﻿SALMOS.
19.
Nḻa' ḻaw ẕan ya'abá yeḻa' ẕen che Dios. Ẕcháḻjgakkze yógo'te da' ka' bene'. 
To ža ẕzenlen ža yoble da' ni, na' to yel žen' yel yoble da' na'kzen. 
Bi ẕkóngeklen žin x̱tíža'gak benne' ka', na' bi zoa no benne' ženle' chí'igaken, 
san ẕžin da' ẕnnágaken do ẕente yežlyó, na' ẕžingak x̱tíža'gaken dot yežlyó. Dios bene' ya'abá ka to yo'o gan zoa wbíž. 
Zildo' ẕḻan' ka to benne' byo ẕchag ne'e. Žebelen ka to benne' ẕzá'ḻi'e. 
Ẕžojen cheḻa'ale gan ẕḻan', na' ẕžinen cheḻa'ale gan ženen. Ẕcha'an yógo'te da' zej den. 
Dot ḻi ḻaže' nak da' žsedle X̱anžo Dios, na' ẕzoa chochen be' da' nakkzžo. Ḻi ḻaže' nak da' bchi'le X̱anžon' žo'o. Ẕneẕjwn yeḻa' žejní'il chegak benne' ka' bi zej napen'. 
Da' likze nak da' wnná X̱anžon', na' žebéḻe'egekle benne' ka' žóngake' kan ẕnnan. Ḻi ḻaže' nak da' ẕzejní'il X̱anžon' žo'o, dan' ẕzoan žo'o ḻo yeḻa' baní'. 
Nak chawe' ẕžébežo X̱anžon', dan' gonen ga soažo nbanžo to chi'ize. Da' likze nak kan ẕchi'a ḻaže' X̱anžon' žo'o, na' naken chawe'. 
Naken da' ẕdan ḻáže'žežo ka ya oro, na' ka ya oro ẕente dan' záka'ḻe'en. Nakžen ẕix̱ ka bžina' che bez, dan' nakḻe'en ẕix̱. 
Žsedlen neda', wen žin chio', dan' žona' kan ẕnnan, na' da' ẕenḻe'e žezi'a. 
Nitó benne' bi gak gónbi'e da' ẕinnj da' žone'. Beslá neda', X̱ana' Dios, ḻo da' ẕinnj dan' bi žákbe'ela' žonan'. 
Bkache' chawe' neda', wen žin chio', nich bi be doḻa' gona' dot ḻaža'a. Bi go'o latje nna bia' doḻa' neda'. Naž gaka' ḻi ḻaže', na' bi baga'a ẕia che doḻan'. 
Žénela' gak da' ẕchaḻja', na' da' zḻab ḻaža'a da' žaz ḻažo'o Le'. X̱ana' Dios, Le' žon chochkzo' neda', na' beya'wo' neda'. 
