﻿SALMOS.
21.
Benne' ẕnna bi'e ẕžebe' yeḻa' wak chio', X̱anto' Dios, na' ni'a che yeḻa' weslá chio' žebéḻe'ele'. 
Benno' chie' da' wdán ḻaže'e na' bi bžono' da' wnnable' Le'. 
Wẕí' ḻo no'o ḻe', na' ben chawo'o ḻe'. Bžio' yichje' to da' naken oro. 
Wnnable' Le' gonno' chie' yeḻa' nban, na' bennon' chie' nich soakze' yiz zan. 
Ẕenḻe'e nak yeḻa' ẕen chie' dan' besló' ḻe'. Benno' chie' yeḻa' ba la'ne, na' yeḻa' ẕen. 
Dan' ben chawo'o ḻe' to chi'ize, žono' ga žebéḻe'ele' ḻawo' Le'. 
Dan' bennen' ẕnna bi'e žx̱en ḻaže'e X̱anžon', yeyache' ḻaže'l Dios ẕente ḻe', na' bi kwe' zedle'. 
Wzetjo' yógo'te benne' ka' bi ẕḻé'egekle' Le' chawe'. Ḻen yeḻa' wak chio' wzex̱jo' benne' ka' ẕží'igake' chio'. 
Gak chegak benne' ka' ka wnnito'o ḻégake' ḻo yi' katen' yido' nich wchi'a ḻažo'o ḻégake'. X̱anžon' wžía yi'e benne' ka' ḻo yeḻa' ẕža'a chie', na' yi' na' wzeyen ḻégake'. 
Yógo'te da' béngake' ḻo yežlyó nga wchinnjo', na' wkwaso' ẕa'sógake' ka' ladjw benách ka', 
dan' wyáz ḻáže'gake' góngake' da' bi naken chawe' ḻawo' Le'. Sa' ḻáže'gake' da' góngake' san bi be sáke'gekle' dan' wlago' ḻégake'. 
Bkwezo' yag ntóche'do' chio' ka' nich goto' ḻégake'. 
¡Ga'n ẕen Le', X̱anto' Dios, ḻo yeḻa' waḻe chio'! Góḻtezeto', na' wká'n ẕéntezeto' Le' ni'a che yeḻa' wak chion'. 
