﻿SALMOS.
25.
X̱ana' Dios, ẕcháḻjḻena' Le' dot ḻaža'a. 
Žx̱en ḻaža'a Le', Dios chia'. Bi go'o latje yedoe'ela'. Bi go'o latje benne' ka' bi ẕḻé'egekle' neda' chawe' wžía yí'gake' neda'. 
Bi chíx̱gekle benne' ka' žx̱en ḻáže'gake' Le', san yedoé'egekle benne' ka' ẕží'igake' che x̱tižo'o. 
X̱ana' Dios, bḻoe'el neda' da' žak ḻažo'o gona'. Bche' neda' gan žénelo' cha'a. 
Bsedle neda' gona' da' naken dot da' li chio'. Dan' nako' Dios, na' žesló' neda', wx̱én ḻáže'teza' Le'. 
Bejsá' ḻaže', X̱ana' Dios, gako' ži'i ḻaže', na' yeyache' ḻáže'lo' neda', kan žónteze žono'. 
Bi chejsá' ḻažo'o doḻa' da' bena' kate' ne naka' benne' kwide', na' kan bži'a che x̱tižo'o. Ḻo yeḻa' žeyache' ḻaže' chio', na' yeḻa' ži'i ḻaže' bejsá' ḻaže' neda', X̱ana' Dios. 
Chawe', na' ḻi ḻaže' nak X̱anžo Dios. Che ḻen wsedle' benne' doḻa' ka' da' žaḻa' góngake'. 
Wḻoe'ele' benne' gax̱jw ḻaže' ka' da' naken chawe' na' wsedle' benne' ẕen ḻaže' ka' da' góngake'. 
Ḻo yeḻa' žeyache' ḻaže', na' ḻo da' li, ẕche' X̱anžon' benne' ka' žóngake' kan ẕnna x̱tiže'e dan' bénḻene' žo'o, na' ka nak da' žsedle' Ḻe'. 
Dan' žono' ka nak da' ba wnnó', X̱ana' Dios, yenít ḻawo' chia' doḻa' da' bena', da' naken ẕen. 
¿Zoa no benne' ẕžebe' Le', X̱anto' Dios? Le' wsedlo' bennen' da' žaḻa' gone'. 
Gak chie' to yeḻa' ba nez ẕen, na' ẕa'sóe' ka' gata' chégakbe' yežlyó. 
X̱anžo Dios nake' toze ḻen benne' ka' ẕžébegake' Ḻe', na' gone' ga gónbia'gake' x̱tiže'e dan' bénḻene' žo'o. 
Wx̱én ḻáže'teza' X̱anžo Dios dan' beslé' neda' ḻo na'gak benne' ka' žénegekle' wžía yí'gake' neda'. 
Bwia neda', na' beyache' ḻaže'l neda' dan' zoa' toza', na' ẕzáka'ḻi'a. 
Nyanḻe'e da' zede da' zej yo'on yichj ḻáẕda'wa'. Beslá neda' ḻo da' zede da' ẕzaka'a. 
Bwia ka ẕzáka'ḻi'a, na' ka žónḻi'a žin, na' benít ḻaw che yógo'te doḻa' da' nbaga'a. 
Bwia ka nyanḻe'e benne' ka' ẕžá'agake' neda', na' kan ẕbia ḻáže'gake' neda'. 
Bwia be' da' nakkza', na' beslá neda'. Bi go'o latje yedoe'ela' dan' žx̱en ḻaža'a Le'. 
Da' chawe', na' yeḻa' ḻi ḻaže', žon chóchgaken neda' dan' žx̱en ḻaža'a Le'. 
X̱ana' Dios, beslá benne' Israel ka' ḻo yógo'te da' ẕzáka'ḻe'egake'. 
