﻿SALMOS.
2.
¿Biẕ chen' ẕži'igak benne' yógo'te yež ka' che Dios? ¿Biẕ chen' ẕlab ḻáže'gak benne' ka' da' ẕzoan Ḻe' cheḻa'ale? 
Ẕži'igak benne' wnná bia' ka' chie' Ḻe', na' benne' yolawe' ka' žóngake' toze diža' nich wží'igake' che Dios, X̱ángake', na' che Bennen' wžé Dios chekze'. 
Ẕnnágake': “Yebéj kwinžo ḻo ná'gake', na' wzoažo cheḻa'ale da' bchí'igekle' žo'o.” 
Gan že' X̱anžon' ya'abá chie' žẕiže'. Žon ditjle' da' žek ḻáže'gake' góngake', 
na' ḻo yeḻa' ẕža'a chie' ẕdiḻe' ḻégake', na' ḻo yeḻa' yichj ža'a chie' ẕchebe' ḻégake'. 
Ẕnne': “Ḻo ya'a la'y chia', Ya'a Sión ba bzoa' Bennen' nna bi'e ḻo wlaza' neda'.” 
Ẕnna Bennen': “Wzenla' ḻe'e da' gož X̱anžon' neda'. Gože' neda': Le' nako' Ẕi'na'. Na'a ža naka' x̱o'. 
Wnnable neda', na' gonna' Le' yógo'te yež ka', na' gak chio' dot yežlyó. 
Wchinnjo' yež ka' ḻen to bar ya, na' ka to že'e yo wzoẕjo' ḻégaken.” 
Na'a, ḻe'e, Benne' wnná bia' ka', le yenle da' ni da' ẕzejni'ila' ḻe'e. Le wsedle da' ni da' ẕzenla' ḻe'e, ḻe'e na' ẕnna bia'le ḻo yežlyó. 
Le gon da' ẕnna X̱anžo Dios, ḻo yeḻa' ẕžebe chele, na' ḻo yeḻa' žeẕize chele, le yebele ḻawe' Ḻe'. 
Le gape ba la'ne Ẕi'ne' nich bi že'e, na' bi kwia yi'le ḻo nez chele, dan' ḻa' žá'atie' Ḻe'. Ba nez ẕen naken chegak yógo'te benne' ka' žx̱en ḻáže'gake' Ḻe'. 
