﻿SALMOS.
34.
Wká'n ẕénteza' X̱anžo Dios dot ža, na' yele. Góḻteza' da' we ḻawa' Ḻe'. 
Chaz ḻaža'a X̱anžo Dios. Yéngekle benne' gax̱jw ḻaže' ka' da' ki, na' yebéḻe'egekle'. 
Le wká'n ẕen X̱anžo Dios tẕen ḻen neda', na' tẕen we ḻawžo La la'y chie'. 
Bḻiža' X̱anžo Dios, na' Ḻe' benle' chia', na' beslé' neda' ḻo yógo'te da' bchébegaken neda'. 
Benne' ka' bx̱en ḻáže'gake' Ḻe' bḻé'egekle' yeḻa' ẕen chie', na' bi bedoé'egekle'. 
Neda', benne' yache', bḻiža', na' benle X̱anžo, Dios chian', na' beslé' neda' ḻo yógo'te da' wẕáka'ḻi'a. 
Wbás ka' che ya'abá che X̱anžon' zej zoe' kwit benne' ka' ẕžébegake' Ḻe', na' žape chí'igake' ḻégake'. 
Le wia nga, na' ḻé'elele nak chawe' X̱anžo Dios. Yeḻa' ba nez ẕen naken che bennen' žx̱en ḻaže'e Ḻe'. 
Le žebe X̱anžo Dios, ḻe'e, nakle benne' chie' ka', dan' bi be žiážjegekle benne' ka' ẕžébegake' Ḻe'. 
Bež yíx̱e'do' ka' žiážjegeklba', na' ẕdóngakba', san benne' ka' žx̱en ḻáže'gake' X̱anžo Dios bi be da' chawe' yážjegekle'. 
Le da, x̱kwide' ka', na' le yenle chia'. Wsedla' ḻe'e nich žébele X̱anžo Dios. 
¿Noẕ benne' ládjwle ḻe'e žénele' soakze' nbane', bennen' žénele' soe' yiz zan nich ḻe'ele' da' chawe'? 
Bwíakze da' ẕchaḻjo' nich bi nnio' da' ẕinnj, na' nich bi wchaḻjo' da' wen laže'. 
Bzoa cheḻa'ale da' bi nak chawe' da' ẕchaḻjo', na' ben da' nak chawe'. Ben byene so' ḻo yeḻa' ẕga'n chawe', na' ben ka nak chen. 
Ẕwíakze X̱anžo Dios benne' ka' zej nake' chawe', na' ẕze nage' da' ẕnnábgekle' Ḻe'. 
Ẕža'a X̱anžo Dios benne' wen da' ẕinnj ka', na' bi soa no benne' chejsá' ḻaže'e ḻégake'. 
Benne' chawe' ka' žḻížgake' X̱anžo Dios, na' Ḻe' ženle' chégake', na' žeslé' ḻégake' ḻo yógo'te da' ẕzáka'gake'. 
Gawze zoa X̱anžo Dios gan zej nnita' benne' ka', benne' žak nyache' ḻáže'gake', na' žeslé' ḻégake'. 
Da' zanḻe'e da' ẕzaka' benne' chawe', san žeslá X̱anžo Dios ḻe' ḻo yógo'te da' ka'. 
Ḻe' žape chi'ikze' yógo'te žit yo'o bennen', na' nitó žit chie' bi gachjwn. 
Da' ẕinnj da' žon benne' bi nake' chawe' goten ḻe', na' kwia yi'gak benne' ka' ẕží'igake' chegak benne' chawe' ka'. 
X̱anžo Dios ẕzoa chawe'e be' da' nákgakkze benne' wen žin chie' ka', na' yógo'te benne' ka' žx̱en ḻáže'gake' Ḻe' batkle kwia yí'gake'. 
