﻿Exodus - Oputawanana.
34.
Bada, Moses i riwei, “Ḡaima ruaḡa dabadabai ma bori inanana me ruaḡa u wamawamaia, ma au tepana riwana tagogina ana girumi me au naona. 
Ma vokaukaua ma ubaubanai ma ḡei ola Sinai au tepana ma nebeleu.” 
Ma Moses, ḡaima ruaḡa i bori me au naona nanare. Ubaubanai boiboḡi ḡaimai i voai ma i ḡae au ola Bada i ririwei nanare. 
Ma Bada apauei i ḡairai ma au ririvana i raumairiei, ma wavana i latoni, “Bada!” 
Ma Moses au naona i babara ma i viḡoreḡore, “Tau maemae nonoana! Tau rarau-nuapoapoeu ma iviu aiaina, tau eḡa laḡilaḡina amlou ita voḡaiḡai. 
Au nuavaina maemaena ina mae au rava awarii da kimta tausan ina kwa ma kaua apoapoe, mae-ḡaeḡae ma ḡoʼapoapoe ina nota-tawanei. Wate tauna eḡa kaua apoapoe taukauei ita inana-tawanei, natunatui ma ḡoḡoḡai, amamai i kaukauei kovoḡana e vaivaia da kimta vitonuina da vi-four-na.” 
Moses maratagogi i mae-peu au doa ma Bada i viborumei. 
I riwa, “Au bada mepa da riwa kaua da tam nuanuau u vaia, a vivibaḡaim da uta vinao ma tata nae. Wei ravai orai badobadoi, wate ai kaua apoapoe ma ai ḡoʼapoapoei ma nota-tawanei, ma ma vai-meleiai am buderi.” 
Bada, Moses i riwei, “Ma rautaniḡana! Au parivainuaḡana bagibagina tam maiteni a kaukauei am patara Israel maiteni. Ma au matami kaua ḡaeḡae aniba kauai ana kauei. Eḡa melanai aiai wenanare ita kauei au dobu. Rava anatapui au ririvami e mamae, au rewapana ina inanai da tau, Bada kaua ḡaeḡae ana kauei aubaimi.” 
Moses kampa i mae Bada maiteni au pom 40 ma waguvarai 40, eḡa ita am ma eḡa ita uma nai au marana. Ma Bada ḡaima au tepana parivainuaḡana riwai - Tarawatu 10 i girumi. 
Moses ḡaima ruaḡa au tepai parivainuaḡana riwai i vinimavoei ma ola Sinaiei i ḡairai. Wate eḡa malana ita vaia da naona i lalalai aubaina tauna Bada maiteni i babani. 
Aaron ma Israel patarai i ʼnanai da Moses naona i lalalai ma awarina naena i rovoei. 
Wate Moses taui i ḡorei, ma Aaron ma dogadogara i nei awarina, ma awarii i babani. 
Ma mai Israel i riei Moses awarina ma tarawatu ola au tepana i vereverei rava i pariverei. 
Moses naona garei i purui maranai awari i babani-vorovei. 
Maranai Moses e ruirui au numagara da Bada maiteni ina babani, ḡarana naona i purupurui lamna, e vovotawanei. Ma e opuopu memei ma Bada aiwai i riwei mai Israel e paripariverei, 
ma mai Israel, i ʼnanai da Moses naona i lalalai. Lamna maranai Moses naona i puru-melei da ina rui me da Bada awarina ina babani. 
