﻿2 Samiyɛle.
13.
Naa ʋoluma, pɛtɛ nii é ɠɛɛni, zeela ɠila ge ɠɛni Davide ná-doun zunui Aɓesalɔme ya, pagai ga gola, daa ga Tamaal. Davide ná-doun zunui Amenɔn wɔinni la. 
Amenɔn zeeɓɛni ga ziiɓɔlɔi, é ʋilɛ ná-seelai Tamaal ʋa, nii wɔin ɠɛni ma. É ɠɛni Amenɔn ɠaazu ga fai maayikiai, ga é ʋa maaɓuɠa naa ʋa, mazɔlɔɔ naa la ɠɛni dɛ zunu vaa ɠwɛɛ. 
Amenɔn bɔɔlai ta ɠɛni ná, gola ɠeleɠelegai, daa ga Yɔnadaɓe, Davide kɛɛɠɛloin Simea ná-doun zunui ɠɛni de. 
É ɠɛni Amenɔn ma: «Lee vaa zu ɗɛi è ga masa doin, è ɓɔɠɔ maawɔinzu ɠani sobu-o-sobu? È la pɔ è ʋa bo mà?» Amenɔn gooɠaaʋoteni, é ɠɛ ma: «Tamaal ɠa wɔin mà, kɛ̀ɛloin Aɓesalɔme ná-seelai.» 
Yɔnadaɓe ɠɛ ma: «La betei zu, è ɓɔɠɔ ɠɛ ga seeɓɛ nui. Siɛgi zu è-ɠɛɛ a ʋaana la, ɗa ɠɛ ma: ‹Va bu, nà-seelai Tamaal ʋa, é daamii ve zèa, é kpɛtɛ gàazu, tɔ ɓɔɠɔi é fe zèa, gè mi.› » 
Amenɔn laani, é ɓɔɠɔ ɠɛ ga seeɓɛ nui. Masagi liini wɛlɛzu ma, Amenɔn ɠɛ masagi ma: «Nà è maanɛɛnɛzu, soma nà-seelai Tamaal ʋa, é dɛɠɛ ɓuun felegɔ ɓɛtɛ gàazu, tɔ ɓɔɠɔi é ti ve zèa, gè ti mi.» 
Davide keela leʋeni Tamaal ma ná-pɛlɛi wu, é ɠɛ ma: «Li è-liɛ Amenɔn ná-pɛlɛi wu, è kɔnɔ gili.» 
Tamaal liini diɛ Amenɔn ʋɔ bɛ, é ka laani, é ɓulu vukɔi yɛɓɛni, é gaayɔ, é dɛɠɛ ɓuun felegɔi ɓɛtɛ diɛ ɠaazu, é gili. 
É ma liɠii zeɠe, é daaloka gaazu. Kɛlɛ Amenɔn ɠɛlɛni daami ʋa. É ɠɛ ma: «À nuiti kula nà-pɛlɛi wu!» Ɛsɛ pɛ ge ɠulani ná-pɛlɛi wu. 
Amenɔn ɠɛni niina Tamaal ma: «Ʋaana ga dɛɠɛ ɓuungiti dàa ʋɛlɛi wu, miná ɠa è ti veezu ná zèa ɗa ɓɔɠɔi, gè ti mi.» Tamaal liini ga dɛɠɛ ɓuungiti, é ti ɓɛtɛni diɛ Amenɔn ʋɛ, naa laa ʋɛlɛi wu. 
Siɛgi zu é ɠɛni feezu la zea, Amenɔn soni, é ɠɛ ma: «Ʋa, de la, zeela!» 
Tamaal ɠɛ ma: «Ɓa, dìɛ, mina ʋu mà! Naa la ɗa ga ɠɛ Izelayɛle. Mina unfetala vai naa ɠɛ! 
Naa ɠɛa ʋoluma, mini ɠa nà li ná ga nà-unfegi? Ɗa ɓalaa, ɗa ɓɔɠɔ ɠula naazu ga unfetala nu Izelayɛle. Lee vaa zu è la lia, è bo masagi ma? É la ɠɛlɛa fèe vai ʋa è ʋɛ.» 
Kɛlɛ Amenɔn la ɠɛni kɛɛni, é ʋa woilo goo ma, é soni ga maaɓaai, é ʋu ma, é laa la. 
Naa ɠɛai ma, maayo ge zeɠeni Amenɔn ʋɛ, é naa wɔinzeɠeni ga gola, é leʋe naa ná-nɛɛbɛi ʋa, nii é ɠɛni ziima. É ɠɛni naa ma: «Wuzeɠena ʋɛ, è li!» 
Tamaal ɠɛni ma: «Ɓa! Mina kpɛ̀ ɠana, naa ɠa ɠɛ ga faa ɲɔu wola, é leʋe nii ʋa, è kɛai ga ze niina.» Kɛlɛ é la kɛɛni mɔnɔ, é ʋa woilo goo ma. 
É ná-botiɠɛ zunu loungoi lolini, é ɠɛ ma: «Anzanu loungoi nii ɠula mà pɛlɛi wu, è pɛlɛi ʋilisu ga polu ʋelei.» 
Botiɠɛ zunu loungoi kulani eteaʋɛ, é pɛlɛi ʋilisu ga polu ʋelei. Seɠe ʋapagi ta ɠɛni Tamaal ɠɔba, pɔnɛai, naama zeɠei ma zii ɠa masagi ná-doun anzanuiti ti ɓena too ɠɔba, niiti ti la dɛ zunu vaa ɠwɛɛ. 
Tamaal zuʋui ʋuuni nɔungi ma, é ná-seɠe ʋɔnɛgi ʋali ga, nii é ɠɛni kɔba, é yeela unma, é ɗa li ga wɔlɔa. 
