﻿SALMOS.
26.
Bchi'a ḻaže' neda', X̱ana' Dios, dan' bena' da' naken chawe'. Bx̱en ḻaža'a Le', X̱ana' Dios, na' bi gok chop ḻaža'a. 
Bwíakze ḻáẕda'wa', X̱ana' Dios, na' bwia dan' bena'. Bwíakze da' yo'on yichj ḻáẕda'wa' 
dan' žákbe'ela' žeyache' ḻáže'lo' neda', na' žona' ka nak da' naken dot da' li chio'. 
Bi na' gona' tẕen benne' ka' žóngake' da' chawe' ḻáwzele. Bi na' gona' toze benne' ka' ẕḻoé'ezele chawe' kwíngake'. 
Bi ẕḻe'ela' chawe' latje gan ẕdobgak benne' ka' bi zej nake' chawe', na' bi žoa'a tẕen ḻen benne' ka' žóngake' da' ẕia. 
Ẕḻe'elo' bi be ẕia nbaga'a, na' wak biga'a ḻo bkog la'y chio', X̱ana' Dios, 
gan goḻa' da' ka' we ḻawa'a Le', na' wzenla' benách ka' ka nak da' ẕen da' beno'. 
X̱ana' Dios, nži'ila' ližo' gan zo', na' latje la'y gan nḻa' ḻaw yeḻa' ẕen chio'. 
Bi wžía yi'o neda' tẕen ḻen benne' doḻa' ka', na' bi wdío' neda' tẕen ḻen benne' wetw benách ka', 
benne' ka' žóngake' da' bi naken chawe', na' ẕnéẕjwtezegake' mežw nich bi wchi'a ḻaže' no benne' da' ẕinnj da' béngake', 
san neda' gónteza' da' nak ḻi ḻaže'. Beslá neda', na' beyache' ḻaže'l neda'. 
Dan' bénteza' da' nak chawe', na' wká'n ẕenkza' Le', X̱ana' Dios, ḻawgak benne' ka' zej ndobe' ḻawo' Le'. 
