﻿SALMOS.
10.
X̱ana' Dios, ¿biẕ chen' zo' zi'to'? ¿Biẕ chen' ẕkache' kwino' kate' ẕzáka'gak benách chio' ka'? 
Ḻo yeḻa' ẕka'n ẕen kwin benne' bi nake' chawe' ẕbia ḻaže'e benne' yache', san chejchaze' ḻo da' bdix̱jwe' nich wžía yi'e bennen'. 
Ẕka'n ẕen kwine' ni'a che da' ẕze ḻaže'e. Ẕnne zi'e bennen' ẕdan ḻaže'e yeḻa' gape, na' ẕka'ne' ka'ze Le', X̱ana' Dios. 
Ḻo yeḻa' ẕka'n ẕen kwin benne' bi nake' chawe' bi žape' Dios ba la'ne, na' ẕnne' bi zoa Dios. 
Žónteze' da' ẕinnj, na' ẕnne' bi wchi'a ḻaže' Dios ḻe' ni'a che da' žone'. Ẕzoe' cheḻa'ale benne' ka' ẕží'igake' chie' ḻe'. 
Ḻo yichj ḻáẕda'we' ẕnne': “Bi be gak wsejw x̱neza'. Batkle bi gak chia' da' bi naken chawe'.” 
Ẕnnáteze' da' kegle, na' da' wen ḻaže', na' ẕkache'lanteze'. Diža' ka'ze, na' diža' yaḻze ẕžójgaken žoe'e. 
Ẕkache' kwine' žoa'a yež nich sene' benne' ka'. Bagáche'ze žote' benne' ka' ẕdégakze' ga na'. Ẕwíalanze' nich gak bi gone' chegak benne' yache' ka'. 
Bagáche'ze ẕbeze' ka žon bež yix̱e'. Ẕbeze' nich gak sene' benne' yache' ka'. Kate' ẕzene' benne' yache' ḻo do yeḻj chie', na' ẕchi'e ḻe' chekze'. 
Kan žon bež yix̱e' zóateze' x̱íti'e ḻáwlegak benách ka', na' ẕzene' benne' zan ḻen ne'e waḻe. 
Ḻo yichj ḻáẕda'we' ẕnne': “Naḻ ḻaže' Dios benne' ki. Bkache' ḻawe', na' bi ḻe'ele' da' žona'.” 
Wzó ža', X̱ana' Dios, na' bze no'o. Bi gaḻ ḻažo'o benne' yache' ka'. 
¿Biẕ chen' ẕzoagak benne' wen da' ẕinnj ka' Dios cheḻa'ale? Ḻo yichj ḻáẕdo'gake' ẕnnágake': “Bi yezí' wzón Dios neda'.” 
San Le' bḻe'ekzlo' da' ni, dan' ẕwio' no benne' žone' da' ẕinnj, na' da' bi nak chawe', nich yezi'kzo' wzón benne' ka'. Benne' yache' ka' ẕde kwíngake' ḻo no'o. Le' žákḻenkzo' bi' wzebe ka'. 
Ẕkwaso' yeḻa' waḻe che benne' wen da' ẕinnj. Wléj ḻawle da' bi nak chawe' da' bene', dan' bene' bagáche'ze. 
To chi'ize nak X̱anžon' Benne' ẕnna bi'e žo'o. Ḻo yežlyó chie' ba wžía yi'gak benne' ka' bi ẕḻé'egekle' Ḻe' chawe'. 
Benno' chegak benne' gax̱jw ḻaže' ka' da' wnnábgekle' Le', X̱ana' Dios. Le' ẕkwezo' yichj ḻáẕdo'gak bénne'do' ka' nich wzé nággake' x̱tižo'o, 
nich wchi'a ḻažo'o bi' wzebe ka', na' benne' ka' ẕzáka'gake', nich biž bi da' ẕinnj gongak benne' ka' bi zej nake' chawe' chegak bénne'do' ki. 
