PESALEM.
149.
Aleluja. Anam wê wakuc êndêŋ Apômtau. Aweŋ êôc eŋ aŋga ênê lau mansaŋ ŋalêlôm. 
Israel têtu samuc nêŋ ŋac, taŋ kêkêŋ êsêac naŋ. Sion latui aweŋ êôc nêŋ kiŋ toôndugeŋ. 
Êsêac têtê wê sêlanem ênê ŋaê sênac oŋ to gêŋ wêŋa êtaŋ. 
Apômtau têtac gêwiŋ nê lau ma kêkêŋ lau palê-palê sêku nêŋ ŋacjo tulu. 
Anôtônê lau têtu samuc eŋ to sênam lasê to ôliŋ êpi sênêc nêŋ mê ma aweŋ êôc eŋ toôndugeŋ. 
Êsêac sêlambiŋ Anôtô to aweŋ êpigeŋ ma sêmêŋgôm siŋ ŋamata makeŋ-makeŋ 
gebe sêkac nêŋ kamocgôc aŋga lau samuc nêŋ ma sêkêŋ ŋagêjô êndêŋ tenteŋlatu. 
Sênsô êsêacnêŋ kiŋ ŋa kapoacwalô tôŋ ma sênsô nêŋ lau mata tôŋ ŋa kapoacwalô ki 
gebe sêŋgôm biŋ, taŋ Anôtô kêkic wanêcgeŋ naŋ, êtu tôŋ êpi êsêac. Biŋ tonaŋ ketoc Anôtônê lau samob sa. Aleluja.