﻿Tɛnɛ Faalaaliiti.
20.
Dɔɔi ɠa ga ɲɛɛɠulasu anii, kpɔɔle anii é nu ɠaazulatisu, toɠa ga zɔɔlɛma anii, nu-o-nu é ɓɔɠɔ loozu ya su, naa la zooga é ʋa ɠɛ ga ɠima nu. 
Masagi a yiiɠaawanana, maa ɠa ɗa yiki eɠɛ zalai zikɔ wooi, ɗɛi ɗa masagi ná-ziiɠaawanai ɠaazulɛɛna, è-yɛnvui ɠa faaɓaagi laawu. 
Nu maaɠooza sakpegi ʋa, naa ɠa ga lɛbiya vaa. Kɛni ɠimalala nui ɠa a ɗa woizuɓɔlɔ, é lɔ su. 
Dɔɔʋɛ nui la ɠɛ kɛɛni, é ʋa wozai woli ma yeeɠɛɠalai, ani la ɠɛa ná, nii a teʋe molo leʋei zu. 
Kisiɛiti ti nuɓusɛi yiimaʋɛ, ta ga ziɛi buuzeiɗai, keleɠele nui ɠa soogai ta zaɠazu. 
Nu mɔinmɔin ka ɗa ná-wooɠɛɠiladai zulɛ, kɛlɛ mini ɠa sɔɓelama nui a ɠa ná? 
Telebo nui ɠa ziɛzu ná-sɔledai zu, undaanɛɛ vaa wola ɠa naa, ná-dointi bɛ, a zeɠena naa. 
Siɛgi zu masagi zeizu la tukpɔɠaaleʋezuʋɛ, toɠa ɗa faa ɲɔi yɔɠɔzuɠa, ga wɛlɛ laa ɠilagi nɔ. 
Ɓɛ ɠa a zoo é ɠɛ ma: «Zìimaʋɛ ɠoleaʋena, gè ɲadega koto la mɔ bà?» 
Nu kiloi ta kɔɠɔ ganii ma zii felegɔiti seɠe, é ʋa nuiti yaava, naa ɠa ga Ɠɔoɠɔ GALAGI maaɲɛɛi ba vaa. 
Zunu loungoi ɠa ɗa ɓɔɠɔ ɠɛʋele lɛ ga ná-kɛɛwotiiti, nu ka ni sɔgi ɠa ʋa, é zɔle. 
Nu woiyeɠei é faa mɛnisu, nu ɠaazuʋɛ é wozaɠaazu, Ɠɔoɠɔ GALAGI ɠa é ti ɠilagilagi pɛ kpɛtɛa. 
Mina ɲiimɛnii wola nɛɛ ʋɛ, è mina gaaɓela baladai zu. Wuzeɠe ga sobuzobui, ɗa daamiani sɔlɔɔ, è ɓɔlɔ ba. 
Ani ɠeya nui ɠa ɗa ɠɛ ma: «É la ʋani! É la ʋani!» Kɛlɛ a zeɠena ná, é ɓɔɠɔ maamusɛ ga anii naa zɔlɔɔ fai. 
Zanugi ma vaa la ɓaani, kɔbu ani ʋagɔi mɔinʋɛ, kɛlɛ anii nii fizɔgai ti pɛ ba, naa ɠa é ga, nu laawooi é faaɠwɛgi veezu. 
Ni nui ta a ɓɔɠɔ ɠɛna ga zeelaga è ʋɔ bɛ, é ʋilɛ nui ta ná-kuye vaa ʋa, nii è la kwɛɛ, ná-seɠei zeɠe ga kpɔunmai, nui naa ná-faa zu, nii è la kwɛɛ. 
Daamianigi unmaai, mɔunpa toɠa ɗa nɛɛ, kɛlɛ naa ʋolu, toɠa ɗa ɠɛ ga kɔtui, é nui laaʋɛ laave. 
Faiti ti ɠazaʋisu, ti laa ɠa ɗa zeeli ga tɛnɛ pagɔiti maaʋele. Ɗa ɠɛna lia kɔɔmaʋɛ, gaalugi wo, è faiti kpɛtɛ. 
Zɔi é fama ɓɔɛi vazasu, naa ɠa dɔɔɠuzu vaiti kulazu. À mina ɓɔ faa ma, wa nuiti ti kpɔɛzuɠula ɲakaiti bosu. 
Zɔi a kɛɛɠɛ voovo ta dee, zii ɠa loo, eɠɛ lanboi é zaazu kpidi ɓɔii zu. 
Poganii sɔlɔɔgai ga gaazuvilɛi mɔunpagi zu, tuya la ɠɛa ma naa ʋolu. 
Mina ɠɛ ma: «Nà nɔ̀nɔ ʋotokula!» Ɠito Ɠɔoɠɔ GALAGI ʋa, toɠa è ɠizo. 
Ɠɔoɠɔ GALAGI maaɲɛɛ ɠa ga kɔɠɔ ganii daa la zeelini, é la vaa zɛɛ ɠiloi wu. 
Ɠɔoɠɔ GALAGI ɠa é losu nui luɠɔ ná-eteai zu. Nuɓusɛi ɠa zoo ɠale é pelei ɠwɛɛ, nii é ziɛzu la? 
Polu la ʋani nui ma, è ʋa ani ve Ɠɔoɠɔ GALAGI ʋɛ ga gaazuvilɛi, ɓaa è minazeɠe pɛ, è ʋa leɠa ɠigaiziɛ su. 
Ɠima masagi ɠa ɗa faa ɲɔu ɠɛ nuiti so, é faa la ti ma, maawɔinɠa la su. 
Nui ná-faaɠaaɠaa ɠigi ɠa ga lanboi, nii Ɠɔoɠɔ GALAGI feai, toɠa é nui yiimaʋɛ vaiti pɛ fɛɠɛlɛfɛɠɛlɛsu. 
Nuɓɔɠɔlai ta wooɠɛɠiladai ɠa a ɗa masagi makɛ, ná-nuɓɔɠɔlai ɠa é ná-masa kpɔkpɔgi zei ʋele ɓɛtɛzu la. 
Zɛbɛi ɠa é ga buzeɠe niinɛgiti ta-ʋadai, kɛwola ʋɔlɔiti ta-unfemai ɠa é ga undeɠa ɠolegi. 
Maawana ʋalai ɠa ga faa ɲɔi ɠɛdɛ salei, zekana é la, doɠai ɠa ɗa zeeli kisiɛiti ma, niiti ti lɔɔɠuai. 
