﻿Tɛnɛ Faalaaliiti.
30.
Yakee ná-doun zunui Aguul ná-kpɔɛiti. Zunui nii ná-deve wooiti ti Itiyɛle ná-faa ma. Itiyɛle ná-faa ma, ta Ukale. 
Gaama ʋe, nà ga ɠimalala nui, gè leʋe nuɓusɛiti kpein ba, nuɓusɛ ɠeleɠelegi la zèa. 
Gè la ɠimalai ɠalani, gè la GALA Ɲadegai ná-faaɠwɛgi ɠwɛɛ. 
Ɓɛ ɠa é lɛɛni geeɠɔlɔgi zu, GALA pɔ bɛ, é zeɠe ná, é yei? Ɓɛ ɠa é fiilɛi zoga, é yɛ zea? Ɓɛ ɠa é ziɛiti pua ná-seɠei la? Ɓɛ ɠa é zooi ɠwɛgiti kpein daa? Daasei ka ɓɛ, ná-doun zunui laasei ka ɓɛ? Bo dɛɛ, ni è kwɛɛ! 
GALA daawooi ɠilagilagi pɛ ka ga gaamai. Toɠa ga kɔɔɠɔ zɛpɛgi naati bɛ, niiti ti lɔɔɠuzu bu. 
Mina tanɔpɛ da daawooiti ma, ni naa laade, toɠa è loɠa, è ʋɛtɛ ga zɛɛ nu. 
Ɠɔoɠɔ GALAGI, nà faa felegɔ valizu è ma, naati kɛ bɛ̀, aisa nà-eteai ʋa ɓe: 
màkɛ, gè mina kpɔɛ ɲaka wo, ɓaa zɛɛiti, mina kɛ̀ ga bala nu, ɓaa kpɛtɛ nu wola. Naa ve zèa nɔ, nii fizɔgai mà, gè eteai ziɛ. 
Mazɔlɔɔ anii pɛ ga ʋooʋana zèa, nà ʋa lia ɠɛlɛzu è ʋa, gè ʋa ɠɛ ma: «Ɓɛ ɠa é ga Ɠɔoɠɔ GALAGI?» Ɓaa mu, maanɔɠɔi a ɓɔina dà, gè ɓɔɠɔ ɠɛ ga unma nu, gè ɓaaɠula nà-GALAGI ma ɠana. 
Mina va botiɠɛ nu ma, maliɠii ɠaazu. É mina è voovo, ɗa-vaaɠaazagi ma ɠasɔi ɠa la è unma. 
Nui tanigaa ta ná, ta ɗa ti-ɠɛɛ ɠoto, ti la tuya loa ti-lee ʋɛ. 
Nui tanigaa ta ná, ti ɓɔɠɔ ɠaazu ga ti ɲadegɛ, tama, ti la gbani, ti ʋa ɠula ta-ɠɔzɔba vaiti su. 
Nui tanigaa ta ná, ti ɠaazulɛai, ti ɗa wɛlɛ nui pɛ ba fawuu. 
Nui tanigaa ta ná, ti-ɲiigaiti ti ga boɠa zɔkpɔiti, ti-ɓalɔ ɠaeiti ti ga boɠaiti, ti ɗa maanɔɠɔ nuiti mi, ti ʋa ɲɛɛlɛ, ti ɠula eteai zu, ti ʋa bala nuiti suwuɠaaleʋe, ti ɠula nuɓusɛiti saama. 
Moolɛi ná-doun anzanuiti ti fele, ti-laasei ka ga: Fe! Fe! Ani saʋagɔ ɠa ná, ti-yii la lɛiɗa eyɛsu pɛ, eyɛsu pɛ ti la ɠɛa ma: «É kula ɠɛa.» 
Gɔvɛalaazu, doun zɔlɔɔtala anzanui, zooi, nii ziɛ la ga kpɔɔle wɔinzeɠe ma, kɛlɛ ti-naanisiɛi ɠa ná ɓalaa, abui, nii é la ɠɛa ma: «É kula ɠɛa.» 
Nui ɠaazuɠɛzɛiti é ɲɛɛɠulazu la kɛɛɠɛ zu, é ɗa woozotalai ɠɛ ga dee, kɔtuɗɛi ma ɠalawɔniiti ta ti ɠula su, koɠɛ yiʋoiti ti ti mi. 
Faa saʋagɔ ɠa ge la dɛ gaaɠaani, kpudɛai màazu: 
koɠɛi ɠoʋe pelei geezuʋɛ, kaalii ɓokpo pelei fasai ma, ɓatoi ná-pelei kpoloɗɛi zaamaʋɛ. Kɛlɛ naanisiɛi ɓalaa ɠa ná: zunui ziɛ ʋelei é lo anzalopoi ʋa. 
Wɛlɛ ʋelei wɛɛnzo anzanui a ɗa kɛ la: a yiima vaiti kɛɛna ziilɛi, é laamaʋɛ ɓale, é ɠɛ: «Gè la faa ɲɔu nɔpɛ kɛɛni.» 
Faa saʋagɔ ɠa ná, niiti ta ɗa eteai ɲiikpi, é la ziaa bu: 
duɔi a zeina ga masagi, ɠimalala nui a zobo sɔlɔɔna, é ɗa ɠɔnɔgi zɔlɔɔ, 
anzanui kɛlɛbai wogai da, naa a zeina zini bɛ. Kɛlɛ naanisiɛi ɓalaa ɠa ná: duɔ anzanui é zeizu duɔ dee ʋotogi zu. 
Sua naanigɔ ɠa ná eteai zu, ti wola lɔiɗai gola, anɛɛ naa ʋe, ti wola ɠigɛ dageleʋe: 
pupuiti, zɛbɛ nɔpɛ ge la ti ʋa, kɛlɛ ta ɗa ti-ɠɔnɔgi ɠɛʋele ɓɛtɛ foɠoi, 
fasa woliiti, zɛbɛ la ti ʋa, kɛlɛ ta ɗa ti-ʋuuzuʋɛ ɓɛtɛ fasaiti su, 
kotogiti, masa ge la ti unda, ta ɗa ɓɔɠɔ zei su, ti ma ɓulugi ɗa ɠula, 
kooloiti, niiti nu a ɗa ti zo nɔ ga yeei, ta ɗa lɔ masagiti ta-masa pɛlɛiti bu. 
Fuluani saʋagɔ ɠa ná, ti ziɛ ʋelei, ta ti maanɛɛ ʋelei ga pɛtɛ gani: 
zalai, nii ziilɔai é leʋe suaiti pɛ ba, é la ɠula ʋolu nu nɔpɛ bɛ, 
tɛɛ zinɛi, nii a ɗa ɠaalɔ kɔɠɔʋolu valagiti ga, ɓaa mu boli zinɛi. Kɛlɛ naanisiɛi ɓalaa ɠa ná: masagi é loni ná-kɔɔʋɛbɛi untuɠɔ, ti ɗa li. 
Ni è ɠɛni ga ɠimalala nui, è ɗa waso, ɓaa ni è ɠɛni kigaiziɛ ɲɔiti bosu, za ʋoluma, ɓɔɠɔ zo. 
Mazɔlɔɔ nɔnɔi loɠaai ɠa nu a ɗa gulɔi zɔlɔɔ da, sokpa loɠai ɠa ɲamai a ɗa ɠula su, ziiɠaawanai ɠaazulɛai ɠa kpɔɛi a ɗa ɠula su. 
