﻿SALMOS.
30.
X̱ana' Dios, bechiso' neda', na' ẕka'n ẕena' Le'. Bi bi'o latje benne' ka' bi ẕḻé'egekle' neda' chawe' gon dítjgekle' neda'. 
X̱ana' Dios, bḻiža' Le', na' beyono' neda'. 
X̱ana' Dios, besló' neda' ḻo yi' gabíl. Beyono' neda' nich bi choa'a yežw ba. 
Le goḻ che X̱anžon', ḻe'e nakle benne' chekze' Ḻe'. Le ye' Ḻe' “žóx̱keno'”, na' bejsá' ḻaže' nake' la'y. 
To chí'ido'ze ẕže'e, san to chi'ize zoa yeḻa' ži'i ḻaže' chie'. Kwéžežo to yelze, san zildo' yebéḻe'elžo. 
Kate' wzóa' chawe' wnnía': bi be gak chia' neda'. 
Ki wnnía' dan' bzoa chocho' neda', X̱ana' Dios, ka to ḻaw ya'a ẕen, na' ben chawo'o neda', san kate' bkache' ḻawo' Le', na' wžé' zedla'. 
X̱ana' Dios, wḻiža' Le', na' gáta'yoela' Le'. 
¿Biẕkze yeḻa' ba nez gaken chio' cha' gata' neda', na' choa'a yežw ba? ¿Wká'n ẕena' Le' kate' ba naka' bix̱te yo? ¿Wak wzenla' no benne' da' naken dot da' li chio'? 
Bze nag chia', X̱ana' Dios, na' beyache' ḻaže'l neda'. X̱ana' Dios, gokḻen neda'. 
Beno' ga beyák yeḻa' ẕbeže chia' yeḻa' žia'a. Bkwaso' yeḻa' nyache' ḻaže' chia', na' beno' ga bebéḻe'ela'. 
Che ḻen goḻkza' chio'. Nakkzo' Le' yeḻa' ba nez chia', na' bi soakza' žize. X̱ana' Dios, wká'n ẕenkza' Le' to chi'ize. 
