﻿SALMOS.
20.
Ẕnnabla' X̱anžo Dios yenle' chi'o kate' bi žak chio', na' gape chi'i Dios na'kze che Jakob le'. 
Ẕnnabla' Ḻe' ḻo latje la'y chie' gákḻene' le', na' gan zoe' ḻaw Ya'a Sión yedjwíe' le'. 
Ẕnnabla' Ḻe' chejsá' ḻaže'e yógo'te da' bneẕjo' chie', na' si' ḻo ne'e biado' ka' ẕzeyo' ḻawe' Ḻe'. 
Ẕnnabla' Ḻe' gonne' chio' yógo'te da' ẕdan ḻažo'o, na' gone' yógo'te da' žak ḻažo'o. 
Yebéḻe'elto' kate' yeslé' le'. Wchisto' to da' wḻoé'e ḻawn La la'y che Dios chežo. Ẕnnabla' X̱anžon' gone' yógo'te da' ẕnnablo' Ḻe'. 
Na'a nnezla' žeslá X̱anžon' bennen' wžekze' Ḻe'. Gan zoe' ya'abá la'y chie' yenle' chi'i bennen'. Ḻen yeḻa' wak ẕente chie' yeslé' ḻe'. 
Baḻ benne' ka' žx̱en ḻáže'gake' karro ka' che wdiḻe, na' yezíka'že' žx̱en ḻáže'gake' bia waḻe ka', san žo'o žx̱en ḻáže'žo La X̱anžo Dios. 
Benne' ka' gotgak ni'a ná'gake', na' bejchégwgake', san žo'o, beyasžo, na' zežo. 
Beslá neto', X̱anto' Dios. Le'kze ẕnna bi'o neto'. Benle chi'ito' kate' žḻižto' Le'. 
