﻿SALMOS.
17.
Bze nag da' ẕnnia', X̱ana' Dios. Benle da' žḻiža' Le'. Wẕí' da' ẕnnabla' Le' ḻo yeḻa' ḻi ḻaže' chia'. 
Benn latje ḻa'a ḻawo' Le' nich wchi'a ḻažo'o neda', dan' ẕḻe'elo' yógo'te ka zej nakkzen. 
Le' ẕwíakzo' yichj ḻáẕda'wa', na' ẕḻe'elo' neda' žel. Bwíakzo' da' žona', na' bi be da' ẕinnj bḻe'elo'. Wdape chi'a loža'a nich bi be diža' ka'ze nnia'. 
Žona' ka nak da' ẕnna x̱tižo'o, na' bi žona' kan žongak benne' wen da' ẕinnj ka'. 
Wdape chi'i neda' ḻo nez chawe' chio', nich bi chejchaza' ḻo da' bi nak chawe'. 
Žḻiža' Le', Dios, dan' ženlo' chi'a. Bze nag chi'a, na' benle da' ẕnnia'. 
Bḻoe'el neda' kan žeyache' ḻáže'ḻe'elo' benách ka'. Beslá benne' ka' žx̱en ḻáže'gake' Le' ḻo na'gak benne' ka' bi ẕḻé'egekle' ḻégake' chawe'. 
Bwia neda' ka žon no benne' ẕwíakze' yej ḻawe'. Wdape chi'i neda' ka žon ẕkoko', bian' žape chi'iba' bríse'do' ka' ẕan x̱ilba' 
nich bi be gongak chia' benne' wen da' ẕinnj ka', benne' ka' bi ẕḻé'egekle' neda' chawe', na' žénegekle' gótgake' neda'. 
Bi žeyache' ḻáže'gekle' ljéžgake' ka', na' ḻo yeḻa' ẕka'n ẕen kwíngake' ẕcháḻjgake'. 
Gáte'teze gan ẕda' ẕwíagake' neda'. Žénegekle' wžía yí'gake' neda'. 
Zej nake' ka to bež yíx̱e'do' žénelba' bi da' gawba'. Zej nake' ka to bež yix̱e', bia ẕkache' kwinba' nich senba' biado' ka'. 
Da, X̱ana' Dios, bdiḻ-ḻen benne' ka' bi zej nake' chawe', na' bžia yi' ḻégake'. Beslá neda' ḻo na'gak benne' ka' bi zej nake' chawe', wkonlo' žin ya ntoche' chio'. 
Beslá neda' ḻo na'gak benne' ka' ḻen no'o waḻe, X̱ana' Dios. Beslá neda' ḻo na'gak benne' ka', benne' zej ze'e nich yekwásgake' yežlyó cheto' nga, benne' ka' žáwgake' da' záka'ḻe'e chio' na' ẕwáwgaken' ẕí'ngake' ka', na' ẕga'nkze da' gawgak ẕa'sógake' ka', 
san neda', ḻe'ela' ḻawo' Le' dan' naka' chawe'. Chaz ḻaža'a gaka' ka nakkzo' Le' kate' yebana'. 
