﻿Zakali.
2.
Gè ɠaazuwuzeɠeni, gè minɛ naanigɔ ɠaani kulakɛlɛmai taɠili su. 
Gè ɠɛni geezuɠeelai ma, é ɠɛni ɓɔɛzu pɔ̀: «Minɛi niiti ta ga leeni?» É gòoɠaaʋoteni, é ɠɛ mà: «Minɛi niiti ka ti Zuda zuvazagai, naa ʋɛɛ Izelayɛle ta Zeeluzalɛme ʋa.» 
Ɠɔoɠɔ GALAGI ɠain bo nu naanigɔ lɛɛni ga ze. 
Gè ɠɛni ma: «Leeni ɠa ti ʋaazu kɛɛzu?» É gòoɠaaʋoteni, é ɠɛ mà: «Ɠain bo nui niiti paaʋɛ ga ti zii ɠiligi naati kpɔlɔ, ti ti-minɛiti suɠale, tɛigiti ti-minɛiti buzeɠeai Zuda yooi laalɔɠɔma ga ti su nuɓusɛiti suvaza. Minɛiti ka ti Zuda ta Zeeluzalɛme nuɓusɛiti suvazagai ga kɛʋele ɲɔu, nu nɔpɛ ge la mɔ ɠɛa zoosu unbuzeɠezu.» 
Gè ɠaazuwuzeɠeni, gè zunu ɠila ka, kɔɠɔ galui zoni zea. 
Gè ɠɛ ma: «Mini ɠa è liizu ná?» É ɠɛ mà: «Nà liizu Zeeluzalɛme ɠɔɠɔsu, gè sakpai, ta kogi ɠwɛɛ.» 
Geezuɠeelai nii é ɠɛni ɓɔɛzu pɔ̀, naa maaɓuɠani geezuɠeelai taɠili ba, nii é ɠɛni daaɠomisu. 
É ɠɛni naa ma: «Ɓizɛ, è ɓɔɛ zunu loungoi nu ʋɔ, è ɠɛ ma: ‹Zeeluzalɛme ɠa ɠɛɛzu ga taai, siɠi nɔpɛ ge la mɔ ɠɛa ma, tɔɔzei nuɓusɛiti ta toganiiti mɔin ʋelei ʋa, niiti ti ɠɛɛzu ná.› 
Ɠɔoɠɔ GALAGI wooi ɠana: ‹Nà ɓɔɠɔi ɠa gè ɠɛɛzu maaɠoolii zu eɠɛ abu ziɠigi, gè ɠɛ ma taazuʋɛ ga ná-lɛbiyai.› » 
Ee! Ee! À ʋela! Wo ɠula lɛkpɛma ʋelei nu ɠɔʋɛzuʋɛ yooi tɛi ba ga suvilɛ! Ɠɔoɠɔ GALAGI wooi ɠana. Mazɔlɔɔ gè wo zuvazagɛ geeɠɔlɔgi wu ʋepema naanigɔi pɛ, Ɠɔoɠɔ GALAGI wooi ɠana. 
Ee, Siyɔn nuɓusɛiti, à ʋela, wɔi wo zeini Ɓaɓilɔne taazuʋɛ. 
Mazɔlɔɔ Ɠɔoɠɔ GALAGI Fai-Pɛ-Maliɠii wooi ɠaa: Tɛigi é tèʋegai ga ná-zobogi, zooi naati daalɔɠɔma niiti ti loai wo ma, é ɠɛ ma: «Zɔi nɔpɛ é vɔɔɠuzu wo ʋa, naama nui vɔɔɠua gàazuleegi ʋa. 
Wɛlɛ, nà yeewuzeɠezu zooi naati daalɔɠɔma, ta latisu ti ɠɛ ga ta-luɔiti zeezu ani.» Wa kwɛɛ naazu ga Ɠɔoɠɔ GALAGI Fai-Pɛ-Maliɠii tèʋegɛ. 
«Wa ʋe de, Siyɔn nuɓusɛiti, à ɠoozunɛ! Wo wooɠula ga koozunɛɛi, mazɔlɔɔ nà ga ʋa gè zei wo zaama, Ɠɔoɠɔ GALAGI wooi ɠana. 
Naama volo ná, zii ɠiligi ma mɔinmɔin ka ʋa, ti ɠili Ɠɔoɠɔ GALAGI ʋa. Ta ɠɛ ga nà-nuɓusɛiti, nà zei wo zaama.» Wa kwɛɛ naazu ga Ɠɔoɠɔ GALAGI Fai-Pɛ-Maliɠii ɠa é tèʋegai wo ma. 
Ɠɔoɠɔ GALAGI ɠa Zuda zeɠe ʋolu ga nɔnɔi, zou ɲadegai zu. É yiimazeɠe ʋolu ga Zeeluzalɛme. 
Eteai pɛ ge maaɠɛ kpɔ mu Ɠɔoɠɔ GALAGI ɠaazu! Mazɔlɔɔ toɠa na ɠula ga suvilɛ sei ʋɛlɛ ɲadegai wu. 
