﻿SALMOS.
18.
Nži'ila' Le', X̱ana' Dios. Le' ẕzoa chocho' neda'. 
Le', X̱ana' Dios, nako' ka to yej gan zoa' choch, na' nako' ka to yo'o ẕen gan yo'o chawa'a. Nako' Benne' weslá chia', na' Dios chia'. Le' ẕzoa chocho' neda', na' wx̱én ḻaža'a Le'. Žape chi'o neda', na' žesló' neda', na' ẕkache' chawo'o neda'. 
Ẕnnia': X̱anžo Dios žaḻa' wká'n ẕenžo-ne'. Beslé' neda' ḻo na'gak benne' ka' ẕžá'agake' neda'. 
Wzóa' ḻo da' zede che yeḻa' got, na' gok da' ẕinnj ka to yegw nis da' bcheben neda'. 
Gota' ẕož chia' choa'a ḻo yi' gabíl dan' wzóa' ḻo da' zede che yeḻa' got. 
Ḻo da' ẕžia yin' benách ka' bḻiža' X̱ana' Dios na' bcháḻjḻenkza' Dios chia'. Ḻe' benle' chi'a gan zoe' latje la'y chie', na' bze nage' da' bchaḻja' ḻawe'. 
Naž wẕó' yežlyó nga. Wẕízegak ya'a ka' gže'. Wẕízeḻe'egaken dan' bže'e Ḻe'. 
Bžoj žen che yi' ḻo ẕine'e, na' bžoj yi' ḻo žoe'e da' bzeyen da' zej že' ḻawe', na' yi' na' bẕenen bzio' yi' ka'. 
Bsaljwe' ya'abá, na' betje', na' wzóa da' choḻ ẕan ni'e. 
Wdíe' ḻo be', ne ži'e to da' nzin' kerubín. Ka' gaze wdíe' ḻo be' bdone'. 
Gokwe' da' choḻ, dan' bkachen' Ḻe', dan' naken bejw gasj da' yožen nis. 
Ḻo da' žákti'teḻe'e chie' bžojgak bejw gasj ka'. Bžojgak wzió' yi', na' yej nis. 
Ẕan ya'abá wnné wzió' che chi'i X̱anžo Dios, na' benle chi'i Dios ẕente ládjwgak wzió' yi' ka', na' yej nisen'. 
Bsie' yag ntóche'do' chie' ka', na' besḻase' benne' ka' bi ẕḻé'egekle' neda' chawe'. Bsane' yes wzió' ka', na' bžia yi'e benne' ka'. 
Naž bḻa' ḻawgak da' ka' zej že' gže' ẕan nisdo', na' bḻa' ḻaw x̱ni'a yežlyó dan' žen' ẕan nisdon'. Bdiḻo' benne' ka' ẕžá'agake' neda', X̱ana' Dios, na' ḻo yeḻa' ẕža'a chio' bsejo' x̱nézgake'. 
Betj Dios ḻo da' sibe, na' bex̱we' neda', na' ḻen ne'e waḻe bebeje' neda' ḻo da' zede da' goken ka nis zil. 
Beslé' neda' ḻo na'gak benne' waḻe ka', benne' bi ẕḻé'egekle' neda' chawe', na' ḻo na'gak benne' ka' ẕží'igake' chia' neda', benne' ka' zej nakže' waḻe ka neda'. 
Bdíḻ-ḻengake' neda' katen' wzóa' ḻo da' zedḻe'e, san X̱ana' Dios gókḻene' neda'. 
Bebeje' neda' gan wyoá'a, na' bzoe' neda' to latje ẕen. Beslé' neda' dan' wyáz ḻaže'e neda'. 
X̱anžo Dios bebi'e chia' dan' bena' da' naken chawe', na' ka nakkze da' chawen' bebi'e chia', 
dan' žona' ka žsedle X̱ana' neda', na' bi wléj yichja' Dios chia'. 
Žona' ka nak da' bchi'le' žo'o, na' bi bsana' diža' ka' da' bdix̱jwe'. 
Goka' ḻi ḻaže' ḻawe' Ḻe', na' wdape chi'i kwina' nich bi gona' da' ẕinnj. 
Bebí'i X̱anžo Dios chia' ka nak da' chawe' da' bena', ka nakkze da' chawen' dan' bena' ḻawe' Ḻe'. 
Žeyache' ḻáže'lo' no benne' žeyache' ḻáže'le' lježe', na' nako' ḻi ḻaže' ḻen bennen' nake' ḻi ḻaže'. 
