﻿2 Samiyɛle.
4.
Siɛgi zu Sayile ná-doun zunui Iseɓaale mɛnini la ga Aɓenɛɛl zaa Ɠeeɓelɔn, zɛbɛi ɠulani zea, ta dualuagi Izelayɛle nuiti pɛ soni. 
Zunu felegɔ ɠɛni Iseɓaale ná-devei wu, ti ga kɔɔɓɔ kundiɠiiti, gilagi laa ɠɛni ga Ɓaana, zɔi laa ga Leekaɓe, ti-ɠɛɛ ɠɛni ga Ɓɛnzamɛn nui Limon, Ɓeelɔte taazuʋɛ nu ɠɛni de. (Ɓeelɔte ɠɛni ga Ɓɛnzamɛn nuiti po. 
Ɓeelɔte nuiti ti ʋelani, ti li, ti zei Gitayime, ti-mavofodaiti ta dɛ miná zaaɠaza.) 
Zunu loun ɠila ge ɠɛni Sayile ná-doun zunui Zonatan ʋɛ, kɔɠɔ felegɔi pɛ maalɛɠɛfɛgai. Zizeleyɛle ɠɔɔi ma ziɛgi zu, kona dɔɔlugɔ ɠa é ɠɛni zea. Sayile ta Zonatan ti zaa wooi ʋaai ma, doun zo anzanui seɠeni, é ʋela la, é yɛ gaazuvilɛi zu, é too, naa ɠɔɠɔ felegɔiti ti ɠula bu. Daa ɠɛni ga Mefiɓaale. 
Ɓeelɔte nui Limon ná-doun zunu felegɔiti Leekaɓe ta Ɓaana ti lɛɛni Iseɓaale ná-pɛlɛi wu folo gaalɔgai, naa ɠɛni laani folo ɲiimɛnii zu. 
Ti lɛɛni pɛlɛ ɠoozuʋɛ eɠɛ ta ɠɛ molo zeɠezu, ti boɠai ʋu kogi zu. Naa ʋolu Leekaɓe ta kɛɛɠɛloin Ɓaana ti ʋelani, ti li. 
Ti lɛɛni pɛlɛ ɠoozuʋɛ, siɛgi zu é ɠɛni laani la, é ɗa looɠo ná-betei zu daa ʋɛlɛi wu, ti paa. Ti nɔungi leʋeni ba, ti ɓizɛ la, ti ɲi piin ziɛzu Zuludɛn ma ʋɛtu nɛmɛi zu. 
Ti liini ga Iseɓaale nɔungi masagi Davide ʋɔ Ɠeeɓelɔn, ti ɠɛ ma: «Sayile ná-doun zunui Iseɓaale nɔungi ɠa, è zili nui Sayile nii é ɠɛa è ɠaiziɛzu ga é è ʋaa. Ɠɔoɠɔ GALAGI màliɠii masagi nɔnɔi ʋotokulaa Sayile ta mavofodaiti ma za.» 
Davide Ɓeelɔte nui Limon ná-doun zunu felegɔiti gooɠaaʋoteni, Leekaɓe ta Ɓaana, é ɠɛ ti ma: «Gè ɠonaa Ɠɔoɠɔ GALAGI ma, nii é vulua, nii é ùnmɔɔgai, é kùla kidaaʋiligiti pɛ su, 
zɔi é ʋaani pɔ̀ Sikelage, é Sayile zaa vai wo mà, é ɠɛni kaazu ga woo niinɛ ʋagɔ ɠa é daazeelizu mà, gè ɠɛni ti so, ti paa, naa ɠa é ɠɛni ga ná-woo niinɛ ʋagɔi zulɔnɔgi, nii gè feeni zea. 
Siɛgi zu mu faa ɲɔu ɠɛ nuiti wo sɔbalala nui ʋaazu la ná-pɛlɛi wu, daazuʋɛ, gè la ma ɲamai maaɠaazaɠaboga wo ma ɓaa, nii é wo-yeeiti ma? Nà wo ɠulazu zooi ʋa!» 
Gaamago Davide devei veeni ná-nuiti zea, ti ti ʋaa, naa ʋoluma ti ti-yeeiti ta ti-ɠɔɠɔiti teʋe ti ʋa, ti ti zɛlɛ Ɠeeɓelɔn kpoigi ɠobaʋɛ. Ti Iseɓaale nɔungi zeɠeni, ti maaɠulu Aɓenɛɛl ná-kabai zu Ɠeeɓelɔn. 
