﻿SALMOS.
3.
X̱ana' Dios, ba nyanḻe'e benne' ka' ẕžá'agake' neda'. Benne' zante ẕdíḻ-ḻengake' neda'. 
Benne' zante ẕnnégake' chia', na' ẕnnágake': “Bi yeslá Dios ḻe'.” 
San Le', X̱ana' Dios, žape chi'o neda'. Nako' yeḻa' baní' chia', na' ẕzo' neda' chawe'. 
Wžéžyi'a, na' bḻiža' X̱ana' Dios, na' Ḻe' bechebe' chia' gan zoe' ḻaw ya'a la'y chie'. 
Gota'a, na' wtasa', na' bebana' dan' ben choch X̱ana' Dios neda'. 
Bi žeba' chi mil benne' ka' ẕdíḻ-ḻengake' neda', benne' ka' zej nyechjle' neda'. 
Wyás, X̱ana' Dios. Beslá neda', Dios chia', na' wdáp x̱ága'gak benne' ka' ẕdíḻ-ḻengake' neda', na' bdichj láye'gak benne' wen da' ẕinnj ka'. 
Yeḻa' weslá za' ḻo no'o, X̱ana' Dios. Ben chawe' benne' chio' ka'. 
