﻿SALMOS.
33.
¡Le yebele ḻe'e, benne' chawe' ka', ḻaw X̱anžo Dios! Yeḻa' ẕka'n ẕen Dios chegak benne' chawe' ka' nakḻe'en x̱tan ḻawe' Ḻe'. 
¡Le wká'n ẕen Dios ḻen da' žinnle! ¡Le goḻ chie' ḻen da' žóḻ-ḻento' da' ze chi do chen! 
¡Le goḻ chie' Ḻe' to da' kob! ¡Le goḻ chawe', na' chinnle ḻen yeḻa' žebele! 
Ḻi ḻaže' nak x̱tiža' X̱anžo Dios, na' dot da' bene' benen' ḻo yeḻa' ḻi ḻaže' chie'. 
Ḻe' nži'ile' da' nak chawe', na' da' nak dot da' li. Benne' ka' do ẕente yežlyó nga zej nónbi'e yeḻa' žeyache' ḻaže' che X̱anžon'. 
X̱anžo Dios bene' ya'abá ḻen x̱tiže'e, na' yógo'te belj ka' da' zej nla' ẕan ya'abá bene' ḻen be' da' ẕžojen žoe'e. 
Ḻe' ẕtobe' nisdo', na' yeyonen' ka to ya'a nis. Ẕga'n chawe' nisen' gže' gan bkweze' latje chen. 
Le žebe X̱anžo Dios, yógo'tele zoale yežlyó nga. Le žebe ḻawe' Ḻe', yógo'tele ḻe'e zoale ḻo yežlyó, 
dan' bchaḻjze', na' gok yežlyón'. Wnnakze', na' wzoakzen. 
X̱anžo Dios žone' ga žeyák dáche'ze diža' da' žongak benne' zi'to' ka', na' žone' ga žak dáche'ze da' žénegekle' góngake', 
san x̱tiža' X̱anžo Dios sóatezen. Da' ẕza' ḻaže'e ẕžinkzen gan zej nnita' yógo'te kwe' benách ka'. 
Ba nez ẕen naken chegak benne' yežen' X̱anžon' nake' Dios chégake'. Wžé Dios benne' yežen' nich gákgake' benne' chekze'. 
Gan zoe' ya'abá chie' bwia X̱anžo Dios, na' bḻe'ele' yógo'te kwe' benách ka'. 
Gan zoe' latje la'y chie' bwie', na' bḻe'ele' yógo'te benne' ka' nníta'gake' yežlyó. 
Ḻe' bene' yichj ḻáẕdo'gak yógo'te benách ka', na' ẕḻe'ele' yógo'te da' žóngake'. 
Bi yelá no benne' wnná bia' ni'a che benne' zante chie', benne' ka' žjake' ḻo wdiḻe, na' bi yelá no benne' waḻe ni'a che yeḻa' waḻe chie'. 
Bi zoa no benne' yelé' ni'a che bžina' chie' ka', na' bi yelá no benne' ni'a che yeḻa' waḻe ẕen chie'. 
X̱anžo Dios ẕwíakze' benne' ka' žébegake' Ḻe'. Ẕape chi'e benne' ka' žx̱en ḻáže'gake' yeyache' ḻáže'le' Ḻe' ḻégake', 
nich yeslé' ḻégake' ḻo yeḻa' got, na' nich wawe' ḻégake' kate' žak wbín. 
Žx̱en ḻáže'žo X̱anžo Dios. Ḻe' žákḻene' žo'o, na' žape chi'e žo'o. 
Che ḻen dot ḻáže'žo yebéḻe'elžo ḻawe' Ḻe', dan' žx̱en ḻáže'žo La la'y chie'. 
Beyache' ḻaže'l neto', X̱anto' Dios, dan' žx̱en ḻáže'to' Le'. 
