ma, dualuagi soni, sasuɓalini gola. 
Sayile Ɠɔoɠɔ GALAGI ɠaazaɠani, kɛlɛ Ɠɔoɠɔ GALAGI la kɛɛni, é ʋa gooɠaaʋote, ga segiti, ɓaa gaazaɠa sɔɔlaiti, ɓaa GALA goo wo nuiti maaʋele. 
Sayile ɠɛni ná-botiɠɛ nuiti ma: «À anzanui ta ɠaiziɛ bɛ̀, nii a zoo é gɔvɛiti daawooleʋe, gè li pɔ bɛ, gè gaazaɠa.» Ná-botiɠɛ nu wolaiti ti ɠɛni ma: «Anzanui ta ɠa En-Dɔɔl, nii a ɗa gɔvɛiti gaazaɠa.» 
Sayile ɓɔɠɔ maavaliboni, é seɠe ɠiligaa loo ɠɔba, é zunu felegɔ ʋilɛ ʋolu, ti li En-Dɔɔl, ti zeelini anzanui ʋɔ bɛ ga kpidii, Sayile ɠɛ ma: «Nà pɔ ga è ʋelela ʋele vaiti bo bɛ̀, ga è gɔvɛi ta laawooleʋe bɛ̀, nii gè ɠɛɛzu, è toli.» 
Anzanui ɠɛni ma: «È suɠwɛɛ sɔ ga Sayile gɔvɛ laawooleʋe nuiti kulaʋɛ zooi ʋa, ta niiti gɔvɛiti ti ʋelela ʋele vaiti bosu ti ma, ɗa ɠɛɛzu è balii lɛ tùɠɔ ɓaa? Sàa vai ɠa è pɔ ɓaa?» 
Sayile ɠonani Ɠɔoɠɔ GALAGI laaseigi zu, é ɠɛ ma: «Gè ɠonaa Ɠɔoɠɔ GALAGI ma, nii é vulua, ga faa ɲɔu nɔpɛ ge la ɠula niima vai zu, é ʋa zeeli è ma.» 
Anzanui ɠɛni ma: «Ɓɛ ɠa è ɠɛɛzu gè toli è ʋɛ?» Sayile ɠɛ ma: «Samiyɛle loli bɛ̀.» 
Siɛgi zu anzanui Samiyɛle ɠaani la, é wola ɓainni, é ɠɛ Sayile ma: «Lee vaa zu è yaavazu? Ɗa ɠa è ga Sayile.» 
Masagi ɠɛni ma: «Mina lua, kɛlɛ ɓɛgele ɠa è kaazu?» Anzanui ɠɛ ma: «Galagi ta ma zii ɠa gè kaazu, é ɗa ɠula zooi wu.» 
Sayile ɠɛ ma: «Kɛʋelei ɠa ɠale?» Anzanui gooɠaaʋoteni, é ɠɛ ma: «Kɛwola ʋɔlɔi ʋe de, é lɛɛzu, maavelevelegai ga seɠei.» Sayile kwɛɛni ga Samiyɛle ʋe, é unpilɛni zooi ma, é nɔkɔ. 
Samiyɛle ɠɛni Sayile ma: «Lee vaa zu è ná-dooɠogi zuɠoloɠologai? Lee vaa zu è tòlisu?» Sayile gooɠaaʋoteni, é ɠɛ ma: «Nà ziiɓɔlɔ wolai zu, Filiseti nuiti ti kɔɔi laalɛa bù, Ɠɔoɠɔ GALAGI ma ge zeɠea bà, é la gòoɠaaʋoteni ga GALA goo wo nuiti ɓaa segiti maaʋele. Gè è loligɛ ga nii nà kɛ, è naa lɛ ga ze.» 
Samiyɛle ɠɛ ma: «Lee vaa zu mu è tòlisu, ni Ɠɔoɠɔ GALAGI ɠɛlɛa è ʋa, é ɠɛa ga è zili nui? 
Ɠɔoɠɔ GALAGI naa laazeelia, nii é ɠɛni gè bo è ma. É masadai ɠulaa è ya, é fe è ɠoba nui ta ya, Davide ya. 
Tɛi è la kɛɛni, è ʋa ɠolo Ɠɔoɠɔ GALAGI ná-devei ʋɛ, ʋelei é ɠɛni ɠɛɛzu, é yeeʋɛɛ la Amalɛke nuiti ma, ná-ziiɠaawanai zu, è la naa ɠɛɛni. Naa ɠa é kɛa, Ɠɔoɠɔ GALAGI è zosu la ɠani za. 
Ɠɔoɠɔ GALAGI ɠa vɔlɔ wo lɔɔzu Filiseti nuiti zeezu, ɗa-o, Izelayɛle nuiti-yo. Ɗa-o, è-lointi-yo, wa ʋaazu pɔ̀ pelei lina, Ɠɔoɠɔ GALAGI ɠa Izelayɛle ɠɔɔʋɛbɛi pɛ dɔ Filiseti nuiti zeezu.» 
Gaamago Sayile yɛni loni, é loo zooi ma, mazɔlɔɔ é wola luani Samiyɛle laawooi ʋa. Naa ʋolu, tɛi é la ɠɛni daami woni foloi, ta kpidii, zɛbɛ la mɔ ɠɛni zea. 
Anzanui ʋaani Sayile ɠoba, é ka ga naa wola luaʋɛ, é ɠɛni Sayile ma: «Pɛtɛ, nɛ̀i gè ga ɗa-wotiɠɛ anzanui, gè woiloga è-woo ma, gè ɠikula zɛnvui zu, gè naa ɠɛ, nii è boga mà. 
Ɗa ɓalaa woilona, ɗa-wotiɠɛ anzanui wooi ma: ɓɛ gè ɓulu ɓuɠa ɠila kɛʋele ɓɛtɛ è ʋɛ, è mi, nii a kɛ è zɛbɛ zɔlɔɔ, è wuzeɠe, è ʋilɛ pelei ma, è ɗa li.» 
Sayile ɠɛlɛni, é ɠɛ ma: «Gè la daami wosu.» Kɛlɛ ná-botiɠɛ nuiti, ta anzanui, ti ɓɔini da, Sayile ma ge woilo ti-woo ma. É wuzeɠeni zooi ma, é zei betei zu. 
Anzanui nikɛ ɓokpagi ʋaani, nii é ɠɛni zea, é ɗa makɛ, é ɓulu vukɔi zeɠe, é gaayɔ, é kpɛtɛ ga ɓuluiti, nii lɛʋɛ la su. 
Anzanui daamianigi naati feeni Sayile ta ná-botiɠɛ nuiti zea. Ti ɓegai ma ga daamii wo, ti wuzeɠeni, ti li ma ɓidi naa nɔ. 
