﻿SALMOS.
4.
Bechebe chia' kate' žḻiža' Le', Dios. Le' ẕchi'a ḻáže'kzo' da' žona'. Kate' wzóa' ḻo da' zede, Le' ben chocho' neda'. Beyache' ḻaže'l neda', na' benle da' ẕcháḻjḻena' Le'. 
Ẕnna Dios: “Ḻe'e, benne' ka', ¿to chi'ize wzoale neda' cheḻa'ale? ¿To chi'ize ží'ilele da' bi be zaka', na' chejḻe'le da' wen ḻaže'?” 
Žaḻa' nnézlele ba wžé X̱anžo Dios bennen' žape' Ḻe' ba la'ne. X̱anžo Dios yenle' chia' kate' wḻiža' Ḻe'. 
Le žebe ḻaw Dios, na' bi gonle doḻa'. Le wláb ḻaže' chie' kate' dele gan ẕtasle, na' le soa žize. 
Le got biado' ka' ḻawe' Ḻe' ḻo da' nak chawe', na' le wx̱én ḻaže' X̱anžo Dios. 
Benne' zante ẕnnágake': “¿Noẕ benne' gon chawe'e neto'?” Ḻo yeḻa' ži'i ḻaže' chio' bwia neto', X̱anto' Dios. 
Le' bzo' yeḻa' žebele ḻo yichj ḻáẕda'wa', dan' nakžen ẕen ka da' zej nape benne' ka' zej nápḻi'e ẕoa', na' x̱is uba waḻ. 
Ḻo yeḻa' ẕga'n chawe' gata'a, na' tasa', dan' ẕnno' Le', X̱ana' Dios, naka' chawe' ḻawo' Le'. 
