﻿SALMOS.
5.
Bze nag da' ẕnnia', X̱ana' Dios. Be' ḻaže' kan ẕbeže ḻaža'a. 
Le' nako' X̱ana', na' nako' Dios chia'. Benle da' žḻiža' Le', dan' ẕcháḻjḻenteza' Le'. 
X̱ana' Dios, chbal-le yenlo' chi'a. Zildo' ḻa'kza' ḻawo' Le', na' kweza' da' yi'o neda'. 
Nako' Dios bi žaz ḻažo'o da' bi nak chawe'. No benne' žone' da' ẕia bi soakze' gan zo' Le'. 
Bi žo'o latje ḻa'gak benne' wen da' ẕinnj ka' ḻawo'. Bi ẕḻe'elo' chawe' yógo'te benne' wen da' ẕinnj ka'. 
Ẕchinnjo' ližgak benne' ka' žon ḻáže'gake'. Ẕzo' cheḻa'ale benne' wetw benách ka', na' no benne' žon ḻaže'e, 
san neda' wak choa'a ližo' dan' nží'iḻe'elo' neda'. Wká'n ẕena' Le' ḻo yodo' la'y chio' ḻo yeḻa' ẕžebe. 
Bsedle neda' gona' da' chawe' ḻawo' Le', X̱ana' Dios, dan' ẕžá'aḻe'egak benne' ka' neda', benne' ka' bi ẕḻé'egekle' neda' chawe'. Bche' neda' nez chawe' chio'. 
Benne' ki bi ẕnnágake' da' naken da' li. Nža' yichj ḻáẕdo'gake' da' kegle. Lbá'gake' zej naken ka yežw ba ka' chegak benne' gat ka' da' nyáljwgaken. Ẕnnágake' diža' chawe' ka', san žon ḻáže'gake'. 
Ben zi' benne' ka', Dios. Ben ga chejchégwgake' ni'a che x̱tíža'gakkze'. Dan' nyanḻe'e da' bi nak chawe' da' žóngake', na' dan' bží'igake' chio' Le', bnnita' ḻégake' cheḻa'ale. 
San yebéḻe'egekle benne' ka' žx̱en ḻáže'gake' Le'. Kwežeyá'gake' ḻo yeḻa' žebele dan' žákḻeno' ḻégake'. Benne' ka' zej nži'ile' Le' yebéḻe'egekle' ḻawo' Le'. 
Gon cháwe'kzo' benne' chawe', X̱ana' Dios. Dan' žaz ḻažo'o bennen', gape chi'o ḻe'. 
