﻿SALMOS.
22.
Dios chia', Dios chia', ¿biẕ chen' wléj yichjo' neda'? ¿Biẕ chen' bi ženlo' kate' ẕnnabla' Le' yesló' neda'? 
Dios chia', žḻiža' Le' tža tža, san bi žechebo' chia'. Žḻiža' Le' žel, na' bi žezí' ḻaža'a, 
san Le' nako' la'y. Ẕbezkzo' gan ẕka'n ẕengak benne' Israel ka' Le'. 
X̱a x̱na' wdé cheto' ka' bx̱en ḻáže'gake' Le'. Bx̱en ḻáže'gake', na' besló' ḻégake'. 
Bḻížgake' Le', na' gókḻeno' ḻégake'. Bx̱en ḻáže'gake' Le', na' bi bedoé'egekle', 
san neda' naka' ka to bel góna'do', na' kege benne'. Ẕža'agak benne' ka' neda' na' žon dítjgekle' neda'. 
Yógo'te benne' ka', kate' ẕḻé'egekle' neda', ẕká'ngake' neda' ka'ze. Žsáljwgake' žóa'agake' nich nnégake' chia', na' ẕta yíchjgake', na' ẕnnágake': 
“Bx̱en ḻaže'e X̱anžon' nich yeslé' ḻe'. Yeslé' ḻe' cha' žaz ḻaže'e ḻe'.” 
San Le', X̱ana', bex̱o' neda' kate' golja'. Beno' ga bx̱en ḻaža'a Le' kate' ne žaẕa'a. 
Wyoá'a ḻo no'o kate' bi na' galja'. Kate' ne yoa'a ḻe'e x̱na'a, báchekze nako' Dios chia'. 
Bi yebigo'o gan zoa' dan' zoa gawze da' wsakan' neda', na' bi zoa no benne' gákḻene' neda'. 
Benne' ka' bi ẕḻé'egekle' neda' chawe' zej nyechjle' neda', benne' ka' zej nake' ka bež ka'. Zej nyechjle benne' ka' neda', benne' ka' zej nake' ka bež waḻe ka' che yežlyó Basán. 
Gónegekle' wžía yí'gake' neda' ka žon to bež yix̱e', bia ẕdonba', na' ẕbéžeya'aba'. 
Bedó ḻaža'a, na' gok ḻáẕda'wa' ka nis da' nlaljen, na' yógo'te žit yoa'a bsángaken ljéžgaken ka'. Ḻáẕda'wa' goken ka china' bez, da' beyonan ḻi'a ka nis. 
Beyák yeḻa' waḻe chia' ka to že'n yo dan' nla'an, na' loža'a wdán' chichjla'. Bletjo' neda' ḻo bix̱te yo che yeḻa' got. 
Zej nyechjle benne' wen da' ẕinnj ka' neda'. Zej nyechjle' neda' ka beko' ka'. Wdídjwgake' ni'a na'a. 
Wak wlaba' yógo'te žit yoa'a, na' benne' ka' ẕḻé'egeklen', ẕwíazegake' neda'. 
Bdísgake' ẕa' che chégake', na' ḻawle ẕan' wléjgake' da' gak bian'. 
San Le', X̱ana' Dios, bi bkwaso' gan zoa'. Nakkzo' Le' yeḻa' waḻe chia', na' gákḻeno' neda'. 
Beslá be' da' nakkza' ḻo na' benne' wdíe' neda' ya ntoche'. Bennen' žénele' wžía yi'e neda' žone' ka žon to beko'. 
Beslá neda' ḻo žoa'a bež yix̱e'. Beslá neda' ḻo lozgak bež waḻe ka'. 
Wzenla' bi' ljéža'do' ka' kan nako' Le'. Wká'n ẕenkza' Le' gachje ḻawle benne' ka' zej ndobe' chio' Le'. 
Ḻe'e, benne' ka' ẕžébele X̱anžon': ¡Le wká'n ẕene' Ḻe'! ¡Le wká'n ẕene', ḻe'e, ẕa'só Jakob! ¡Le žebe Ḻe', ḻe'e, ẕa'só Israel ka'! 
Bi ẕnnita' Dios benne' yache' ka' cheḻa'ale, na' bi ẕdeze' da' ẕzáka'gake', na' bi ẕkache' ḻawe' ḻawgak benne' ka', san kate' žḻížgake' Ḻe', ženle' chí'igake'. 
Gachje ḻawle benne' zan ka', benne' zej ndobe' chio' wká'n ẕenkza' La la'y chio' Le', dan' bchebe ḻaža'a gonan' ḻawgak benne' ka' ẕžébegake' Le'. 
Gawgak benne' gax̱jw ka', na' yéljgekle'. Bíga'gake' ḻaw X̱anžon', na' wká'n ẕéngake' Ḻe'. Gákteze yeḻa' ba nez ẕen chegak benne' ka'. 
Benne' ka' nníta'gake' dot yežlyó chejsá' ḻáže'gake' X̱anžon', na' yežíngake' ḻawe' Ḻe'. Yógo'te kwe' benách ka' wká'n ẕéngake' Ḻe', 
dan' napkze X̱anžon' yeḻa' wnná bia', na' nna bi'e yógo'te yež ka'. 
Gawgak yógo'te benne' ẕen ka' che yežlyó nga, na' wká'n ẕéngake' Dios. Wzóa ẕibgak yógo'te benne' ka' ḻawe' Ḻe'. Benne' ka' bi gak yeslá kwíngake' nich bi gátgake'. 
Ẕa'sógak benne' ka' góngakbe' žin che X̱anžon'. Wzéngekle' ẕí'ngake' ka' ka nak chie' na' zejte chejsete chegak benne' ka'. 
Yežíngake', na' wzéngekle' benne' ka' ka nak da' chawe' da' žon Dios. Wzéngekle' benne' ka' bi na' gáljgake' ben Dios da' ki. 
