﻿Zakali.
11.
Liɓan, ɗa-laaiti daalao, abui ʋa é ɗa-sɛdele guluiti gala. 
Sipɛlɛ guluiti, à ɓalakpala ɠoozu, tɔɔzei sɛdelegi loa bu, mazɔlɔɔ gulu maanɛɛnɛgiti ti ʋɔga. À ɓalakpala Ɓasan sɛne guluiti, mazɔlɔɔ goya wolai ɠoloa, nii nu nɔpɛ ge la ɠɛa lɔɔzu ba! 
Nu ɠa baala makɛ nuiti kpala gooi mɛnisu, mazɔlɔɔ tufa lɛtɛi ti ɠɛa wokomaalɛɛzu la naa ɠoloɠologa. Nu ɠa zalaiti sikɔ wooi mɛnisu ɓalaa, mazɔlɔɔ Zuludɛn ma lɔɓɔ ɓiili wolai, ti ɠɛa wokomaalɛɛzu la naa ɠoloa. 
Nà-GALAGI, Ɠɔoɠɔ GALAGI ɠɛni ma: «Ɠɛ ga baalagi tɛiti makɛ nui, niiti ti leveai na saai ma. 
Tɛigiti ti ti ɠeyazu, ti ɗa ti ʋaa wafuun, ti ʋɔdi nuiti ti ɗa ɠɛ ma: ‹Mamagi ɠa Ɠɔoɠɔ GALAGI ʋɛ, mazɔlɔɔ gè ɓɛtɛa!› Ti makɛ nu ɓɔɠɔiti ti la vɔlɔ ti maawɔinɠaazu.» 
Nɔ̀un nà, Ɠɔoɠɔ GALAGI, gòoi ɠaa: «Gè la mɔ zooi nii zu nuɓusɛiti maawɔinɠaa pɛ. Mazɔlɔɔ nà nuiti zɛsu ɓɔɠɔ yeezu, tanigaa ti ɗa ti-waiti suziɠa, gè ti yɛ ta-masagiti zeezu. Ta-masagiti ta zooi ɠoloɠolo, kɛlɛ gè la nu nɔpɛ kula ti ya.» 
Gè tɔɔzeini ga baalagi naati makɛga, niiti ti leveai na saai ma, ma un ge da ma mɛɛ ga zɔiti ti maawɔinni baala kpulugi zaama. Gè baala makɛ tukpɔ felegɔ vaaɠɛɛni ɓɔɠɔ ʋɛ. Gè ma mɔungi laasei pɛɛ ga ‹Zaalai,› gè felesiɛi laasei pɛ ga ‹Gilibai.› Gè zɛba gè ɗa ɠaaɓa baalagiti ma. 
Alu gilagi laawu, gè makɛ nu saʋagɔiti kpɛɛni. Naa ʋoluma, zìi la ɠɛni lɔɔni baalagiti bu, tiya ɓalaagi wɔ̀inzeɠe ti ma. 
Gè ɠɛni baalagiti ma: «Gè la mɔ wo ɠɔnɔkula pɛ! Zɔi é zaazu, naa za! Zɔi ta ɠɛ paazu, naa ɓɔɠɔ yɛ ná, ti paa! Zɔiti ta yɛ vulua, naati ti ɗa ɓɔɠɔ mi yɔɠɔzu.» 
Gè nà-tukpɔi zoni, nii daa ga ‹Zaalai,› gè galeɠale, naa ɠɛ ga nà-minazeɠegi ɠoloɠologa, nii é ɠɛa gi yɔɠɔzu gá ziiti pɛ. 
Minazeɠegi naa ɠoloɠoloni naama voloi nɔ. Baalagi niiti ti wola maawɔinɗai, ti ɠɛni wɛlɛzu bà, naati ti kwɛɛni ga, Ɠɔoɠɔ GALAGI ɠa é ɓɔɛzu ga niima vaiti maaʋele. 
Gè ɠɛni ti ma: «Ni wa kaana ga soloo faa ʋe, a sàlai ve zèa, ɓa wo zɛ ná.» Ti wali ɠae ʋuusaʋagɔi (30) ɠaaluni, ti fe ga sàlai. 
Ɠɔoɠɔ GALAGI ɠɛni mà: «Walii é ti ɠaazu ga ma ʋagɔi, naa ʋili ya diɠi lo nui ma, nii ti kaai ga nɔ̀un sɔngɔi.» Gè wali ɠae ʋuusaʋagɔi (30) zeɠeni, gè pili ya diɠi lo nui ma, Ɠɔoɠɔ GALAGI ná-pɛlɛi wu. 
Naa ʋoluma gè nà-tukpɔi velesiɛi «Gilibai» ɠaleɠaleni, naa ɠɛ ga kɛɛɠɛlounlai ɠoloɠologa Zuda ta Izelayɛle yɔɠɔzu. 
Ɠɔoɠɔ GALAGI ɠɛni mà: «Ɓɔɠɔ maaɠili niina ga baala makɛ nui ná-sɔɔlaiti, nii é ɠɛɛzu ga ɠimalala nui. 
Mazɔlɔɔ nà baala makɛ nu ɠila buzeɠezu zooi nii zu, nii é la yiizoolɛa ga baalagiti, ti ɠɛɛzu ti za, é la baala goiti gaiziaa, nii maawanaai é la naa ʋaloa, nii kɛdɛgai é la naa ɠɔnɔkula. Kɔnɔgi ɠa ɠɛ ga togani niiti ti wulɔai naati ma zuaiti, é ɗa ti-ʋolokagiti baliʋali.» 
Maanɔɠɔ ɠa ɠimalala ʋaala makɛ nui ʋɛ, é ɠɛlɛzu ná-baala kpulugi ʋa! Tɛigi boɠa zɔkpɔi zeei zu vikɛi ɠoloɠolosu, ta é zeezazu ʋele ɠaazuɠɛzɛgi wolo su! Zeei za ma faan, ta zeezazu ʋele ɠaazuɠɛzɛgi za su faan! 
