﻿SALMOS.
7.
X̱ana' Dios, žx̱en ḻaža'a Le'. Beslá neda' ḻo na'gak benne' ka' žsáka'gake' neda', na' gokḻen neda', 
nich bi séngake' neda' ka žon bež yix̱e', na' bi wchéza'gake' neda' gan bi zoa no benne' gákḻene' neda'. 
X̱ana' Dios, cha' bena' neda' ki; cha' zoa bi da' ẕinnj da' ben ni'a na'a; 
cha' zoa bi da' bi nak chawe' da' bena' che no benne', bennen' ẕgá'nḻene' neda' chawe', (san neda' gókḻena' bennen' bi ẕḻe'ele' neda' chawe' ḻa'kze bi be bena' chie') 
cha' ki bena', be' latje bennen' bi ẕḻe'ele' neda' chawe' kwia ḻaže'e neda', na' sene' neda'. Be' latje bennen' wleje' neda' ḻo yo, na' wca'ne' ca'ze yeḻa' ẕen chia'. 
X̱ana' Dios, ḻo yeḻa' ẕža'a chio', wzó ža'. Bdiḻ-ḻen benne' ka' žsáka'gake' neda' ḻo yeḻa' ẕža'a chégake'. Bseḻa' da' gakḻen neda' kate' žin ža wchi'a ḻažo'o da' žak cheto'. 
Benne' yógo'te yež ka' ḻá'gake' ḻawo' Le'. Wnná bia' benne' ka' ḻo yeḻa' ẕen chio'. 
Le', X̱ana' Dios, wchi'a ḻažo'o benne' yógo'te yež. Bchi'a ḻaže' neda' ka nak da' chawe' dan' bena', dan' bena' ḻo da' nak ḻi ḻaže' chia'. 
Bchinnj da' žongak benne' wen da' ẕinnj ka', san ben chawe' benne' chawe' ka', dan' nako' chawe', Dios, na' ẕwio' da' yo'o ḻo yichj ḻáẕdo'gak yógo'te benne' ka'. 
Dios na'kze žape chi'e neda'. Žeslé' benne' ka' zej nake' ḻi ḻaže'. 
Nak chawe' ka ẕchi'a ḻaže' Dios da' žongak benne' ka'. Yógo'te ža ẕža'a Dios che da' žongak benne' wen da' ẕinnj ka'. 
Cha' bi yeyát ḻáže'gake' Dios kweje' ya ntoche' chie' ka'. Za' wsíe' yag ntóche'do' chie' ka'. 
Za' wkonle' žin ya chie' ka' che wdiḻe. Za' wsíe' yag ntóche'do' ka' zoa yi' ḻáwe'gaken. 
Benne' wen da' ẕinnj ẕkweze' da' ẕia da' gone'. Yo'o yichj ḻáẕda'we' da' ẕinnj da' gone', na' gone' da' wen ḻaže'. 
Ba bche'ne' to yežw gže' nich yéx̱jwgak benne' ka' ga na', san bex̱jwe' ḻekze' ḻo yežwn'. 
Da' ẕinnj da' bene' žesbaga'n ḻekze' ẕia, na' da' bsake'e benne' ka' yebí'i Dios chekze' ḻe'. 
Wká'n ẕena' X̱ana' Dios ni'a che da' chawe' da' žone' na' góḻteza' che La la'y che X̱ana' Dios, Benne' ẕente. 
