﻿SALMOS.
27.
X̱anžo Dios nake' yeḻa' baní' chia', na' Benne' žeslé' neda'. Bi gak no benne' wchebe' neda'. X̱anžo Dios nake' Benne' žape chi'e neda'. Bi gak no benne' wzóe' neda' ḻo da' zedḻe'e. 
Kate' benne' ka' bi zej nake' chawe' byéchjgekle' neda', ḻen benne' ka' žsáka'gake' neda', na' bi ẕḻé'egekle' neda' chawe', nich wžía yí'gake' neda', na' bejchégwgake', na' bedoé'egekle'. 
Ḻa'kze chéchjgekle benne' zan, benne' žjake' ḻo wdiḻe neda', benne' ka' bi ẕḻé'egekle' neda' chawe', bi žébekza'. Ḻa'kze žon byéngake' tíḻ-ḻena' ḻégake', neda' wx̱én ḻáže'kza' Dios. 
To da' ẕnnabla' X̱anžo Dios. Toze da' ẕdan ḻaža'a, dan' naken soa' liž X̱anžon' yógo'te ža soa' nbana', nich wláb ḻaža'a ka nak yeḻa' ẕen che X̱anžon', na' wcháḻjḻena' Ḻe' ḻo yodo' la'y chie'. 
Ḻe' wkache' chawe'e neda' ḻo latje la'y chie' kate' žin ža gak da' bi nak chawe'. Wkache' chawe'e neda' ḻo latjen' gan zoakze' Ḻe'. Wzóe' neda' to gan soa' chawe'. 
Naž gone' ga wzex̱jwa' benne' ka' bi ẕḻé'egekle' neda' chawe', benne' ka' zej nyechjle' neda'. Ḻo yeḻa' žebele gota' biado' ka' ḻo bkog la'y chie'. Goḻkza', na' wká'n ẕenkza' X̱anžon'. 
X̱ana' Dios, benle chi'a kate' žḻiža' Le'. Beyache' ḻaže'l neda', na' bechebe chia'. 
Ḻo yichj ḻáẕda'wa' benla' chi'o, na' wnnó': “Da ga zoa' ni.” Yida' gan zo' Le', X̱ana' Dios. 
Bi wkache' ḻawo' Le' ḻawa' neda'. Ḻo yeḻa' ẕža'a chio' bi yebigo'o gan zoa' neda', wen žin chio'. Toze Le' žákḻeno' neda'. Bi wsano' neda', na' bi kwej yichjo' neda', Dios, weslá chia'. 
Ḻa'kze wsangak x̱a x̱na'a neda', yeka'akze X̱anžo Dios neda'. 
Bsedle neda' da' žak ḻažo'o gona', X̱ana' Dios, na' bḻoe'el neda' da' naken ḻi ḻaže' da' žaḻa' gona', dan' zej nyan benne' ka' bi ẕḻé'egekle' neda' chawe'. 
Bi go'o latje benne' ka' wžía yí'gake' neda'. Zej nyechjle benne' wen ḻaže' ka' neda', na' žesbága'gake' neda' ẕia. 
X̱anžo Dios bchebe ḻaže'e ḻe'ela' da' chawe' chie' gan sóateza' nbana'. Chela' bi žejḻi'a da' ni, na' gat ni'a na'a. 
Le kwez ža yeḻá' X̱anžon'. Le gon choch ḻáže'le, na' Ḻe' wzé choche' ḻe'e. O', le kwez ža yeḻá' X̱anžon'. 
