﻿SALMOS.
28.
X̱ana' Dios, žḻiža' Le'. Le' žape chi'ikzo' neda'. Bze nag chi'a dan' cha' bi yenlo' chia' gaka' ka to benne' žoe'e ḻo yi' gabíl. 
Benle chi'a dan' žḻiža' Le', na' ẕchis na'a ḻawo' Le' gan zo' latje la'y chio'. 
Bi wžía yi'o neda' tẕen ḻen benne' wen ḻaže' ka', na' kege tẕen ḻen benne' ka' žóngake' da' ẕinnj. Ẕnnágake' da' cháwe'do' ḻawgak ljéžgake' ka', san da' bi nak chawe' yo'on yichj ḻáẕdo'gake'. 
Bde benne' ka' ḻo da' sáka'ḻe'egake' tḻebe kan nak da' béngake', ka nakkze da' bi nak chawe' da' béngake'. Bneẕjw benne' ka' tḻebe kan nak da' béngake', dan' yeyáḻa'gake'. 
Dan' bi wdápegake' ba la'ne da' ben X̱anžon', na' kege dan' bene' ḻen na'kze', Ḻe' wžía yi'e benne' ka', na' wdíe' ḻégake' ḻo da' sáka'ḻe'egake'. 
¡Ga'n ẕen X̱anžo Dios, Bennen' benle' chi'a katen' bḻiža'-ne'! 
X̱anžo na'kze ẕze choche' neda', na' žape chi'e neda'. Bx̱en ḻaža'a Ḻe', na' gókḻene' neda'. Che ḻen yebéḻe'ela', na' goḻkza', na' wká'n ẕenkza' Ḻe'. 
X̱anžon' ẕze chochkze' benne' chie' ka', na' žape chi'ikze', na' žeslé' bennen' wžíe'. 
Beslá benne' chio' ka'. Ben chawe' da' nak chégake'. Wdáp chi'i benne' ka', na' bze choch ḻégake' to chi'ize. 