Kɛɛɠɛloin Aɓesalɔme ɠɛni ma: «È-ɠɛɛloin Amenɔn ʋuuʋɛ è ma ɓaa? Nii gè bosu è ma niina, zeela, maaɠɛ kpɔ, ɗa-zeelai ʋe. Mina naama vai zeɠe yii ʋɔ.» Tamaal yɛni niina diɛ Aɓesalɔme ná-pɛlɛi wu, eɠɛ anzanui nii sinigi ɠɛlɛai ba. 
Masagi Davide naama vaiti mɛnini, é wola yiiɠaawana. 
Aɓesalɔme la ɠɛni faa nɔpɛ boni Amenɔn ma. É naa wɔinzeɠeni, mazɔlɔɔ naa ʋuuni ná-seelai Tamaal ma. 
Kona felegɔ ʋoluma, baala maaleɠa leʋe nuiti ti ɠɛni Aɓesalɔme ya Ɓaale-Ɠasɔɔl, Efelayime ɠobaʋɛ. É masagi ná-doun zunuiti pɛ tolini ná. 
É liini masagi ʋɔ bɛ, é ɠɛ ma: «È kwɛɛni ga nɛ̀i gè ga ɗa-wotiɠɛ nui nà nà-baalagiti maaleɠai leʋezu. Masagi soma tɔ-o, ná-botiɠɛ nuiti-yo, wo ʋa pɔ̀ bɛ, nɛ̀i gè ga ɗa-wotiɠɛ nui.» 
Kɛlɛ masagi ɠɛni ma: «Ɓa-o, dòun zunu, gi pɛ gi la ʋaazu, naa ɠa ɠɛ ga kasɔ wola è unma.» Aɓesalɔme ɓɔini da, kɛlɛ masagi ɠɛlɛni toligi ʋa, é tuya looni nɔ bɛ. 
Aɓesalɔme ɠɛni ma: «Ni è la mɔ kɛɛni è ʋa ʋa, va bu kɛ̀ɛloin Amenɔn li, é gi maaza.» Masagi ɠɛni ma: «Lee vaa zu é liizu, wo maazaasu?» 
Aɓesalɔme ná-kpɔidai maaʋele ma, masagi ɓeni Amenɔn ʋa, ti li ta masagi ná-doun zunuiti pɛ. 
Aɓesalɔme devei veeni ná-botiɠɛ nuiti zea, é ɠɛ ti ma: «Wa Amenɔn ɠaana feya koozunɛai ga dɔɔi, ta nà ɠɛna wo ma: ‹À Amenɔn loɠa,› názu wa paa niina. À mina lua, nà ɠa gè devei veai wo ya. À zɛbɛzeɠe, wo ɠaaɓa.» 
Aɓesalɔme ná-botiɠɛ nuiti ti ná-devei zoni, ti Amenɔn ʋa. Gaamago masagi ná-doun zunui zɔiti ti wuzeɠeni daami wosuʋɛ, ɛsɛ ge lɛ ná-soovale fuului ɠɔma, é ʋela. 
Ti yɛni pelei ma, Davide mɛni ga Aɓesalɔme masagi ná-doun zunuiti pɛ paaʋɛ, gila kpalaa ge la ɠulani. 
Masagi wuzeɠeni, é ná-seɠeiti baliʋali ga, é la zooi ma. Ná-botiɠɛ nu wolaiti pɛ ti ɠɛni loni koba, ta-zeɠeiti baliʋaliai ga. 
Davide kɛɛɠɛloin Simea ná-doun zunui Yɔnadaɓe kpɔɛi zeɠeni, é ɠɛ ma: «Màliɠii masagi mina ɠisiɛ ga masagi ná-doun zunuiti pɛ ka ti zaai, Amenɔn ɠila ka saai. Kaite yeei é ʋuuni la ná-seelai Tamaal ma, Aɓesalɔme ɠɛni ɠɛɛzu, toɠa paazu. 
Màliɠii masagi mina niima vai zeɠe mu yii ʋɔ, é ʋa ɗa ɠisiɛ ga ná-doun zunuiti pɛ ka ti zaai. Amenɔn ɠila nɔ ɠa saai.» 
Aɓesalɔme ɓɔɠɔi ʋelaʋɛ. Siɛgi zu ada maaɓɛ nui wɛlɛni la ɠoozama, é nu mɔinmɔin golai ɠaani, ti ɗa ʋa ga polu ʋelei, gize ɠakamaʋɛ. 
Yɔnadaɓe ɠɛni masagi ma: «Wɛlɛna masagi ná-doun zunuiti ba, ti ʋaazu, eɠɛʋelei nɔ gè ɠɛa bosu la è ma, nɛ̀i gè ga ɗa-wotiɠɛ nui.» 
Kpesuʋɛ ga ɓɔɛ, masagi ná-doun zunuiti ti unkulani. Ti pɛ ti wɔlɔni ga gola, masagi ɓalaa ta ná-botiɠɛ nuiti ti wɔlɔni gola. 
Aɓesalɔme ʋelani, é li Gesuul masagi Talemayi ʋɔ bɛ, Amiyude ná-doun zunui. Davide ɠɛni ná-doun zunui zaa wɔlɔi wosu folo-o-folo. 
Aɓesalɔme yɛni pela ʋelei zu Gesuul, é kɛ ga kona saʋagɔ. 
Masagi Davide looɠoni Aɓesalɔme ɓɛɛ vai ʋa, mazɔlɔɔ gaanɛɛnɛa ɠɛni de niina Amenɔn zaa vai zu. 
