﻿SALMOS.
12.
X̱ana' Dios, beslá benne' chio' ka' dan' biž zoa no benne' žape' Le' ba la'ne, na' bi zoa no benne' ḻi ḻaže' ládjwgak benne' ka'. 
Yógo'te benne' ka' žon ḻáže'gekle' ljéžgake' ka'. Ḻo da' wen ḻaže' ẕnnágake' diža' chawe' da' ẕnnágake' nich gon ḻáže'gekle' benách ka'. 
X̱anžo Dios wžía yi'e benne' ka' ẕcháḻjgake' ki, na' benne' ka' ẕcháḻjgake' da' ẕka'n ẕen kwíngake'. 
Benne' ka' ẕnnágake': “Da' ẕchaḻjžo gákḻenen žo'o. Wchaḻjžo kan žénelžo. ¿Noẕkze benne' wchi'le' žo'o?” 
San ẕnna X̱anžo Dios: “Na'a ḻa'kza' neda' dan' žsáka'gake' benne' yache' ka', benne' ka' ẕbeže ḻáže'gake', na' yeslá' benne' ka' žénegekle' bi da' gona'.” 
X̱tiža' X̱anžo Dios naken dot da' li. Naken ka ya plat da' wdén ḻo yi', da' ba wdén ḻo yi' gaže chi'i ka'. 
Le', X̱ana' Dios, ẕwíakzo' benne' chio' ka'. To chi'ize gape chi'o ḻégake' ḻo na'gak benne' ka' zej nnita' ḻo ža na'a ža. 
Kate' ẕka'n ẕengak benách ka' da' ẕinnj, zej nnita' benne' bi zej nake' chawe' ka' gáte'teze. 
