﻿2 Samiyɛle.
24.
Yeeta Ɠɔoɠɔ GALAGI yiiɠaawanani mɔnɔ Izelayɛle nuiti ma, é Davide li ti laalɔɠɔma ga, é Izelayɛle ta Zuda nuiti daaseigiti sɛʋɛ. 
Masagi ɠɛni naazu ná-kɔɔɠuluɓai Zoaɓe ma, nii é ɠɛni koba: «Leʋe Izelayɛle yooi ná pɛ su, é zo Dan, é li Ɓeel-Seeɓa, nuɓusɛiti daaseigi zɛʋɛ, nii a kɛ gè ti-liegɔi ɠwɛɛ.» 
Zoaɓe ɠɛni ma: «Ɗa-ƓALAGI é ga Ɠɔoɠɔ GALAGI, naa kɛ é nuɓusɛi mɔin su ga seizu ungila (100), ta màliɠii masagi ka ga ɠaazu! Kɛlɛ leeni ʋe màliɠii masagi pɔ ga é naa ɠɛɠala vai ɠɛ?» 
Kɛlɛ masagi la zeɠeni wooi ʋolu, nii é boni Zoaɓe ta kɔɔʋɛbɛi ma ɠundiɠiiti ma. Ti ʋilɛni pelei ma ga ti li, ti Izelayɛle nuiti daaseigiti sɛʋɛ. 
Ti Zuludɛn ɓudɛni, ti ʋu Alɔwɛɛl, taa wolai yeezazuʋɛ nii é Gade nɛmɛi zaama, Yazɛɛl ɠobaʋɛ. 
Ti zeɠeni miná, ti li Galaade ɠoʋi ma ta Taatime-Ɠɔdesi yooi. Ti zɛsu, ti li ga Dan-Yaan ʋele eyɛsu ti zeeli Sidɔn. 
Ti zeelini Tiil taa wolai zu siɠigi ma, naa ʋolu ti liini Ɠeeve ta Kanaan laa wolaiti pɛ su. Gaaɓelagi zu, ti zeeli Ɓeel-Seeɓa, Zuda yooi zu lɛkpɛmaʋɛ nu yeezazuʋɛ. 
Ʋele ɠana ti zooi ná pɛ suɓizɛni la, alu taaʋuugɔ folo ʋuufelegɔ (20) laawu, ti ɠaleni ma Zeeluzalɛme. 
Zoaɓe daasei sɛʋɛi ma ʋoluvaawogi woni masagi ma: Izelayɛle ɠɛni ga zunu waaundɔsaʋa (800 000), niiti ta zoo liizu kɔɔ ma, Zuda geleiti ti ɠɛni ga zunu waaundɔɔlugɔ (500 000). 
Gaamago Davide gaaɠaani ga toɠa ga sɔba nu, mazɔlɔɔ é nuɓusɛiti daaseigiti sɛʋɛni. É ɠɛni Ɠɔoɠɔ GALAGI ma: «Gè faaɠaaza gola ɠɛa ga nii ɠɛɛ vai! Naa ɠa é ba, Ɠɔoɠɔ GALAGI, sùvaayɛ ga nà-faa ɲɔi kae, nɛ̀i gè ga ɗa-wotiɠɛ nui, mazɔlɔɔ gè kwɛɛni ga gè nii ɠɛɛʋɛ eɠɛ ɠimalala nu.» 
Davide wuzeɠeai ma poluma zobui, Ɠɔoɠɔ GALAGI ɓɔɛni GALA goo wo nui Gade ʋɔ, nii é ɠɛni Davide ɠoba, é ɠɛ ma: 
«Li, è ɠɛ Davide ma: ‹Ɠɔoɠɔ GALAGI wooi ɠaa: Nà faa saʋagɔi niiti gila seizu è ma, yiimazeɠe ga gila, gè sei è ma.› » 
Gade liini Davide ʋɔ bɛ, é keela wooi wo ma, é ɠɛ ma: «Leeni ɠa è pɔ ga gè sei è ma: Kona dɔfela pului ɠɛ ɗa-yooi zu? Ɓaa alu saʋagɔ é ɗa ɓizɛ è zili nuiti ba, ti wuzeɠezu è laalɔɠɔma? Ni naa laade, ɗɔfɔi ʋa ɗa-yooi zu folo saʋagɔ laawu? Ɠisiɛ su ga pagɔ, è yiimazeɠe, è naa wo mà, nii nà li, gè bo tèʋe nui ma.» 
