﻿SALMOS.
15.
X̱ana' Dios, ¿noẕkze benne' gak soe' gan zo' Le'? ¿Noẕkze benne' gak soe' latje la'y chio'? 
Wak gon ki benne' nake' ḻi ḻaže', bennen' žone' da' naken chawe', bennen' zoa da' nak dot da' li ḻo yichj ḻáẕda'we', 
bennen' bi ẕnnie' che lježe' ka', na' bi be da' ẕia žone' chegak lježe' ka', na' bi žwe'e latje no benne' kwej bi'e lježe' ka'. 
Wak soa bennen' ga na', bennen' bi žape' ba la'ne no benne' žone' da' ẕinnj, san žape' ba la'ne benne' ka' žápegake' X̱anžo Dios ba la'ne bennen' bi ẕche'e x̱tiže'e ḻa'kze gonen ga bi wnite'. 
Wak soa bennen' ga na', bennen' žsane' mežw chie', na' bi žennabe' yichjen, na' bi žezi'e mežw nich wzóa lie' da' wen ḻaže' che benne' bi be ẕia nbage'e. No benne' žone' ki batkle chejchaze' ḻo da' ẕinnj. 
