﻿SALMOS.
6.
X̱ana' Dios, bi tiḻo' neda' ḻo yeḻa' ẕža'a chio', na' bi gono' neda' zi' ḻo yeḻa' yichj ža'a chio'. 
Beyache' ḻaže'l neda', X̱ana' Dios, dan' bi zoa' chawe'. Beyón neda', X̱ana' Dios, dan' ẕzáka'ḻi'a. 
Že' zede yichj ḻáẕda'wa', na' Le', X̱ana' Dios, ¿batx̱ gákḻeno' neda'? 
Da, X̱ana' Dios, beslá be' da' nakkza'. Ḻo yeḻa' ži'i ḻaže' chio' beslá neda'. 
Gan zej nnita' benne' gat ka', bi žejsá' ḻaže' no benne' Le'. Ḻo latje chegak benne' gat ka', ¿noẕ benne' wká'n ẕene' Le'? 
Ba žedó ḻaža'a dan' ẕbeže ḻaža'a. Yógo'te yel ẕbise gan dia' ḻen nis ẕbeža'. Žesbisan' ḻen nis ẕbeža'. 
Ba nyejw yej ḻawa' dan' ẕbéžeḻi'a. Ba bebižkze nis dan' yožen yej ḻawa' dan' ẕžá'aḻe'egak benne' ka' žsáka'gake' neda'. 
Le kwas ga zoa' ni, yógo'tele žonle da' ẕinnj, dan' ženle Dios ẕbéžeḻi'a. 
X̱ana' Dios ba ženle' da' žáta'yoela' Ḻe'. Ẕzi' X̱ana' Dios da' ẕcháḻjḻena' Ḻe'. 
Žedoé'egekle, na' zej že' zedḻe'e yógo'te benne' ka' bi ẕḻé'egekle' neda' chawe'. De chgi' kwásgake' gan zoa', na' yedoé'egekle'. 