Davide Gade wooɠaaʋoteni, é ɠɛ ma: «Ziiɓɔlɔ wolai ɠa gè su! Ade loo Ɠɔoɠɔ GALAGI yeezu, mazɔlɔɔ ná-gaazumaawɔinɠai zuwɔɔlɔʋɛ, kɛlɛ gè mina loo nuiti zeezu!» 
Ɠɔoɠɔ GALAGI ɗɔfɔ zeeɓɛi leʋeni Izelayɛle yooi zu, ma yee zobui nɔ eyɛsu é zeeli kui ma teʋeai ba. É tɔɔzei Dan, é zeeli Ɓeel-Seeɓa, é zunu waaʋuulɔfela (70 000) ʋaa. 
Tɛi geezuɠeelai ɠɛni yeemaalesu Zeeluzalɛme ma ga é koloɠolo, Ɠɔoɠɔ GALAGI nimizani ɓɔɠɔ ma ga naama vaa ɲɔi. É ɠɛni geezuɠeelai ma, nii é ɠɛni faa zuɠoloɠologi ɠɛɛzu nuɓusɛiti saama: «Yeei lɛɛna ba, naa kula ɠɛa su.» Geezuɠeelai ɠɛni niina Yeeɓuse nui Alavena ná-molo loɠazuʋɛ ɠobaʋɛ. 
Davide geezuɠeelai ɠaai ma, é ɗa nuɓusɛiti paa, é ɠɛni Ɠɔoɠɔ GALAGI ma: «Nà ɠa gè kotoi ɠɛai, nà ɠa gè faaɠaazagi ɠɛai. Kɛlɛ nuɓusɛi niiti, leeni ɠa ti kɛa? Dòɠa mu, nà ɠila, nà-o, nà-pɛlɛyeɠei-yo.» 
Naama voloi nɔ, Gade liini Davide ʋɔ bɛ, é ɠɛ ma: «Wuzeɠe, è li Yeeɓuse nui Alavena ná-molo loɠazuʋɛ, è zalaɠa ɠulazuʋɛ ɓɛtɛ ná Ɠɔoɠɔ GALAGI ʋɛ.» 
Davide liini ná, eɠɛʋelei Ɠɔoɠɔ GALAGI valini la Gade ma ga é bo ma. 
Alavena ɠaazuwuzeɠeni, é masagi ɠa ta ná-botiɠɛ nuiti, ti ɗa ʋa. É liini naazu, é nɔkɔ masagi ɠɔɠɔwu. 
É gaazaɠa, é ɠɛ ma: «Toɠa ɠale, màliɠii masagi, è ʋaazu pɔ̀, nɛ̀i gè ga ɗa-wotiɠɛ nui?» Davide ɠɛ ma: «Gè ʋaa, gè molo loɠazuʋɛ ʋɛ ɠeya è ma, gè zalaɠa ɠulazuʋɛ ɓɛtɛ ná Ɠɔoɠɔ GALAGI ʋɛ, nii a kɛ ɗɔfɔi nii maaɠooza nuɓusɛiti ba.» 
Alavena ɠɛni Davide ma: «Molo loɠazuʋɛ zeɠe. Zalaɠai nii è pɔ è kula, è naa ɠula. Nikɛiti ka gala zalaɠai vai zu, wotoloi ma wuluiti ta nikɛiti gili wuluiti ta ɠɛ ga koʋii. 
Ee, masagi, gè ti pɛ fea è ya. Ɠɔoɠɔ GALAGI é ga ɗa-ƓALAGI, naa yeezei kae è wu ga pagɔ.» 
Kɛlɛ masagi ɠɛni Alavena ma: «Ɓa-o, nà geyazu è ma ga sɔngɔi ɠiteɠitegi. Gè la gala zalaɠa ɠulazu nà-GALAGI Ɠɔoɠɔ GALAGI ʋɛ, nii gè la ɓɔlɔni ma.» Davide molo loɠazuʋɛ ɠeyani ta nikɛiti ga wali ɠae ʋuulɔɔlugɔ (50). 
É zalaɠa ɠulazuʋɛ ɓɛtɛni miná Ɠɔoɠɔ GALAGI ʋɛ, é gala zalaɠaiti ta ziilɛi zalaɠaiti kula. Názu ɠa Ɠɔoɠɔ GALAGI zooi maawɔinɠaani la, ɗɔfɔi maaɠooza Izelayɛle ʋa.
