﻿SALMOS.
32.
Ba nez ẕen naken che bennen' Dios ba benít ḻawe' x̱toḻe'e, na' ba beké'e da' ẕinnj da' wbage'e. 
Ba nez ẕen naken che bennen' Dios bi žesbage'e ḻe' ẕia, bennen' bi ẕcache'e x̱toḻe'e. 
Kate' bi na' yex̱óalapa' doḻa' da' wbaga'a, bedó ḻaža'a dan' wžeža' dot ža. 
Ḻawe' ža, na' yele bsako'o neda', X̱ana' Dios. Bedó ḻaža'a ka žebiže bej nis byo' wbá ka'. 
Naž bex̱óalapa' doḻa' chia', na' bi bkacha'a da' ẕinnj dan' bena'. Bechóg ḻaža'a bex̱óalapan' ḻawo' Le', X̱ana' Dios, na' benít ḻawo'o Le' che x̱toḻa'a. 
Che ḻen yógo'te benne' chio' ka' žaḻa' wḻížgake' Le' kate' ne zo' yenlo' chégake', na' kate' žin da' wžía yin' benách ka', dan' gaken ka to yegw nis ẕen da' bgóleḻe'en, bi be gonen chegak benne' chio' ka'. 
Le' nako' ka to latje gan gak wkache' kwina', na' wkache' chawo'o neda' gan bi be wsakan' benách chio' ka'. Goḻkza' zižje ka besló' neda' dan' žox̱o' neda'. 
Ẕnna X̱anžon': “Wḻoe'ela' le' nez gan žaḻa' tio'. Wsedla' le', na' wzejni'ila' le' da' žaḻa' gono'. 
Bi gako' ka to bžina' o to burrw, bia ka' bi žejní'igeklba', bia ka' žon byenen nna biá'gako'-ba', na' ko'o ya žoá'agakba' nich góngakba' ka žénelo' le'.” 
Benne' ka' bi zej nake' chawe' žon byenen tégake' ḻo da' sáka'gake', san benne' ka' žx̱en ḻáže'gake' X̱anžon', Ḻe' žape chi'e ḻégake' ḻo yeḻa' ži'i ḻaže' chie'. 
Ḻe'e, benne' chawe' ka', le yebele na' le soa ḻo yeḻa' ba nez, dan' gokḻen X̱anžon' ḻe'e. Ḻo yeḻa' žebele le goḻ, dan' nakle ḻi ḻaže' ḻawe' Ḻe'. 