Ẕcháḻjḻeno' benne' chawen' da' naken dot chawe', na' gako' snia ḻen benne' wen da' ẕinnj. 
Yesló' benne' chawen' ḻo da' wžía yin' benách ka', san wzex̱jo' benne' ka' ẕka'n ẕen kwíngake'. 
Le' wzaljo' yi' chia'. Le', X̱ana' Dios, wza'ni'o chia' gan zoa' ḻo da' choḻ. 
Yeḻa' wak chio' wžía yin' benne' zanḻe'e, benne' ka' žjake' ḻo wdiḻe. Cha' Le', Dios, sóaḻeno' neda', wak wchinnja' ze'e ka' žape chí'igaken yež ka'. 
Da' ka' žon Dios zej naken ḻi ḻaže', na' x̱tiže'e naken dot da' li. Žape chi'e yógo'te benne' ka' žx̱en ḻáže'gake' Ḻe'. 
Toze X̱anžon' nake' Dios. Toze Dios chežo nake' Benne' žape chi'e žo'o. 
Dios nake' Bennen' žone' neda' benne' waḻe, na' Benne' žeyone' ḻi ḻaže' da' žona' neda'. 
Žone' ni'a ka zej nak ni'a bžina' yix̱e' na' ẕzoa choche' neda' ḻaw Ya'a Sión chie'. 
Žsedle' neda' nich gak cha'a ḻo wdiḻe, na' nich gak wlewa' da' žsi yag ntóche'do' ka', dan' naken ya bronse. 
Ḻo yeḻa' žeslá chio' wdape chi'o neda', na' ḻen no'o ḻi ža gókḻeno' neda'. Ḻo yeḻa' ži'i ḻaže' chio' bka'n chawo'o neda'. 
Ben chawo'o nez gan tia', na' bi kwila' ḻo nezen'. 
Bsejwa' x̱nezgak benne' ka' ẕžá'agake' neda', na' bena' ga bẕónnjgake', na' bi beyá'a liža' ga bžinte beta' benne' ka'. 
Bena' benne' ka' we', na' bi gok yeyásgake'. Bejbíx̱gake' ẕan ni'a. 
Ben chocho' neda' nich gok cha'a ḻo wdiḻen'. Bzex̱jo' benne' ka' ẕžá'agake' neda' ẕan ni'a. 
Beno' bẕonnjgak ḻawa' neda' benne' waḻe ka', na' bžia yi'a benne' ka' bi ẕḻé'egekle' neda' chawe'. 
Wnnábgekle' no benne' gákḻene' ḻégake' san bi wzóa no benne'. Wnnábgekle' X̱anžo Dios, san bi wzé nage' chégake'. 
Bžia yi'a benne' ka', na' gókgake' ka bix̱te yo dan' ẕzen ḻo be'. Bleja' ḻégake' ka ẕleja' gona' ḻo nez ka'. 
Besló' neda' ḻo na'gak benne' ka' ẕží'igake' chia', na' beno' neda' benne' blo ḻo yež ka', na' ḻáwe'lgak benne' zi'to' ka'. Benne' ka' bi nónbi'a, žóngake' žin chia'. 
Kate' béngekle' chia', na' béngake' kan wnnía'. Benne' yež ka' béngake' kan bchi'la' ḻégake'. 
Benne' zi'to' ka' gotgak ni'a ná'gake'. Ḻo yeḻa' ẕžebe bžójgake' ḻo yež ẕen ka' chégake'. 
¡Ga'n ẕen X̱anžo Dios! ¡Ga'n ẕene' dan' žákḻene' neda'! ¡Ga'n ẕen Dios, Bennen' žeslé' neda'! 
Dios žebéj yichje' benne' ka' ẕžá'agake' neda', na' ẕdie' benne' yež ka' ḻo na'a neda'. 
Žeslé' neda' ḻo na'gak benne' ka' ẕžá'agake' neda'. Žone' ga ẕnna bi'a benne' ka' bží'igake' chia' neda'. Beslé' neda' ḻo na'gak benne' yichj ža'a ka'. 
Wká'n ẕena' Le', X̱ana' Dios, ḻawgak benne' yež ka', na' goḻkza' che La la'y chio' Le'. 
Žono' ga žon to benne' da' ẕen ka', bennen' ẕnna bi'e ḻo wlazo' Le', na' žeyache' ḻáže'lo' bennen' wžío' Le', bennen' nake' Dabí, na' ẕa'sóe' ka', to chi'ize. 
