﻿Yaburina.
59.
Dawudaa maxandi ɲaxumɛna, bɛti baane kuntigin xa. A xa ba alo bɛtin naxan xili: “I Nama Halagin Ti,” a naxan ba Sɔli to sofane xɛ e xa sa e luxun Dawuda yɛɛ ra a banxini a faxa xinla ma. 
N ma Ala, n xunba n yaxune yii. N natanga ne ma naxanye kelixi n xili ma! 
N xunba fe ɲaxi rabane yii. N nakisi na muxu faxane ma! 
A mato, e n legedenma n faxa feen na. Sɛnbɛmane e malanma n xili ma. N mi i matandixi, n mi yulubi ligaxi, Alatala. 
N sɔnna mi a ra, koni e yitɔnxi e xa n yɛngɛ. Keli, i fa n mali! Yandi n mato! 
Alatala, Ala Sɛnbɛn Birin Kanna, Isirayilaa Ala, keli! I yi siya dɛnkɛlɛyatarene fe ɲaxine saran e ra. I nama diɲa yanfanten ɲaxine ma mumɛ! 
E fama ɲinbanna ra. E xaɲɛ alo barene taan xun xɔn. 
I tuli mati e konbi ti xuine ra. E lɛnne luxi nɛn e dɛ alo silanfanne, e mɔn a falama, e naxa, “Nde nɔɛ en ma falan mɛ?” 
Koni Alatala, i gelema e ma. I siya dɛnkɛlɛyatarene birin magelema. 
Ala n sɛnbɛna, n xaxili tixi i tan nan na. I tan nan n ma faran makantanxin na. 
N ma hinantenna Ala, a tima n yɛɛ ra nɛn. A a liga, n na n yɛɛn nagodo n yaxune ma. 
Koni, i nama e faxa, Marigina, nxu yɛ masansan wure lefana. Nanara, n ma muxune mi ɲinanɲɛ. E raxuya ayi i sɛnbɛni, i yi e nɔ. 
Bayo yulubi falane e dɛ e xa suxu e yɛtɛna wasona fe ra! Bayo e dangane tima e wulene falama, 
e ɲan i ya xɔlɔni! E ɲan fefe! Sese nama lu! Nayi, birin a kolonma nɛn fa fala Ala mangayaan nabama Yaxuba bɔnsɔnna xun na han bɔxɔn danna birin. 
E fama ɲinbanna ra. E xaɲɛ alo barene taan xun xɔn. 
Barene nɛma donse fenni, xa e mi lugo, e wurundunma nɛn. 
Koni n tan i sɛnbɛn matɔxɔma nɛn bɛtini. Xɔtɔnni, n na n ma bɛti xuini tema nɛn i ya hinanna fe ra. Bayo, n ma faran makantanxin nan i tan na, n na n yigiyama dɛnaxan yi tɔrɔ waxatine yi. 
N sɛnbɛna, n bɛtin bama i xa nɛn. I tan Ala nan n ma faran makantanxin na n ma hinantenna Ala. 
