﻿SALMO KA'.
1.
Ba nez ẕen naken che bennen' bi ẕzi'e da' ẕzejní'igekle benne' wen da' ẕinnj ka' ḻe', na' bi nake' toze ḻen benne' doḻa' ka', na' bi žónḻene' tẕen benne' ka' ẕzóagake' Dios cheḻa'ale, 
san žebele' dan' žone' kan ẕchi'le X̱anžo Dios, na' kan nak dan' wnnakze' Ḻe', dot ža dot yel ẕlab ḻaže'en. 
Benne' ni nake' ka to yag da' zoan žoa'a yegw, da' ẕbian da' ẕix̱ chen ḻo byo' chekzen, na' x̱lagen bi žasen. Yógo'te da' žon benne' ni, želžój chawen', 
san benne' wen da' ẕinnj ka' kege ki zej nake'. Zej nake' ka to laga' biž dan' žoa be'. 
Bi yežojgak chawe' benne' wen da' ẕinnj ka' kate' wchi'a ḻaže' Dios ḻégake', na' bi chó'ogak benne' doḻa' ka' gan zej ndobe benne' chawe' ka' ḻaw Dios. 
Žaz ḻaže' Dios da' žongak benne' chawe' ka', san da' žongak benne' wen da' ẕinnj ka' chen' ḻégake' gan kwia yí'gake'. 
