﻿SALMOS.
35.
X̱ana' Dios, bsejw x̱nezgak benne' ka' ẕnnégake' chia'. Bdiḻ-ḻen benne' ka' ẕdíḻ-ḻengake' neda'. 
Da, gape chi'o neda' ḻo wdiḻe, na' gokḻen neda'. 
Bex̱w ya ntoche' tonn che wdiḻe nich wsejo' x̱nezgak benne' ka' ẕbia ḻáže'gake' neda'. Bḻoe'el neda' nako' Benne' Weslá chia'. 
Ben ga yedoé'egekle, na' chíx̱gekle benne' ka' žénegekle' gótgake' neda'. Ben ga wẕonnjgak, na' yedoé'egekle benne' ka' žénegekle' góngake' neda' ẕia. 
Ben ga gákgake' ka to laga' biž da' žwa' be', na' bseḻa' wbás la'y chio' nich wlage' ḻégake'. 
Ben choḻ x̱nézgake' nich kwílgake', na' bseḻa' wbás la'y chion' nich kwia ḻaže'e ḻégake'. 
Bkáche'gake' to do yeḻj nich senen neda', na' bi be bena' chégake'. Bché'ngake' to yežw gan chejbix̱a' neda', na' bi be da' ẕia nbaga'a. 
Bseḻa' da' wžía yin' ḻégake', da' bi gákbe'egeklen'. Ben ga sen do yeḻj chégaken' ḻa' légakkze', na' ga chejchégwgake' gan kwia yí'gake'. 
Naž yebéḻe'ekzla' ni'a che da' ben X̱anžo Dios. Gak yeḻa' ba nez ẕen chia' dan' beslé' neda'. 
Yógo'te žit yoa'a nnágaken: “X̱anto' Dios, ¿noẕkze benne' nake' ẕen ka nako' Le'? Žesló' benne' yache' ḻo na' benne' nakže' waḻe ka ḻe', na' benne' žiážjele' ḻo na' benne' ẕbane' da' do' da' den chie'.” 
Bḻa'gak benne' ka' žechébegake' da' wen ḻaže'. Wnnábgekle' neda' ka nak che to da' bi nnezla'. 
Bebí'igake' chia' da' ẕinnj ni'a che to da' chawe' da' bena' neda', nich wsáka'gake' neda', 
san neda', kate' bi wnníta'gake' chawe', gok nyache' ḻaža'a, na' bena' wbás, na' bsaka' kwina'. Dot ḻaža'a bḻiža' Le', Dios, nich yeyono' ḻégake'. 
Gok nyache' ḻaža'a ni'a chegak benne' ka' kan žona' ni'a che bi' lježa', o ni'a che bi' bíche'kza'. Gok nyache' ḻaža'a ka žon no benne' ni'a che x̱ne'e kate' ne žate', 
san bebégekle benne' ka' kate' wzóa da' bsakan' neda', na' bedjwíagake' neda'. Bdíḻ-ḻengak benne' wen da' ẕinnj ka' neda', na' choḻze bzétjgake' neda'. Bwíatezegake' neda', na' bi bsángake' da' žóngake'. 
Bsáka'gake' neda', na' ben dítjgekle' neda', na' wžía ḻáže'gake' neda' ḻo yeḻa' ẕža'a chégake'. 
X̱ana' Dios, ¿to chi'ize wíazo' da' žóngake'? Beslá neda' ḻo na'gak benne' ka' ẕžia yí'gake' neda', benne' ka' zej nake' ka bež yix̱e' ka'. 
Yapa' Le' “Žóx̱keno'” gan zej ndobe benne' chio' ka'. Wká'n ẕénteza' Le' ladjw benne' zan ka'. 
Bi go'o latje yebégekle benne' ka' bi ẕḻé'egekle' neda' chawe', na' bi be bena' chégake'. Bi go'o latje benne' ka' gon dítjgekle neda', benne' ka' ẕžá'agake' neda', na' bi be ẕia nbaga'a. 
Benne' ki bi žénegekle' sóagake' ḻo yeḻa' ẕga'n chawe', na' ḻo yeḻa' wen ḻaže' chégake' ẕnnégake' chegak benne' ka' ẕbézgake' ži ḻaže' ḻo yežlyó nga. 
Ben dítjgekle' neda', na' wnnágake': “Ba bḻe'elto' da' bene'.” 
X̱ana' Dios, bḻe'ekzlo' da' žóngake'. Bi so' žize. X̱ana' Dios, bi kwej yichjo' neda'. 
Wzó ža'. Wzóa wchi'a ḻažo'o neda'. Da, X̱ana' Dios, nich gákḻeno' neda'. 
Bchi'a ḻaže' neda' ḻo da' chawe' chio', X̱ana' Dios. Bi go'o benne' ka' latje wẕížegake' chia'. 
Bi go'o latje nnágake': “Ba gok da' wzé ḻáže'žo”, na' bi nnágake': “Ba bzéx̱jwžo ḻe'.” 
Ben ga yedoé'egekle, na' chíx̱gekle yógo'te benne' ka' žebégekle' kate' bi žak chia'. Ben ga yedoé'egekle, na' ga'ngak ka'ze benne' ka' ẕdíḻ-ḻengake' neda'. 
Ben ga goḻgak, na' yebégekle benne' ka' ẕḻé'egekle' neda' chawe', nich nnágakkze': “¡Ga'n ẕen X̱anžon'!” Bennen' žak ḻaže'e ga'n chawe' benne' wen žin chie'. 
Wcháḻjteza' che da' chawe' da' nako' Le', na' wká'n ẕénteza' Le' dot ža, na' yele. 
