﻿SALMOS.
31.
Žx̱en ḻaža'a Le', X̱ana' Dios. Bi gono' ga yedoe'ela'. Ni'a che da' chawe' da' nako' Le', beslá neda'. 
Bze nag chi'a, na' gokḻen neda'. Bze choch neda', na' wdape chi'i neda' nich yelá'. 
Le' ẕzoa chochkzo' neda', na' žape chi'o neda'. Dan' nako' ḻi ḻaže' wḻoe'elo' neda' nez, na' wgó'o neda' nezen'. 
Bebéj neda' ḻo do yeḻj dan' bkwézgake' nich séngake' neda'. Le', X̱an, ẕwíakzo' neda'. 
Ẕdia' be' da' nakkza' ḻo no'o Le', X̱ana' Dios. Le' beya'wo' neda', Dios ḻi ḻaže'. 
Bi de chawa'a benne' ka' ẕka'n ẕéngake' lo'a ka', san neda' žx̱en ḻaža'a Le', X̱ana' Dios. 
Yebéḻe'ela', na' soa' chawe' dan' nži'ilo' neda' na' ẕḻe'ekzlo' ẕzáka'ḻi'a. Nnezlo' ka ẕdia' ḻo da' žsáka'ḻe'egake' neda'. 
Bi bdio' neda' ḻo na'gak benne' ka' ẕžá'agake' neda'. Bzoa chocho' neda' to latje chawe'. 
Beyache' ḻaže'l neda', X̱ana' Dios, dan' ẕzáka'ḻi'a. Ba bebíž nis da' yožen yej ḻawa', na' žak nyache' ḻaža'a ḻo be' da' nakkza', na' ḻo beḻa' žen chia'. 
Dan' ẕde yeḻa' nban chia' ḻo da' ẕzáka'ḻi'a, ẕdia' yiz chia' ka' ẕbeže ḻaža'a, na' žedó ḻaža'a dan' nbaga'a ẕia, na' ẕlagak žit yoa'a. 
Benne' ka' ẕžá'agake' neda' gon dítjgekle' neda', na' benne' ẕjo'o ḻi'a chia' ka' žon dítjgekle' neda'. Benne' ka' zej nónbi'e neda' ẕkwásgake' gan zoa', na' benne' ka' ẕḻé'egekle' neda' ḻo nez žẕónnjgake'. 
Goḻ ḻáže'gake' neda' ka žóngake' che to benne' gat. Naka' neda' ka to ye'n yo da' nla'an. 
Ženla' da' ẕnnegak benne' zante chia', na' gáte'teze zoa da' ẕcheben neda' dan' žóngake' toze diža' bi da' góngake' chia', na' žak ḻáže'gake' gótgake' neda', 
san neda' žx̱en ḻaža'a Le', X̱ana' Dios. Ẕnnia' nako' Le' Dios chia'. 
Ḻo no'o Le' žape chi'o ža chia' ka'. Beslá neda' ḻo na'gak benne' ka' ẕžá'agake' neda', na' ḻo na'gak benne' ka' ẕbia ḻáže'gake' neda'. 
Ḻo yeḻa' ẕen chio' bwia neda', wen žin chio'. Ḻo yeḻa' žeyache' ḻaže' chio' beslá neda'. 
Bi go'o latje yedoe'ela', X̱ana' Dios, dan' žḻiža' Le'. Ben ga yedoé'egekle benne' ka' ẕbej yíchjgake' Le'. Ben ga soa žígake' ḻo yi' gabíl. 
Bnnita' ži benne' ka' žon ḻáže'gake', benne' ka' ẕnnégake' chegak benne' chawe' ka', dan' ẕnnágake' ḻo yeḻa' ẕka'n ẕen kwin, na' ḻo yeḻa' žon ditjle. 
Ẕente nak yeḻa' ži'i ḻaže' chio' dan' napo' nich bi da' gono' chegak benne' ka' žápegake' Le' ba la'ne, dan' žonno' chegak benne' ka' žx̱en ḻáže'gake' Le' ḻawgak yógo'te benne' ka'. 
Ḻo da' bagáche'ze gan zo' Le' ẕkache' chawo'o benne' chio' ka' nich bi be gongak benne' ka' chégake'. Ẕnnito' benne' ka' to ḻo yo'o ngache' nich bi be gongak chégake' benne' ka' ẕdiḻ diže'e. 
¡Ga'n ẕen X̱anžo Dios! Ḻo yeḻa' žeyache' ḻaže' chie' bene' da' ẕen nich gókḻene' neda' to ḻo yež gan gok wdiḻe. 
Kate' gok da' bcheben neda' wnnía': “Zoa' gan bi ẕḻe'ele X̱ana' neda'”, san Le' benlo' chi'a katen' góta'yoela' Le', na' bḻiža' Le'. 
Le ži'il X̱anžon', ḻe'e nakle benne' chekze' Ḻe'. X̱anžon' žape chi'e benne' ka' bi ẕbej yíchjgake' Ḻe', na' žebí'iḻi'e da' ẕia dan' žaḻa' yezí'gak benne' ka' ẕka'n ẕen kwíngake'. 
Le gon choch ḻáže'le, ḻe'e žx̱en ḻáže'le X̱anžo Dios, na' Ḻe' wzé choche' ḻe'e. 
